ខេត្តស្ទឹងត្រែង ៖ ទីតាំងសិប្បកម្មកែច្នៃឈើធំៗក្នុងក្រុងស្ទឹងត្រែង ត្រូវបានចាប់រឹបអូសចំនួន៤ទីតាំងហើយចាប់តាំងពីម៉ោង៨ព្រឹក ថ្ងៃទី២៤ ធ្នូ កន្លងមក ។ ការចុះបង្ក្រាបឈើក្នុងសិប្បកម្មកែច្នៃនេះដឹកនាំដោយលោកអ៊ុង សំអាត អនុប្រធានរដ្ឋបាលព្រៃឈើ និងលោកច្រឹង ខ្មៅ ព្រះរាជអាជ្ញាអមសាលាដំបូងខេត្ត ព្រមទាំងមន្ត្រីរដ្ឋបាលព្រៃឈើខេត្ត និងកងរាជអាវុធហត្ថខេត្ត ។
ក្នុងប្រតិបត្តិការនេះ កំលាំងជំនាញបានរឹបអូសឈើប្រណីតជាច្រើនម៉ែត្រគូប និងរណាររ៉ៃរណារយន្តជាច្រើនគ្រឿង ។ លោកអ៊ុង សំអាត បានឱ្យដឹងថា ទីតាំងកែច្នៃឈើទាំង៤ស្ថិតនៅភូមិព្រែក សង្កាត់ស្ទឹងត្រែង តែតាមពិតមិនមែនជាសិប្បកម្មទេ គឺជារោងចក្រតែម្តង ហើយការចុះបង្ក្រាបនេះមិនទាន់ដឹងថា បានប៉ុន្មានម៉ែត្រគូបទេ ពីព្រោះនៅមានច្រើនសិប្បកម្មទៀតដែលនឹងចុះបង្ក្រាបជាបន្ត ៕