ខេត្តកំពង់ឆ្នាំង ៖ ពិតណាស់ថា ពាក្យ«ក្រុង» គឺទាមទារឱ្យមានសោភ័ណភាព អនាម័យ និងមានផាសុកភាពផងដែរ ។ ប៉ុន្តែអ្វីដែលចង់និយាយនៅពេលនេះ គឺក្រុងកំពង់ឆ្នាំង ដែលជនមួយក្តាប់តូចបានធ្វើឱ្យបាត់បង់សណ្តាប់ធ្នាប់ និងភ្ញៀវទេសចរអន្តរជាតិអស់ជាច្រើនផងដែរ ។ ផ្សារឆ្នាំង គឺជាសង្កាត់មួយក្នុងចំណោមសង្កាត់ទាំង៤នៃក្រុងកំពង់ឆ្នាំង ។ សង្កាត់នេះមានភូមិសាស្ត្រជាប់មាត់ទន្លេ ភាគច្រើនដែលទីនោះសំបូរទៅដោយភ្ញៀវទេសចរបរទេស មកឈប់កប៉ាល់ ហើយបានឡើងទៅលើគោកដើម្បីដើរទស្សនាកំសាន្តនៅក្នុងសង្កាត់នេះក៏ដូចជាដើរទស្សនាទេសភាពក្ នុងក្រុងផងដែរ ។
ប៉ុន្តែអ្វីដែលហួសចិត្តនោះ គេបានឃើញក្តារខៀនមួយដែលមានដំបូលប្រក់ទុកសំរាប់បិទប្រកាស សេចក្តីជូនដំណឹង ឬទុកសំរាប់បិទផ្សាយឃោសនាអប់រំសុខភាពជាដើម ដែលបានដាក់បញ្ឈរនៅម្តុំចុងកោះនោះ បានក្លាយជាកន្លែងចងខ្សែដាក់ស្នួហាលខោអាវយ៉ាងអនាធិបតេយ្យ ធ្វើឱ្យប៉ះពាល់ដល់សោភ័ណភាពទីក្រុងនេះយ៉ាងធ្ងន់ធ្ងរ ។ ប៉ុន្តែទង្វើយ៉ាងអាក្រក់នេះមិនត្រូវបានអាជ្ញាធរមូលដ្ឋានមើលឃើញនិងណែនាំឡើយ ។ ដូចមានរូបថតដែលបានដាក់ឱ្យឃើញនេះស្រាប់ ។ តាមមើលក្តារខៀនដែលសំរាប់បិទផ្សាយព័ត៌មាននេះ គឺយកមកដាក់ចោលដោយគ្មានការទទួលខុសត្រូវពីសាមីអង្គភាពឡើយ ។ មិនមានបំណងបន្តុះបង្អាប់អង្គភាពឬស្ថាប័ននោះទេ តែគួរមានសតិសម្បជញ្ញៈផង ខ្មាស់ភ្ញៀវបរទេសដែលគេដើរកំសាន្តរាល់ថ្ងៃ ។ សង្ឃឹមថា ក្រោយការផ្សាយនេះ នឹងមានការកែប្រែឡើងវិញសំរាប់យើងទាំងអស់គ្នា ៕