ផ្កាយព្រះគ្រោះមួយ នឹងហោះមកក្បែរផែនដី នៅថ្ងៃអាទិត្យនេះ ហើយវាអាចមើលឃើញច្បាស់ពី New Zealand ព្រោះតែ មានចម្ងាយជិតជាងបណ្ដាផ្កាយរណបអាកាសធាតុរបស់មនុស្ស។
ភពព្រះគ្រោះ 2014 RC ហោះជិតផែនដី ជាងផ្កាយរណបទៅទៀត
ភពព្រះគ្រោះ 2014 RC នេះ ត្រូវបានរកឃើញកាលពីខែសីហា ដោយមជ្ឈមណ្ឌលត្រួតពិនិត្យអវកាស Catalina នៅក្រុង Tucson រដ្ឋ Arizona ។ ទីភ្នាក់ងារអវកាស អាមេរិក (NASA) ឱ្យដឹងថា វាបង្ហាញខ្លួននៅប៉ុន្មានយប់ជាប់ៗ ហើយត្រូវបានពិនិត្យមើលដោយកែវយឹតតារាសាស្ដ្រ Pan-STARRS 1 ដែលមានទីតាំងនៅលើកំពូលភ្នំ Haleakalā របស់កោះ Maui ស្ថិតនៅក្នុងប្រជុំកោះ Hawaii ។
2014 RC ត្រូវបានគន់គូរឃើញថា នឹងហោះមកក្បែរផែនដី ដោយមានចម្ងាយប្រហែល ១ភាគ ១០ នៃចម្ងាយពីផែនដី ទៅព្រះចន្ទ (ចម្ងាយពីផែនដីទៅព្រះចន្ទ គឺ ៣៨៤.៤០០ km)។ នៅកន្លែងដែលជិតបំផុត វានឹងស្ថិតនៅពីលើ New Zealand ចម្ងាយប្រហែល ៣៤.០០០ គីឡូម៉ែត្រ គឺជិតផែនដីជាង បើធៀបនឹងបណ្ដាផ្កាយរណបអាកាសធាតុ ឬផ្កាយរណបភូមិសាស្ដ្រ (geostationary satellites) ដែលតែងហោះចម្ងាយពីផែនដី ប្រហែល ៣៦.០០០ គីឡូម៉ែត្រ។
យោងតាមទំព័រ RT ភពព្រះគ្រោះ 2014 RC នឹងហោះឆ្លងកាត់ផែនដី ក្នុងថ្ងៃទី ៧កញ្ញានេះ នៅវេលាម៉ោងប្រហែល ១៨ និង ១៨នាទី (ម៉ោង GMT / ដើរក្រោយម៉ោងកម្ពុជា ប្រហែល ៧ម៉ោង) គឺត្រូវនឹងម៉ោង ១យប់ ឈានចូលថ្ងៃទី ៨កញ្ញា ម៉ោងនៅកម្ពុជា។ ភពព្រះគ្រោះ 2014 RC ត្រូវបានគេព្យាករណ៍ថា នឹងមិនបង្កផលលំបាកដល់ផែនដីនោះទេ ប៉ុន្ដែ ការប្រែប្រួលរបស់ភពនេះ ត្រូវបានគេតាមដានយ៉ាងយកចិត្តទុកដាក់បំផុត ដើម្បីធានាថា នឹងមិនមានការប៉ះទង្គិចណាមួយកើតឡើង។
ក្រុមអ្នកវិទ្យាសាស្ដ្ររបស់ NASA ឱ្យដឹងថា អាចម៍ផ្កាយ ឬផ្កាយព្រះគ្រោះ អាចនឹងមើលមិនឃើញដោយភ្នែកទទេ ព្រោះថា វាមានរូបរាងស្រអាប់ សូម្បីតែនៅក្នុងអាកាសធាតុអំណោយផល។ គួររំលឹកថា មកដល់បច្ចុប្បន្ននេះអង្គការ NASA បានរកឃើញអាចម៍ផ្កាយ ឬភពព្រះគ្រោះ ចំនួន ជាង ១០.០០០ ស្ថិតក្នុងប្រព័ន្ធព្រះអាទិត្យ ដែលធ្លាប់ហោះកាត់ផែនដី និងមិនធ្លាប់បានបង្កគ្រោះថ្នាក់ដល់មនុស្សលោក។
បើមិនអាចហោះមកធ្លាក់ និងបុកផែនដី តើ ភពព្រះគ្រោះ 2014 RC អាចប៉ះទង្គិចនឹងផ្កាយរណប ដែលមានចំនួនយ៉ាងច្រើន កំពុងហោះជុំវិញផែនដី?
យ៉ាងណាក៏ដោយ មានសំនួរដែលសួរថា នៅពេលភពព្រះគ្រោះនេះ ហោះមកជិតផែនដី ជាងបណ្ដាផ្កាយរណបទៀតនោះ តើមានអ្វីដែលអាចបញ្ជាក់បានប្រារព្ធថា វានឹងមិនមានការប៉ះទង្គិចកើតឡើង? ក្នុងតំបន់នៃគន្លងគោចរ ដែលមានចម្ងាយពីផែនដី ប្រហែល ៣៦.០០០ គីឡូម៉ែត្រ គឺមានផ្កាយរណបរបស់មនុស្ស រាប់ស្ទើរតែមិនអស់ ដូច្នេះ បើមិនអាចហោះមកបុកផែនដី ក៏ 2014 RC នេះ អាចនឹងប៉ះទង្គិចជាមួយបណ្ដាផ្កាយរណប!
ប្រែសម្រួលដោយ ៖ តារាប្រភព ៖ RT/Daily Mail