កំពតៈ បុរសមិនស្គាល់ អត្តសញ្ញាណម្នាក់ ត្រូវបានគេឃើញ ដេកស្លាប់ នៅលើកំណាត់ ផ្លូវជាតិលេខ៣ នៅខាងកើតស្ពាន ស្រះអាប៉ោង ក្នុងភូមិព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត យ៉ាងអនោអធម នៅព្រឹកថ្ងៃទី១១ ខែកក្កដា ឆ្នាំ២០១៣ ។
សមត្ថកិច្ចបានធ្វើការសន្និដ្ឋានថា ករណីនេះ មិនមែនជាឃាតកម្មនោះទេ ហើយថាជនសង្ស័យខាងលើ ត្រូវបានម៉ូតូបុកស្លាប់ តាំងពីយប់ថ្ងៃទី១០ ខែកក្កដា មកម្ល៉េះ ដោយសារតែ នៅកន្លែងកើតហេតុ មានស្នាមកង់ ម៉ូតូអូស ព្រមទាំងមានជ្រុះកញ្ចក់ម៉ូតូ ជនបង្ក ផងដែរ ។ តាមការរៀបរាប់ របស់សមត្ថកិច្ច ជនរងគ្រោះខាងលើ មានវ័យប្រហែល ២៨ឆ្នាំ ពាក់ខោខូវប៊យ ពណ៌ខ្មៅ អាវយឺខ្មៅទំនងជាដើរម្នាក់ឯងលើផ្លូវជាតិលេខ៣ ហើយក៏ត្រូវជនបង្កបើកម៉ូតូបុកស្លាប់តែម្តង។
ទោះជាយ៉ាងណា ប្រជាពលរដ្ឋ នៅកន្លែងកើតហេតុ ក៏បានផ្តល់តម្រុយខ្លះដែរថា កាលពីវេលាម៉ោងប្រមាណ១២និង៣០នាទីយប់រំលងអាធ្រាត្រពួកគេបានឮសម្លេងម៉ូតូដួល ហើយបណ្តាលឱ្យឆ្កែព្រូស យ៉ាងខ្លាំង ប៉ុន្តែមិនបានចេញទៅមើលនោះទេ លុះព្រឹកឡើងក៏នាំគ្នាផ្អើល តៗគ្នាថាមានមនុស្ស ដេកស្លាប់យ៉ាង អនោចអធម តែម្តងទៅ ។
យ៉ាងណាក៏ដោយ សមត្ថកិច្ចមូលដ្ឋាន បានធ្វើការអំពាវនាវ រកក្រុមគ្រួសារសាច់ញាតិ ជនរងគ្រោះ ដែលមានភិនភាគ ដូចខាងលើ ដើម្បីនាំយកសាកសព ទៅធ្វើបុណ្យតាមប្រពៃណី៕
ដោយ៖ ដើមអម្ពិលផ្តល់សិទ្ធិដោយ៖ ដើមអម្ពិល