រាជធានីភ្នំពេញ ៖ បុរសជនជាតិថៃម្នាក់បានប្រកាច់ស្លាប់នៅក្នុងបន្ទប់ផ្ទះជួលក្រុមទី១០ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ កាលពីវេលាម៉ោង៧និង៣០នាទីយប់ថ្ងៃទី២៧ ធ្នូ បន្ទាប់ពីធ្វើដំណើរទៅរកសង្សាររបស់ខ្លួន ប៉ុន្តែមិនបានជួបនាង ។ ការស្លាប់បាត់បង់ជីវិតរបស់បុរសជនជាតិថៃនេះ គេសង្ស័យថា ដោយសារតែផឹកថ្នាំពុល ពីព្រោះមុនពេលស្លាប់គេឃើញជនជាតិថៃរូបនេះផឹកទឹកពណ៌ខៀវ នៅក្នុងដបទឹកបរិសុទ្ធ ។ ទោះបីជាយ៉ាងណា សមត្ថកិច្ចជំនាញកំពុងសហការជាមួយមន្ត្រីស្ថានទូតស្រាវជ្រាវពីការស្លាប់នេះ ។
ជនជាតិថៃដែលស្លាប់នេះ ឈ្មោះប៊ុន សយ នឿងផាន់ អាយុ៣៧ឆ្នាំ មានស្រុកកំណើតនៅប្រទេសថៃ ។ តាមប្រភពព័ត៌មានឱ្យដឹងថា នៅវេលាម៉ោង១១និង៣០នាទីព្រឹកថ្ងៃទី២៧ ធ្នូ ជនជាតិថៃរូបនេះ រួមទាំងមិត្តភក្តិជាអ្នកបកប្រែខ្មែរម្នាក់បានធ្វើដំណើរទៅចំណុចផ្ទះជួលនៅក្នុងភូមិខាងល ើ ក្នុងគោលបំណងសួររកសង្សារជាជនជាតិវៀតណាមឈ្មោះថាច់ ធីលីម អាយុ២០ឆ្នាំ ។ ការសួរនាំនោះត្រូវស្ត្រីជាម្តាយរបស់សង្សារប្រាប់ថាមិនឃើញត្រឡប់មកផ្ទះវិញ ទេ ។ ខណៈនោះម្តាយរបស់នាងថាច់ ធីលីម ក៏បានស្តីបន្ទោសថានាំកូនស្រីរបស់គាត់ទៅបាត់រយៈពេលកន្លះខែហើយ ស្រាប់តែមកសួរនាំរកកូនស្រីរបស់គាត់ តើឱ្យគាត់ទៅរកនៅឯណា?
បន្ទាប់ពីសួរនាំរកសង្សាររួចមកជនជាតិថៃរូបនោះ រួមទាំងអ្នកបកប្រែក៏ធ្វើដំណើរត្រឡប់ទៅវិញបាត់ទៅ ។ លុះនៅវេលាម៉ោង៥ល្ងាចថ្ងៃទី២៧ ខែធ្នូ ក៏បានត្រឡប់មកផ្ទះម្តាយសង្សាររបស់គេវិញ និងបានអង្គុយលេងក្នុងបន្ទប់ដោយកាន់ដបទឹកបរិសុទ្ធមានទឹកពណ៌ខៀវក្រឡុកផឹក ព្រមទាំងមានកំប៉ុងជ័រមានម្សៅពណ៌ខៀវផងដែរ ហើយក្រោយមកគេក៏ស្លាប់នៅវេលាម៉ោង៧និង៣០នាទីយប់នោះទៅ ៕