ខេត្តបាត់ដំបង ៖ បើទោះជាបនល្បែងស៊ីសងខុសច្បាប់បានស្ងប់ស្ងាត់ក្នុងរយៈពេលជិត១ខែកន្លងទៅនេះនៅក្ន ុងក្រុងបាត់ដំបង ដោយសារតែការបង្ក្រាបពីកម្លាំងនគរបាលនៃស្នងការដ្ឋានខេត្តក្តី ក៏មិនអាចបញ្ឈប់សកម្មភាពពួកអ្នកញៀននឹងល្បែងនេះបានឡើយ ។ ពួកគេនៅតែមានឱកាសប្រមូលម្តុំគ្នាដើម្បីបង្កើតជាវង់ល្បែងលេងនៅតាមបណ្តាស្រុកនានាមួយចំនួន តាមជាយក្រុងបាត់ដំបង ឯក្រុមសមត្ថកិច្ចក៏បានព្យាយាមបង្ក្រាបណាស់ដែរ ។#ជាក់ស្តែងកាលពីរសៀលថ្ងៃទី២៧ ធ្នូ កម្លាំងនគរបាលព្រហ្មទណ្ឌផ្នែកបង្ក្រាបបានសហការជាមួយកងកម្លាំងអន្តរាគមន៍ពិសេសនៃស្នងការដ្ឋ ានខេត្ត សរុបប្រហែលជាង១០នាក់ ដែលដឹកនាំដោយលោកមៀន ឡាយ ប្រធានការិយាល័យព្រហ្មទណ្ឌកំរិតស្រាល ចុះទៅបំបែកសំបុកអាចោរជើងមួយ មួយកន្លែងនៅភូមិភ្នំសំពៅកើត ឃុំភ្នំសំពៅ ស្រុកបាណន់ ដែលអាជ្ញាធរមូលដ្ឋានមិនអើពើនឹងបនល្បែងនេះទាល់តែសោះនាពេលកន្លងមក។
លោកមៀន ឡាយ បានឱ្យដឹងថា វង់ល្បែងនេះបានបោះតង់លេងក្នុងគុម្ពោតព្រៃនៅទីតាំងភូមិ-ឃុំខាងលើ ដែលសំងំលេងយូរខែមកហើយ ពេលកម្លាំងរបស់លោកចុះទៅឡោមព័ទ្ធ គេឃើញក្រុមអ្នកញៀនល្បែងប្រហែល២០នាក់ បានរត់ប្រសាចកាត់វាលស្រែ ប៉ុន្តែកម្លាំងរបស់លោកបានឃាត់ខ្លួនអ្នកលេងចំនួន៥នាក់ ដកហូតមេអាប៉ោងចំនួន៤គ្រាប់ ម៉ូតូចំនួន១០គ្រឿង និងសំភារល្បែងមួយចំនួនទៀតជាវត្ថុតាង ។ លោកមៀន ឡាយ បានបញ្ជាក់ថា វង់ល្បែងនេះហាក់ដូចជាមានការរៀបចំផែនការយ៉ាងប្រុងប្រយ័ត្នបំផុត ព្រោះមានទាំងអ្នកយាមកាមផងដែរ ដូច្នេះហើយទើបពួកគេរត់រួចពេលសមត្ថកិច្ចចុះទៅដល់ ។
ក្រុមអ្នកញៀនល្បែងដែលឃាត់ខ្លួនទាំង៥នាក់នេះរួមមាន១-ឈ្មោះទៀង ទ្រី អាយុ៦០ឆ្នាំ ២-ឈ្មោះឃឿន ឃឿត អាយុ៤៧ឆ្នាំ ៣-ឈ្មោះស៊ិន ជ័យ អាយុ៥៩ឆ្នាំ ៤-ឈ្មោះមឿន ម៉ែន អាយុ៤០ឆ្នាំ និង៥-ឈ្មោះញ៉ែម សាត អាយុ៦០ឆ្នាំ ។ ក្រុមអ្នកញៀនល្បែងស៊ីសងទាំង៥នាក់នេះ បាននិយាយថា ក្រុមអ្នកលេងទាំងអស់សុទ្ធតែនៅស្រុកផ្សេងៗគ្នា ។ ពួកគេបានណាត់គ្នាលេងនៅទីនោះ ព្រោះវង់ល្បែងធំៗនៅក្នុងក្រុងបាត់ដំបង ត្រូវបានបិទទ្វារ ដូច្នេះទើបក្រុមអ្នកញៀនល្បែងទាំងអស់ត្រូវស្វះស្វែងរកកន្លែងលេងនៅឱ្យឆ្ងាយពីភ្នែ កសមត្ថកិច្ចខេត្ត ប៉ុន្តែនៅតែមិនមានសេចក្តីសុខទៀត ។ ក្រុមអ្នកញៀនល្បែងទាំងនេះបានបញ្ជាក់ថា បច្ចុប្បន្នក្រុមអ្នកលេងធំៗបានប្រមូលគ្នាទៅលេងនៅស្រុកមោងឫស្សី ស្រុកគាស់ក្រឡ និងស្រុកសង្កែ ៕