ក្រុងប៉ោយប៉ែត ៖ រថយន្តយោធាពាក់ស្លាកលេខរាជការ មួយគ្រឿង បានបើកលឿន ក្រឡាប់ធ្លាក់ស្នាមភ្លោះ ខណៈអ្នកបើកបរស្រវឹង ធ្លាក់ភ្នែក ក្រោយចេញពីច្រៀងខារ៉ាអូខេ យីហោត្រចៀកកាំ នៅក្រុងប៉ោយប៉ែត កាលពីវេលាម៉ោង៥និង៣០នាទីល្ងាចថ្ងៃទី១៨ ធ្នូ ២០១០ នៅចំណុចផ្លូវបត់ចូលផ្លូវ៥០ម៉ែត្រ ស្ថិតក្នុងភូមិកូនដំរី សង្កាត់និមិត្ត បណ្តាលឱ្យមន្ត្រីយោធា និងប៉ូលិស៣នាក់ សន្លប់នៅក្នុងរថយន្ត កុំតែបានប្រជាពលរដ្ឋគាស់ទ្វារជួយទាន់ ប្រហែលជាត្រូវស្លាប់ ។ រថយន្តក្រឡាប់នេះម៉ាកកាមរី ពាក់ស្លាកលេខ រាជការ ៤៥៩៨ ចង្កូតស្តាំ ស៊េរី១៩៩១ ពណ៌ស្លាបក្អែក បើកបរដោយឈ្មោះស៊ុំ សុគន្ធ ជាយោធាសឹករង ស្រុកម៉ាឡៃ និង២នាក់ទៀតជាមន្ត្រីប៉ូលិស រួមដំណើរ១-ឈ្មោះគង់ ខៀន អាយុ៥១ឆ្នាំ នាយរងប៉ុស្តិ៍ម៉ាឡៃ និង២-ឈ្មោះហ៊ាន សួរ អាយុ៤២ឆ្នាំ ជាមន្ត្រីប៉ូលិសប៉ុស្តិ៍ម៉ាឡៃដែរ ។
រថយន្តបានក្រឡាប់ចូលស្នាមភ្លោះត្រូវបានអ្នកស្រុកដែលលក់សាំង និងអ្នកចាប់ត្រី ព្រមទាំងអ្នកលក់គ្រឿងទេស ពិសេសសន្តិសុខរបស់កាស៊ីណូហូលីដេ ដែលប្រចាំការនៅដើមច្រកចូលផ្លូវ៥០ម៉ែត្រនោះឃើញ ក៏នាំគ្នាហក់ទឹកចូលទៅជួយគាស់ទ្វារឡាន ដើម្បីទាញយកមនុស្សចេញមកក្រៅ ព្រោះខ្លាចពួកគេស្លាប់ ដោយឈ្លក់ទឹក ឬលង់ទឹក ។ នៅកន្លែងកើតហេតុគេពិនិត្យឃើញរថយន្តផ្ងារកង់ឡើងលើដំបូល ចុះក្រោមលិចក្នុងស្នាមភ្លោះដែលមានទឹកជ្រៅគួរសម ។ ក្រុមអ្នកជួយសង្គ្រោះបាននាំគ្នាទាញបញ្ឈរ ទើបកង់ចុះក្រោមវិញ ប៉ុន្តែដោយទឹកជ្រៅត្រូវលិចបាត់ឃើញតែដំបូលរថយន្តលឹមៗតែប៉ុណ្ណោះ ៕