ខេត្តបន្ទាយមានជ័យ ៖ បុរសចំណាស់ម្នាក់ត្រូវប៉ូលិសស្រុកអូរជ្រៅបង្ក្រាបជាក់ស្តែងកាលពីវេលាម៉ោង១០ព្រឹកថ្ងៃទី ២៥ ធ្នូ ឆ្នាំ២០១០ នៅភូមិសិលាខ្មែរ ឃុំអូរបីជាន់ ស្រុកអូរជ្រៅ ពីបទចែកចាយគ្រឿងញៀន ។ ជនសង្ស័យត្រូវប៉ូលិសស្រុកអូរជ្រៅឃាត់ខ្លួននោះ ឈ្មោះប៊ិត សារី ភេទប្រុស អាយុ៥០ឆ្នាំ នៅភូមិ-ឃុំកើតហេតុខាងលើ ។ ជាមួយនឹងការចាប់ឃាត់ខ្លួននេះ សមត្ថកិច្ចដកហូតបានថ្នាំញៀនប្រភេទគ្រាប់ ពណ៌ក្រហម មានអក្សរ WY លើគ្រាប់ថ្នាំម្ខាងចំនួន៥១គ្រាប់ ។
តាមប្រភពពីប៉ូលិសបានឱ្យដឹងថា ក្រោយការសួរនាំ បុរសសង្ស័យរូបនេះបានសារភាពថា ខ្លួនពិតជាធ្វើសកម្មភាពចែកចាយថ្នាំញៀនប្រាកដមែន ដោយទទួលចែកចាយពីគេទិញមកក្នុង១គ្រាប់តំលៃ៨.៥០០រៀល លក់ចេញតំលៃ១០.០០០រៀល ។ ការចែកចាយនេះរូបគេបានធ្វើសកម្មភាពយូរខែមកហើយ ។ លោកវរសេនីយ៍ត្រី ស ឆុង អធិការនគរបាលស្រុកអូរជ្រៅ បានឱ្យដឹងថា បុរសជាប់ចោទឈ្មោះប៊ិត សារី ជាមុខសញ្ញាចាស់ ដែលកំលាំងរបស់លោកបានធ្វើការស្រាវជ្រាវស៊ើបអង្កេតជាយូរមកហើយ ទើបឈានដល់ការចាប់ឃាត់ខ្លួនជាក់ស្តែង ខណៈកំពុងចែកចាយថ្នាំញៀននៅមុខផ្ទះរបស់ខ្លួន ។
បច្ចុប្បន្នជនសង្ស័យរួមទាំងវត្ថុតាងបញ្ជូនទៅការិយាល័យប្រឆាំងគ្រឿងញៀន ដើម្បីចាត់ការបន្តតាមនីតិវិធី ។ លោកវរសេនីយ៍ឯកពូន សានិត ស្នងការរងជាប្រធានការិយាល័យកណ្តាលនគរបាលយុត្តិធម៌បានបញ្ជាក់ថា ជនសង្ស័យរួមទាំងវត្ថុតាង ការិយាល័យជំនាញកំពុងរៀបចំសំណុំរឿងបញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់ ៕