ខេត្តកំពង់ចាម ៖ ក្រុមមន្ត្រីនៃមន្ទីរវប្បធម៌និងវិចិត្រសិល្បៈខេត្ត បានទទួលយកវត្ថុបុរាណជាថ្លាងធ្វើអំពីស្ពាន់មានទំងន់២៤គីឡូក្រាមពីការិយាល័យព្រហ្មទណ្ឌកំរិតធ្ងន់ខេត្ តនាព្រឹកថ្ងៃទី២៩ ធ្នូ ២០១០ ក្រោយពីបានរក្សាទុកមួយរយៈពេលកន្លងមក ដោយរឹបអូសពីក្រុមអ្នកជីករកវត្ថុអេតចាយនៅស្រុកកងមាស ។ លោកវរសេនីយ៍ត្រីសាន សុភា ប្រធានការិយាល័យព្រហ្មទណ្ឌកំរិតធ្ងន់ខេត្តប្រាប់ថា វត្ថុបុរាណនេះត្រូវនគរបាលស្រុកកងមាសដកហូត ពីក្រុមអ្នកដើរជីកអេតចាយចំនួន៥នាក់នៅភូមិពាមក្នុង ឃុំព្រែកក្របៅ ស្រុកកងមាស កាលពីវេលា ម៉ោង៦និង៥០នាទីល្ងាចថ្ងៃទី២ ធ្នូ ។
ការជីកប្រទះឃើញវត្ថុបុរាណនេះនៅទីទួលមួយមានចំងាយប្រហែល១គីឡូម៉ែត្រពីភូមិ ពាមក្នុងបង្កឲ្យមានការភា្ញក់ផ្អើលជាខ្លាំងដោយល្បីថា ជីកបានកំណប់ដ៏មានតំលៃ។ នគរបាលប៉ុសិ៍្តរដ្ឋបាលឃុំព្រែកក្របៅ និងនគរបាលស្រុកបានទៅទីនោះភា្លមព្រោះខ្លាចហិង្សាផ្ទុះឡើងដោយសារដណ្តើមយកកំណប់។ ក្រោយមកបានស្ងប់ស្ងាត់ទៅវិញបន្ទាប់ពីបានដឹងថា របស់ដែលជីកបានជាថ្លាងស្ពាន់ ។ លោកអនុសេនីយ៍ឯកហែម ស៊ីថុន អធិការរងនគរបាលស្រុកកងមាសបានប្រាប់ថា ដំបូងលោកនាយប៉ុស្តិ៍រដ្ឋបាលឃុំព្រែកក្របៅរាយការណ៍ទៅលោកវរសេនីយ៍ត្រីសូ សារិទ្ធ អធិការនគរបាលស្រុកថា ប្រជាពលរដ្ឋម្នាក់ឈ្មោះអ៊ាង ស្រ៊ាង ភេទប្រុស អាយុ៣៣ឆ្នាំ បានជីករកដែកអេតចាយប៉ះចំកំណប់ធ្វើឲ្យអ្នកស្រុកភ្ញាក់ផ្អើលតាំងពីម៉ោង២រសៀលរហូតដល់ជិតម៉ោង៧យប់ថ្ងៃ ទី២ធ្នូ ។ ក្រោយពីបានទទួលបញ្ជាពីលោកអធិការស្រុកមករូបលោកបានដឹកនាំកំលាំងក្រោមឱវាទទៅកន្លែងជីកបាននោះ តែតាមពិតមិនមានកំណប់មាសទេ គឺថ្លាងបុរាណ១ធ្វើអំពីស្ពាន់ដុះស្នឹម និងដាច់មាត់ផ្នែកខាងលើអស់១ដុំ។ នៅទីនោះមានប្រជាពលរដ្ឋប្រុសស្រីប្រមាណជាង១០នាក់ប៉ុណ្ណោះឈរមើល។ ថ្លាងនេះមានមុខកាត់ទំហំ០,៥៧ម៉ែត្រ កំពស់០,៤០ម៉ែត្រ ទំងន់២៤គីឡូក្រាមត្រូវបានគេលើកដាក់នៅលើមាត់រណ្តៅ ហើយដកហូតយកទៅរក្សាទុកនៅអធិការដ្ឋាននគរបាលស្រុកកងមាសជាបណ្តោះអាសន្ន ។
លោកវរសេនីយ៍ត្រី សាន សុភា ប្រធានការិយាល័យព្រហ្មទណ្ឌកំរិតធ្ងន់ខេត្តប្រាប់ថា មន្ត្រីនៃមន្ទីរវប្បធម៌ និងវិចិត្រសិល្បៈខេត្តដែលទៅទទួលអះអាងថា ថ្លាងនេះគេហៅថា កុលាលភាជន៍នៅក្នុងសតវត្សទី១៥ ។ តាមអ្នកស្រុកតំណាលតៗគ្នាថា មានសំពៅ១គ្រឿងបានបើកមកដល់ភូមិពាមក្នុង ឃុំព្រែកក្របៅ ស្រុកកងមាសបានជួបខ្យល់ព្យុះធ្វើឲ្យសំពៅឃ្លេងឃ្លោងរកកល់នឹងលិច ។ ពេលនោះអ្នកនៅលើសំពៅបានលើករបស់របរមួយចំនួនបោះចូលទៅក្នុងទឹក ។ បន្ទាប់ពីសំពៅបន្តដំណើរទៅមុខទៀតមិនបានប៉ុន្មានផងក៏លិចនៅត្រង់កណ្តាលបឹងធំសព្វថ្ងៃនេះដែលមានផ្ទៃទឹកធ ំល្វឹងល្វើយ ។ អ្នកស្រុកឱ្យដឹងថា ក្នុងអំឡុងឆ្នាំ១៩៨០ ប្រជាពលរដ្ឋចេញទៅនេសាទកណ្តាលបឹងបានប្រទះឃើញដងទង់របស់សំពៅនោះ ។ ត្រង់កន្លែងដែលប្រជាពលរដ្ឋជីកឃើញវត្ថុបុរាណនេះអាចមានច្រើនទៀត ដូច្នេះសូមស្ថាប័នជំនាញស្រាវជ្រាវបន្ថែម និងការពារកុំឲ្យជនខិលខូចណាចូលទៅគាស់កាយទីនោះ ៕