ទ្រព្យសម្បត្តិរបស់ អ្នកស្រី Sheryl Sandberg អគ្គនាយកប្រតិបត្តិ (COO) របស់ Facebook បានកើនឡើងលើសពី ១ពាន់លានដុល្លារអាមេរិក កាលពីម្សិលមិញនេះ ដោយសារតម្លៃមូលបត្ររបស់ Facebook ឡើងខ្ពស់មិនធ្លាប់មានពីមុនមក គឺ ៥៨,៥ដុល្លារក្នុងមួយហ៊ុន នៅក្រុង New York ។
Sheryl Sandberg បច្ចុប្បន្ន គឺជាមហាសេដ្ឋីនី វ័យក្មេងបំផុតម្នាក់ ក្នុងពិភពលោក
យោងទំព័រ Bloomberg ជាមួយភាគហ៊ុនដែលមានតម្លៃ ៧៥០លានដុល្លារ រួមនឹងទ្រព្យសម្បត្តិផ្សេងទៀត អគ្គនាយិការ វ័យ ៤៤ឆ្នាំ រូបនេះ បានក្លាយជាមហាសេដ្ឋីនី ក្មេងបំផុតមួយរូបក្នុងពិភពលោក។ចាប់តាំងពីក្រុមហ៊ុន Facebook បានធ្វើ IPO (ដាក់លក់មូលបត្រដំបូង) កាលពីឆ្នាំ ២០១២ អ្នកស្រី Sandberg ក៏រកបានប្រាក់ជាង ៣០០លានដុល្លារ ពីមូលបត្រ។ ទ្រព្យរបស់ Sandberg បានកើនឡើងបែបនេះ បានបង្ហាញថា ភាពសំខាន់របស់អ្នកស្រីនៅលើពិភពលោក កាន់តែកើនឡើងដូចគ្នា។ Sandberg ក៏នឹងចូលរួមវេទិកាសេដ្ឋកិច្ចពិភពលោក (WEF) នៅ Davos ប្រទេសស្វីសនាពេលខាងមុខផងដែរ។
អ្នកស្រី Sandberg កើតឆ្នាំ ១៩៦៩ នៅ Washington, D.C នៅក្នុងគ្រួសារជនជាតិ ជ្វីហ្វ (Jewish) មួយ។ Sandberg តែងតែជាសិស្សឆ្នើមជាងគេនៅក្នុងថ្នាក់រៀន ហើយនៅពេល Sandberg កំពុងសិក្សានៅវិទ្យាល័យ Sandberg ក៏បានឆ្លៀតពេលបង្រៀនហាត់ប្រាណផងដែរ។Sandberg បានបញ្ចប់ការសិក្សានៅសកលវិទ្យាល័យ Harvard ក្នុងឆ្នាំ ១៩៩១ ដោយទទួលបានបរិញ្ញាបត្រផ្នែកសេដ្ឋកិច្ច។ ឆ្នាំ ១៩៩៣ Sheryl Sandberg បានទទួលសញ្ញាបត្រអនុបណ្ឌិតផ្នែកគ្រប់គ្រងពាណិជ្ជកម្មពីសាលា Harvard Business School ។ អ្នកស្រី ត្រូវបានជ្រើសរើសឱ្យធ្វើជាជំនួយការរបស់អតីតរដ្ឋមន្ដ្រីនៃក្រសួងហិរញ្ញវត្ថុអាមេរិក Lawrence Summers ហើយបច្ចុប្បន្ន អ្នកស្រី Sheryl Sandberg គឺជាសមាជិកគណកម្មការគ្រប់គ្រងរបស់ Walt Disney និងជាម្ចាស់សៀវភៅ “Lean In” ដែលនិយាយអំពីតួនាទីរបស់ស្ដ្រីក្នុងសង្គម។ Sandberg ក៏ធ្លាប់បានធ្វើការឱ្យក្រុមហ៊ុន Google និង Starbucks ។ ក្នុងត្រីមាសទី IV នៃឆ្នាំកន្លង Facebook រកបានប្រាក់ចំណូលពីការផ្សាយពាណិជ្ជកម្ម ចំនួន ១០០លានដុល្លារ ច្រើនជាងការវាយតម្លៃរបស់ក្រុមអ្នកវិភាគ។ លោក Ross Sandler អ្នកវិភាគនៃក្រុមហ៊ុន Deutsche Bank AG ថ្លែងថា ៖ “Facebook កំពុងតែមានការរីកចម្រើនខ្លាំង ដោយសារវិស័យឧបករណ៍ចល័ត”។
គួររំឭកថា កាលពីឆ្នាំ ២០១៣ CEO របស់ Facebook គឺលោក Mark Zuckerberg រកប្រាក់បន្ថែម បាន ១២,៤ពាន់លានដុល្លារ នេះបើយោងតាមទំព័រ Bloomberg ។ សហស្ថានិកផ្សេងទៀតរបស់ Facebook ក៏មានទ្រព្យកាន់តែកើនឡើងច្រើន។ សហស្ថាបនិក Dustin Moskovitz អាយុ ៣០ឆ្នាំ គឺជាអ្នកមានទី ១៧៤ ក្នុងពិភពលោក ដោយមានទ្រព្យ ៧,៤ពាន់លានដុល្លារ។ ចំណែកសហស្ថាបនិក Eduardo Saverin និង Chris Hughes មានទ្រព្យជាបន្ដបន្ទាប់ គឺ ៣,២ពាន់លានដុល្លារ និងជាង ៥០០លានដុល្លារ។
អត្ថបទសំខាន់ៗគួរចាប់អារម្មណ៍ ៖
កំហុសទូទៅ ដែលអ្នកជំនួញថ្មី តែងជួបប្រទះ
រកចំណូលកន្លះលានដុល្លារ ក្នុងមួយឆ្នាំៗ ដោយគ្រាន់តែដើរទិញ អីវ៉ាន់
គ្រួសារលោក Obama ធ្វើនំ សម្រាប់ជនអនាថា ក្នុងថ្ងៃបុណ្យជាតិ
ប្រែសម្រួលដោយ ៖ តារាប្រភព ៖ Bloomberg