ខេត្តព្រៃវែង ៖ កាលពីថ្ងៃទី២៥ ធ្នូ ក្រុមមន្ត្រីបសុព្យាបាលប្រចាំស្រុកពាមរក៍ បានចុះទៅដល់ភូមិចាន់ ភូមិព្រៃកំពែង ភូមិព្រៃអង្គញ់ និងភូមិព្រៃកណ្តៀង ក្នុងឃុំព្រៃកណ្តៀង ស្រុកពាមរក៍ ដើម្បីផ្សព្វផ្សាយណែនាំ និងចែកថ្នាំព្យាបាលសត្វគោមួយចំនួនដល់ប្រជាកសិករ ដើម្បីការពារជំងឺផ្សេងៗលើសត្វពាហនៈ ។ លោកមុំ ស្រស់ មន្ត្រីបសុព្យាបាលប្រចាំស្រុកពាមរក៍ បានឱ្យដឹងថា ភូមិទាំង៤ ដែលស្ថិតក្នុងឃុំព្រៃកណ្តៀងនេះសព្វថ្ងៃពុំទាន់កើតមានជំងឺសត្វពាហនៈច្រើនទេ ហើយពួកលោកចុះមកពន្យល់ពីវិធីសាស្ត្រការពារជំងឺសត្វពាហនៈ ដោយវិធីផ្សេងៗ ដល់ប្រជាកសិករ ដើម្បីឱ្យពួកគាត់ដែលមានគោក្របី កុំឱ្យធ្វេសប្រហែសឱ្យសោះ មានបញ្ហាត្រូវឆាប់រាយការណ៍ និងឆាប់ព្យាបាល ។
សព្វថ្ងៃនៅខេត្តដទៃៗទៀតមានការរាលដាលជំងឺដល់សត្វពាហនៈជាច្រើន ដូច្នេះហើយសំរាប់មូលដ្ឋានយើងដែលពុំទាន់មាន ឬក៏មានជំងឺតិចតួចត្រូវប្រញាប់ព្យាបាល ទោះដោយវិធីបុរាណក៏ដោយ ឬវិទ្យាសាស្ត្រក៏ដោយ ឱ្យតែបានជាឆាប់រហ័ស ដូចជាវិធីយកស្លឹកអំពិលត្រាំទឹកមកប្រើដែលជាវិធីបុរាណនេះក៏មានប្រសិទ្ធភាព ដែរ ។ ចំណុចពិសេសគឺលោកបានផ្តាំផ្ញើឱ្យម្ចាស់សត្វពាហនៈកុំភ្លេចតាមដានស្ថានភាពសត្វរប ស់ខ្លួនពេលរដូវច្រូតកាត់ ហើយនេះ បើវាមានជំងឺ ត្រូវឆាប់ព្យាបាលកុំទុកឱ្យទាល់តែឈឺធ្ងន់ធ្ងរ ទើបរត់រកគ្រូពេទ្យ ឬថ្នាំនោះគឺជាការនាំឱ្យខាតបង់ ។
លោកមុំ ស្រស់ បន្តថា លោកប្រធានការិយាល័យបសុព្យាបាលខេត្តបានផ្តាំផ្ញើថា បើចិញ្ចឹមគោក្របី សូមកុំពិសាសាច់គោក្របីដែលឈឺងាប់នៅក្នុងភូមិ តែបើពិសាសាច់គោ ក្របីដែលឈឺងាប់នៅក្នុងភូមិ សូមកុំចិញ្ចឹមវា ព្រោះនឹងអាចមានមេរោគឆ្លងរាលដាលដល់សត្វគោក្របីពុំខាន ។ លោកបន្តទៀតថា សព្វថ្ងៃនេះរាជរដ្ឋាភិបាលមានការយកចិត្តទុកដាក់ចំពោះសត្វពាហនៈនេះណាស់ រីឯការព្យាបាលរបស់យើងក៏សកម្មដែរ ហើយសំខាន់គឺការពារមុនកុំឱ្យមានកើតជំងឺហើយទើបព្យាបាល ៕