កាលពីព្រលប់ថ្ងៃទី១២ខែកញ្ញាឆ្នាំ២០១២នេះ ផ្ទះប្រជាពលរដ្ឋមួយកន្លែងកំពុងប្រារព្ធពិធីបង្កក់ខែកូន ដោយមានការជួបជុំមិត្តមនុស្សយ៉ាងច្រើនកុះករ ស្រាប់តែមានរថយន្តដឹកចេកដ៏ធំមួយរត់សំដៅចូលបុករបងផ្ទះ ធ្លាយចូលទៅរកហ្វូងមនុស្ស ដោយមិនមានឮសូរសំឡេង ធ្វើឲ្យមនុស្សផ្អើលរត់ជាន់គ្នា ប៉ុន្តែមិនមានភ្ញៀវណាម្នាក់រងរបួសនោះទេ ដោយគ្រាន់តែបង្កការខូចខាតទ្រព្យសម្បត្តិប៉ុណ្ណោះ។
ហេតុការណ៍នេះបានកើតឡើងនៅផ្ទះ ឈ្មោះ ដាង គឹមអ៊ុក ដែលស្ថិតនៅក្នុងក្រុម២២ ភូមិ១ សង្កាត់លេខ២ ក្រុងព្រះសីហនុ និងបង្កឡើងដោយរថយន្តដឹកចេកម៉ាកអ៊ីស៊ុយស៊ុយ១គ្រឿង នៅវេលាម៉ោង៧និង៣០នាទីព្រលប់ថ្ងៃទី១២ ខែកញ្ញា ។
មន្ត្រីនគរបាលប៉ុស្តិ៍រដ្ឋបាលលេខ ២ ក្រុងព្រះសីហនុបានឲ្យដឹងថា រថយន្តបង្កហេតុនោះ ជារថយន្តដឹកចេកមកពីខេត្តកំពង់ចាមយកមកលក់នៅក្រុងព្រះសីហនុ នៅពេលកើតហេតុអ្នកបើកបរជាឪពុកបានពន្លត់ម៉ាស៊ីនរថយន្ត ហើយដាក់លេខទប់ ដោយមិនបានដាក់ហ្វ្រាំងដៃទេ បន្ទាប់មកក៏ចុះទៅគិតលុយពីម៉ូយនៅចំណុចកើតហេតុខាងលើ ដោយទុកកូនប្រុស២នាក់នៅក្នុងកាប៊ីនឡាន (បងអាយុជាង១០ឆ្នាំនិងប្អូនអាយុជិត១០ឆ្នាំ)ដោយកូនទាំងពីរ នាក់នោះរពិសដៃ បានរុញដៃលេខលេងក៏របូត ធ្វើឲ្យរថយន្តរអិលចុះចំណោទយ៉ាងលឿន សំដៅផ្ទះប្រជាពលរដ្ឋដែលកំពុងប្រារព្ធបង្កក់កូនដោយមានភ្ញៀវច្រើន គួរសម ផ្អើលរត់ជាន់ជើងគ្នាតែម្តង។
នគរបាលចរាចរណ៍ផ្លូវគោកខេត្តព្រះ សីហនុបានបង្ហើបប្រាប់ឲ្យដឹងថា រថយន្តដឹកចេកបង្កហេតុនោះមានស្លាកលេខក្រចេះ 3A-0225 ក្រៅពីនោះពុំមានពត៌មានលំអិតទេ ព្រោះគេដោះលែងរថយន្តនោះទៅបាត់ហើយដែរ។
នេះគឺជាហេតុការណ៍មួយដែលពុកម្ដាយទាំងឡាយគួរតែប្រុងប្រយ័ត្ន នៅពេលទុកកូនអោយនៅក្នុងរថយន្ដ ឬម៉ូតូ ដែលមានសោនៅទីនោះ។ ភាពរពិសដៃជើងរបស់កូនៗ អាចបង្កអោយមានគ្រោះថា្នក់ដែលយើងនឹកស្មានមិនដល់៕
ដោយ ៖ វិចិត្រប្រភព ៖ NKV