ខេត្តកណ្តាល ៖ រថយន្តដឹកទំនិញលើសកំណត់ជិត១០០គ្រឿង ដែលធ្វើចរាចរណ៍តាមផ្លូវជាតិលេខ២១B ទៅកាន់ស្រុកកោះធំ (ច្រកទ្វារជ្រៃធំ) ព្រំប្រទល់កម្ពុជា-វៀតណាមត្រូវបានមន្ទីរសាធារណការខេត្តឃាត់មិនឱ្យធ្វើចរាចរណ៍ ឡើយ ដោយសារនៅផ្លូវជាតិលេខ២១B នោះមានស្ពានទ្រុឌទ្រោមជាច្រើនកន្លែងមិនអាចទ្រទំងន់រថយន្តដឹកលើសចំណុះទាំងនោះបាន ។ រថយន្តដែលអាចធ្វើចរាចរណ៍បាន គឺកំណត់ឱ្យផ្ទុកទំនិញត្រឹមតែ១៥តោនប៉ុណ្ណោះ ហើយបើរថយន្តណាផ្ទុកលើសចំណុះ គឺត្រូវតែសាងទំនិញទុកត្រឹមការកំណត់ជាមុនសិន ទើបអាចធ្វើចរាចរណ៍បាន ។ នេះជាការកំណត់យ៉ាងតឹងរ៉ឹងមួយ បន្ទាប់ពីរថយន្តដឹកស្រូវមួយគ្រឿងបានបើកឆ្លងកាត់ស្ពានទ្រុឌទ្រោមលេខ២៤ ស្ថិតនៅឃុំកោះធំ បណ្តាលឱ្យបាក់ក្តារស្ពានជាប់រថយន្តលើស្ពានអស់រយៈពេលជាង២ម៉ោង ធ្វើឱ្យកកស្ទះចរាចរណ៍ កាលពីវេលាម៉ោង១១និង៣០នាទីព្រឹក ថ្ងៃទី២៥ ធ្នូ កន្លងមកនេះ ។
ប៉ុន្តែក្រោយពីរថយន្តនោះត្រូវបានអូសចេញរួច ខាងសាធារណការក៏បានធ្វើការជួសជុលស្ពាននោះឡើងវិញផងដែរ ។ ការកំណត់ទំងន់យ៉ាងតឹងរ៉ឹងនេះបានធ្វើឡើងស្របពេលដែលឈ្មួញកំពុងសំរុកដឹកស្រូវទៅលក់ន ៅស្រុកកោះធំ ក្នុងមួយថ្ងៃៗមិនតិចជាង៥០រថយន្តឡើយ ។ គ្រាន់តែនៅថ្ងៃទី១៩ ធ្នូ គេសង្កេតឃើញមានរថយន្តដឹកស្រូវមិនតិចជាង១០គ្រឿងទេ ដែលត្រូវបានហាមឃាត់ និងឱ្យសាងរំលែកបន្ត ដើម្បីធ្វើចរាចរណ៍បានទៅដល់គោលដៅច្រកទ្វារជ្រៃធំ ។ រថយន្តដឹកលើសការកំណត់រាប់រយគ្រឿងនោះត្រូវបានគេឃាត់ឱ្យឈប់នៅឃុំរកាខ្ពស់ ស្រុកស្អាង បន្តគ្នាលើផ្លូវជាតិលេខ២១B ដែលជាកន្លែងពិនិត្យទំងន់រថយន្ត ។
មន្ត្រីសាធារណការខេត្តកណ្តាលបានឱ្យដឹងថា នៅតាមផ្លូវជាតិលេខ២១B មានស្ពានចំនួន៧៨កន្លែង ហើយភាគច្រើនទ្រុឌទ្រោម ក្នុងនោះស្ពានដែលទ្រុឌទ្រោមខ្លាំងជាងគេមានចំនួន៤ ដែលពីមុនខាងមន្ត្រីមានការយល់យោគខ្លះចំពោះម្ចាស់រថយន្តដែលដឹកលើសចំណុះពីការកំណត់ បន្តិចបន្តួច ។ ប៉ុន្តែឥឡូវនេះគឺលែងយោគយល់ទៀតហើយ គឺកំណត់ឱ្យផ្ទុកត្រឹមតែ១៥តោនជាអតិបរមាប៉ុណ្ណោះ ទាំងនេះក៏ដោយសារមានស្ពានទ្រុឌទ្រោមច្រើន ។
ក្រុមឈ្មួញរកស៊ីដឹកទំនិញតាមផ្លូវជាតិលេខ២១B និយាយថា ផ្លូវនេះជាផ្លូវសេដ្ឋកិច្ចមួយយ៉ាងសំខាន់ក្នុងការនាំចេញផលិតផលកសិកម្មរបស់កសិករទៅ លក់នៅព្រំដែនកម្ពុជា-វៀតណាម ហើយទំនិញពីប្រទេសវៀតណាម ក៏នាំចូលស្រុកខ្មែរតាមផ្លូវនេះវិញផងដែរ ។ ប៉ុន្តែការនាំទំនិញចេញ-ចូលជួបបញ្ហាលំបាកដោយសារមានស្ពានទ្រុឌទ្រោមច្រើន មិនអាចដឹកទំនិញតាមរថយន្តធំៗបានទេ ។ គេមានការកត់សំគាល់ថា ចាប់ពីដើមរហូតមកដល់ចុងខែធ្នូនេះ មានរថយន្តដឹកស្រូវ ពោត សណ្តែត សំរុកដឹកតាមផ្លូវជាតិលេខ២១B ទៅច្រកទ្វារជ្រៃធំ មួយថ្ងៃប្រហែល៥០រថយន្ត ឯណោះ ហើយបើតាមការឱ្យដឹងពីក្រុមឈ្មួញទំនិញដែលដឹកចេញទៅច្រកជ្រៃធំភាគច្រើន គឺជាផលិតផលកសិកម្មដែលប្រមូលទិញមកពីខេត្តផ្សេងៗ ៕