រាជធានីភ្នំពេញ ថ្ងៃទី១៨ ខែធ្នូ ឆ្នាំ២០១០ ៖ វេជ្ជបណ្ឌិតមកពីមន្ទីរពេទ្យ Changi General Hospital (CGH) នៃប្រទេសសិង្ហបុរីបានធ្វើបទបង្ហាញមួយក្រោមប្រធានបទស្តីពីការបង្ការជំងឺមហារីកថ្ លើម (មហារីកកោសិកាថ្លើម Hepatocellular Carcinoma) និងការ ព្យាបាលដោយប្រើបច្ចេកវិទ្យាទំនើបចុងក្រោយបង្អស់ នៅក្នុងសិក្ខាសាលាសុខភាពមួួយដែលបានប្រព្រឹត្តទៅនៅសណ្ឋាគារអាំងទែរកុងទីណង់តាល់ ។ ការិយាល័យតំណាង SingMed ប្រចាំនៅប្រទេសកម្ពុជា និងមន្ទីរពេទ្យ CGH ដែលជាសមាជិកមួយរបស់ SingMed បានរៀបចំសិក្ខាសាលាសុខភាពនេះឡើង ក្នុងគោលបំណងដើម្បីជាការឆ្លើយតបទៅនឹងអត្រារីករាលដាលខ្ពស់នៃជំងឺថ្លើម លំពែង និងប្រមាត់នៅប្រទេសកម្ពុជា ។ តាមរយៈសិក្ខាសាលាសុខភាពនេះ ក្រុមវេជ្ជបណ្ឌិតមានបំណងអប់រំសាធារណជនឱ្យយល់ដឹងអំពីមូលហេតុ កត្តាគ្រោះថ្នាក់ បណ្តុំរោគសញ្ញា ការបង្ការ និងព្យាបាលជំងឺមហារីកថ្លើម ។ ទន្ទឹមនឹងនេះដែរ ក្រុមវេជ្ជបណ្ឌិតបានចែករំលែកព័ត៌មានអំពីរបៀបដែលអាចជួយឱ្យអ្នកជំងឺមហារីកថ្លើមមានឱកាស រស់រានមានជីវិតជាបន្ត ក្រោមការថែទាំពីក្រុមវេជ្ជបណ្ឌិតពហុឯកទេស ។
សាស្ត្រាចារ្យ Teo Eng Kiong ជាអ្នកផ្តល់ប្រឹក្សាជាន់ខ្ពស់ ជាប្រធានផ្នែកជំងឺក្រពះ ពោះវៀន និងជាប្រធានសមាគមជំងឺក្រពះ ពោះវៀននៃប្រទេសសិង្ហបុរី បានមានប្រសាសន៍ថា «ជំងឺមហារីកថ្លើមគឺជាជំងឺមួយប្រភេទដែលអាចព្យាបាលឱ្យជាសះស្បើយក្នុងអត្រាខ្ពស់ ប៉ុន្តែយើងចាំបាច់ត្រូវពិនិត្យរុករកដុំសាច់ដុះឱ្យបានទាន់ពេលវេលា ។ ប្រសិនបើយើងរកឃើញដុំសាច់ដុះមិនទាន់ពេលវេលា នោះជាធម្មតា ការព្យាបាលឱ្យជាសះស្បើយក៏មានកំរិតទាបដែរ ។ មានជំរើសជាច្រើនក្នុងការព្យាបាលជំងឺមហារីកថ្លើម ដូចជា ការវះកាត់ថ្លើមចោល ការបណ្តុះថ្លើម និងការបាញ់កាំភ្លើងកាំរស្មីរលកវិទ្យុ ។ ការព្យាបាលដែលផ្តល់ជូនមានច្រើនប្រភេទ អាស្រ័យទៅលើស្ថានភាពសុខភាពជាទូទៅ លក្ខណៈនៃថ្លើម និងទំហំដុំសាច់ដុះរបស់អ្នកជំងឺម្នាក់ៗ ។ អ្នកជំងឺមហារីកថ្លើមដំណាក់កាលចុងក្រោយនឹងទាមទារឱ្យប្រើប្រាស់វិធីពហុព្យាបាល ។
លោកវេជ្ជបណ្ឌិត Salleh Ibrahim គ្រូពេទ្យប្រឹក្សាផ្នែកវះកាត់ជាន់ខ្ពស់ និងជាប្រធានផ្នែកវះកាត់ថ្លើម លំពែង និងប្រមាត់បានបន្ថែមថា «វិធីសាស្ត្រវះកាត់ថ្លើមមានលក្ខណៈខុសៗគ្នា អាស្រ័យទៅតាមប្រភេទ និងទីតាំងរបស់ដុំសាច់ដុះ» ។ ការព្យាបាលជំងឺមហារីកថ្លើមរបស់យើងទទួលបានលទ្ធផលល្អណាស់ បើនិយាយដល់អត្រារស់រយៈពេលយូរ ព្រោះមានអ្នកជំងឺប្រមាណ៩០% ទទួលបានអត្រារស់រានមានជីវិតរយៈពេល២ឆ្នាំ ។ វិធីព្យាបាលជំងឺ និងបច្ចេកទេសវះកាត់់បែបពហុឯកទេសរបស់យើងគឺជាមូលហេតុចំបង ដែលជួយឱ្យយើង សំរេចបាននូវលទ្ធផលនេះ ។ អត្រាជំងឺ និងអត្រាមរណភាពនៅមន្ទីរពេទ្យយើងមានអត្រាទាប អាចប្រៀបធៀបទៅនឹងមជ្ឈមណ្ឌលHPB កំរិតខ្ពស់ផ្សេងៗជាច្រើននៅជុំវិញពិភពលោក ។
ព័ត៌មានអំពីមន្ទីរពេទ្យ Changi General Hospital និង SingMed សេវាថែទាំព្យាបាលជំងឺថ្លើម លំពែង និងប្រមាត់ គឺជាឯកទេសដ៏សំខាន់មួយនៅមន្ទីរពេទ្យ Changi General Hospital (CGH) ។ មន្ទីរពេទ្យយើងខ្ញុំមានក្រុមវេជ្្ជបណ្ឌិតឯកទេសប្រកបដោយការប្តេជ្ញាចិត្ត និងការយកចិត្តទុកដាក់ជាពិសេសទៅលើបញ្ហាខុសប្រក្រតីរបស់ថ្លើម លំពែង និងប្រមាត់ ដើម្បីគ្រប់គ្រងជំងឺថ្លើម លំពែង និងប្រមាត់ដែលមានភាពស្មុគស្មាញលំបាកខ្លាំងឱ្យមានប្រសិទ្ធភាព ។ CGH គឺជាមន្ទីរពេទ្យព្យាបាលជំងឺទូទៅដែលមានគ្រែសំរាកព្យាបាលចំនួន ៧៩០ នៅប្រទេសសិង្ហបុរី និងកំពុងផ្តល់សេវាវេជ្ជសាស្ត្រ២៥ មុខយ៉ាងទូលំទូលាយ ។ មន្ទីរពេទ្យនេះ គឺជាមន្ទីរពេទ្យគំរូមួយដែលជាពន្លឺនៃក្តីសង្ឃឹមលើការថែទាំវេជ្ជសាស្ត្រប្រកបដោយគុណភា ព និងជំនឿទុកចិត្តនៅប្រទេសសិង្ហបុរី ដោយទទួលបានការទទួលស្គាល់ពីគណៈកម្មាធិការអន្តរជាតិចំរុះ (JCI) ចាប់តាំងពីឆ្នាំ២០០៥មកម៉្លេះ ។ SingMed ប្រចាំកម្ពុជា តំណាងឱ្យគ្រឹះស្ថានថែទាំវេជ្ជសាស្ត្រសាធារណៈទាំងអស់នៅប្រទេសសិង្ហបុរី និងផ្តល់សេវាថែទាំកំរិតឧត្តមចំនួន៨០% នៃសេវាថែទាំកំរិតឧត្តមទាំងអស់នៅប្រទេសសិង្ហបុរី ៕