រាជធានីភ្នំពេញ ៖ នៅព្រឹកថ្ងៃទី២២ ធ្នូ ២០១០ មានការភ្ញាក់ផ្អើលដល់សមត្ថកិច្ចសឹងមួយចំហៀងរាជធានីភ្នំពេញ ដោយសារតែស្ត្រីម្នាក់ស្រែកថា ចោរលួចរថយន្តបាត់ហើយ! ភ្លាមៗនោះសមត្ថកិច្ចបានស្រែកតាមវិទ្យុទាក់ទង និងតាមប្រមាញ់ចាប់រថយន្តដែលស្ត្រីនោះស្រែកថា ចោរលួចៗ! ក៏ប៉ុន្តែខណៈពេលសមត្ថកិច្ចប្រមាញ់ចាប់បានរថយន្ត និងអ្នកបើកបរបានភ្លាមៗនៅឯជាយក្រុងភ្នំពេញ ទើបដឹងថា ពុំមែនជាករណីចោរលួចរថយន្តនោះទេ គឺជាករណីជំពាក់លុយទៅវិញ ។
នៅអធិការដ្ឋានខណ្ឌសែនសុខ បុរសជាអ្នកបើករថយន្តម៉ាកកាមរី ពណ៌ខ្មៅ ពាក់ស្លាកលេខ ភ្នំពេញ 2O-4681 បានឆ្លើយបដិសេធយ៉ាងដាច់អហង្ការចំពោះមុខសមត្ថកិច្ចថាខ្លួនពុំមែនជាចោរលួចរថយន្តន ោះទេ ហើយរថយន្តនេះជាកម្មសិទ្ធិរបស់ខ្លួនពិតប្រាកដ ។ ទោះបីយ៉ាងណា ក្រោយពីសមត្ថកិច្ចជំនាញសាកសួរប្រមាណ១៥នាទី ទើបដឹងថា ពុំមែនជាករណីលួចរថយន្តនោះទេ គឺជាករណីជំពាក់លុយតែប៉ុណ្ណោះ ដោយសារបុរសនេះចាញ់ល្បែងនៅកាស៊ីណូ ហើយយករថយន្តទៅបញ្ចាំជាមួយស្ត្រីរងគ្រោះពេលបានលុយហើយ ក៏បើករថយន្តរត់តែម្តង។
ផ្អែកតាមការបំភ្លឺរបស់ស្ត្រីរងគ្រោះឈ្មោះវង្ស ថៃយីន អាយុ២៨ឆ្នាំ ជាអ្នកទទួលបញ្ចាំរបស់របរ-ទ្រព្យសម្បត្តិផ្សេងៗ បានឱ្យដឹងថា ឈ្មោះហួរ ស៊ុន អាយុ៣៧ឆ្នាំ មានទីលំនៅក្នុងភូមិមានជ័យ សង្កាត់ស្ទឹងមានជ័យ ខណ្ឌមានជ័យ បានយករថយន្តកាមរី ពណ៌ខ្មៅ ស៊េរី២០០៣ ពាក់ស្លាកលេខ ភ្នំពេញ 2O-4681 ទៅបញ្ចាំខ្លួន (វង្ស ថៃយីន) ចំនួន៥.៧០០ដុល្លារ ដោយមានកិច្ចសន្យាដាក់បញ្ចាំត្រឹមត្រូវនៅកន្លែងកាស៊ីណូ រួមទាំងថតចំលងប័ណ្ណបើកបរ និងកាតគ្រីរថយន្តទៀតផង ។ ស្ត្រីដដែលនោះបានឱ្យដឹងថា ឈ្មោះហួរ ស៊ុន និយាយថា ដាក់បញ្ចាំរថយន្តតែ១ថ្ងៃ២ថ្ងៃទេនឹងយកវិញហើយ ប៉ុន្តែពេលបានលុយហើយ ស្រាប់តែបុរសនោះបើករថយន្តចេញទៅ ធ្វើឱ្យនាងស្រឡាំងកាំងក៏ស្រែកថា ចោរៗតែម្តង ៕