ក្រុងប៉ោយប៉ែត ៖ ជនសង្ស័យចែកចាយថ្នាំញៀនម្នាក់បានទំលាក់ថ្នាំចោល រត់យករួចខ្លួន ក្រោយពីដឹងថា មានអាជ្ញាធរ និងសមត្ថកិច្ចតាមប្រមាញ់ពីក្រោយ ប៉ុន្តែអស់លក្ខណ៍ពេលរត់អស់ខ្យល់ ក៏ព្រមប្រគល់ខ្លួនឱ្យចាប់តាមសំរួលកាលពីវេលាម៉ោង១២និង២០នាទីថ្ងៃត្រង់ ថ្ងៃទី២៦ ធ្នូ នៅកណ្តាលវាលស្រែ ចំណុចភូមិអូរជ្រៅ សង្កាត់និមិត្ត ។ ជនសង្ស័យដែលត្រូវអាជ្ញាធរ និងសមត្ថកិច្ចប៉ូលិសឃាត់ខ្លួននេះ ឈ្មោះធឿន រី ភេទប្រុស អាយុ២៩ឆ្នាំ ជាកម្មករលីស្រូវ មានទីលំនៅភូមិរកាត្រេត ឃុំកញ្ច្រៀច ស្រុកកញ្ច្រៀច ខេត្តព្រៃវែង ស្នាក់នៅផ្ទះឪពុកធម៌ក្នុងភូមិកើតហេតុ ។
តាមការឱ្យដឹងពីឈ្មោះលី សារឿន អាយុ៣៧ឆ្នាំ អនុប្រធានភូមិអូរជ្រៅ បានប្រាប់ថា ជនសង្ស័យរូបនេះ មុនធ្វើការឃាត់ខ្លួន គឺបានព្យាយាមរត់កាត់វាលស្រែ ពេលដឹងថា មានការដេញតាមពីក្រោយដោយប៉ូលិស និងអាជ្ញាធរនោះ ក៏ទំលាក់ថ្នាំញៀនចោល ដើម្បីបំបិទភស្តុតាង តែក៏មិនរួចខ្លួន ។ ឈ្មោះសារឿន បន្តថា ក្រោយពេលចាប់បានលោក និងមេក្រុមក៏បានប្រគល់ជនសង្ស័យទៅឱ្យប៉ូលិសតែម្តង ។ ជនសង្ស័យពេលចាប់បានពុំមានឃើញថ្នាំញៀនទេ លុះតែប៉ូលិសបណ្តើរឱ្យទៅរកទើបគេប្រាប់ ហើយក៏ប្រទះឃើញលាក់ក្នុងកូនថង់តូចញាត់ចូលក្នុងកញ្ចប់បារី មានចំនួន១០គ្រាប់ ប្រភេទយ៉ាម៉ា ពណ៌ផ្កាឈូក ។ ជនសង្ស័យ និងវត្ថុតាងត្រូវបានបញ្ជូនទៅកាន់អធិការនគរបាលស្រុកអូរជ្រៅ ។
លោក ស ឆុង អធិការនគរបាលស្រុកអូរជ្រៅ បានប្រាប់ឱ្យដឹងថា យោងតាមការសួរនាំពីជនសង្ស័យ បានឆ្លើយថា ថ្នាំញៀនទាំងនោះខ្លួនយកមកពីក្រុងប៉ោយប៉ែតដោយគោលបំណងចែកចាយក្នុងភូមិ ។ ផ្អែកលើការសួរនាំជនសង្ស័យក៏បានប្រាប់ថា ថ្នាំទាំងនេះត្រូវឈ្មោះចាន់ ឌឿន ភេទប្រុស អាយុ៥៧ឆ្នាំ នៅភូមិនិមិត្ត២ សង្កាត់និមិត្ត ជាអ្នកឱ្យលុយទៅទិញយកមកចែកចាយ ។ ចំពោះឈ្មោះចាន់ ឌឿន ដែលរងការឆ្លើយដាក់ពីជនសង្ស័យ ពេលនេះកំពុងស្ថិតក្នុងការស្រាវជ្រាវ និងតាមដានយ៉ាងហ្មត់ចត់ពីសមត្ថកិច្ច ដើម្បីរកប្រភពច្បាស់ការ ៕