ខេត្តស្ទឹងត្រែង ៖ នៅព្រឹកថ្ងៃទី២៤ ធ្នូ សមត្ថកិច្ចនគរបាលព្រហ្មទណ្ឌកំរិតស្រាលនៃស្នងការដ្ឋានខេត្តបានប្រគល់ម៉ូតូដែលចោរលួច យកទៅលក់នៅខេត្តក្រចេះជូនម្ចាស់ដើមវិញ ។ តាមពត៌មានបានឱ្យដឹងថា កាលពីថ្ងៃទី២០ ធ្នូ ម្ចាស់ ម៉ូតូបានទៅចូលរួមពិធីមង្គលការមួយរហូតដល់យប់ជ្រៅទើបត្រឡប់មកផ្ទះវិញ ដោយស្ថិតក្នុងសភាពស្រវឹង ហើយពេលមកដល់ផ្ទះបានហៅប្រពន្ធឱ្យបើកទ្វារ តែប្រពន្ធមិនបានបើកឱ្យឡើយ ពេលនោះបុរសជាម្ចាស់ម៉ូតូបានដេកខាងក្រៅផ្ទះជាមួយម៉ូតូ ហើយកូនសោក៏ជាប់នឹងម៉ូតូ ។ ម្យ៉ាងទៀតដោយសារស្រវឹង និងលង់លក់ក្នុងដំណេកផង ទើបជនសង្ស័យឆ្លៀតឱកាសលួចម៉ូតូជិះសំដៅមកលក់នៅខេត្តក្រចេះតែម្តង ។
លោកវរសេនីយត្រីយ៍បែន វ៉ា នាយរងការិយាល័យព្រហ្មទណ្ឌកំរិតស្រាលបានឱ្យដឹងថា កាលពីវេលាម៉ោង៤ទៀបភ្លឺថ្ងៃទី២១ ធ្នូ ជន សង្ស័យឈ្មោះតូច ចយ បានធ្វើសកម្មភាពលួច ម៉ូតូសេ១២៥មួយគ្រឿង ពណ៌ខ្មៅ ស៊េរីឆ្នាំ២០១០ ដែលជាកម្មសិទ្ធិរបស់ឈ្មោះមីន ធីសាមី អាយុ២៨ឆ្នាំ ជាមន្រ្តីសុរិយោដីខេត្ត មានទីលំនៅភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង ។ ចំណែកជនសង្ស័យឈ្មោះតូច ចយ មានអាយុ ២៣ឆ្នាំ មុខរបរជាងម៉ាស៊ីន រស់នៅ ភូមិលើ សង្កាត់ស្រះឫស្សី ក្រុងស្ទឹងត្រែង ។ លោកបែន វ៉ា បានបន្តទៀតថា ជនសង្ស័យ បានត្រូវសមត្ថកិច្ចប៉ូលិសខេត្តក្រចេះចាប់ឃាត់ខ្លួននៅស្រុកព្រែកប្រសព្វ កាលពីថ្ងៃទី២២ ធ្នូ បន្ទាប់ពីបានដឹងនិងកំណត់ មុខសញ្ញារួចមក ។ បច្ចុប្បន្ន ជនសង្ស័យត្រូវបានបញ្ជូនទៅសាលាដំបូងខេត្តស្ទឹងត្រែងដើម្បីចាត់ការតាមផ្លូវច្បាប់ ចំណែកម៉ូតូបានប្រគល់ឱ្យម្ចាស់វិញ ៕