ខេត្តតាកែវ ៖ ទោះបីជាជារឿយៗមន្ទីរសាធារណការ និងដឹកជញ្ជូនខេត្តខិតខំជួសជុលយ៉ាងណាក៏ដោយ ក៏មិនអាចជាប់បានយូរឡើយ សំរាប់ផ្លូវជាតិលេខ២ ដោយរថយន្តយីឌុបដឹកស្រូវលើសតោន ដែលមានដាក់អក្សរនៅលើកញ្ចក់រថយន្ត ដើម្បីឱ្យប៉ូលិសចរាចរ និងទីតាំងជញ្ជីងថ្លឹងរថយន្តមិនហ៊ានឃាត់រថយន្តរបស់គេ បើទោះបីរថយន្តទាំងអស់នោះដឹកលើសតោនក៏ដោយ ។ មន្ត្រីប៉ូលិសចរាចរដែលឈរជើងអនុវត្តច្បាប់តាមផ្លូវជាតិលេខ២ ក្នុងក្រុងដូនកែវ បានឱ្យដឹងថា នៅពេលស្រូវស្រុកយើងកំពុងត្រូវប៉ាន់លក់ទៅប្រទេសវៀតណាម ហើយរថយន្តដឹកស្រូវគ្រប់ប្រភេទកំពុងតែសំរុកដឹកយ៉ាងគគ្រឹកគ្រេងនោះ ក៏មានរថយន្តប្រភេទយីឌុបជាច្រើនគ្រឿងដោយសរសេរអក្សរបិទនៅលើកញ្ចក់គ្មានស្លាកលេខ បានកំញើញសមត្ថកិច្ចប៉ូលិសចរាចរយើងយ៉ាងចាស់ដៃបំផុត ដែលបញ្ហានេះសូមរាជរដ្ឋាភិបាលពិនិត្យមើលផង ។
មន្ត្រីចំរុះនៅទីតាំងជញ្ជីងថ្លឹងរថយន្តក្រុងដូនកែវ បានឱ្យកោះសន្តិភាពដឹងថា រថយន្តដែលមិនព្រមឈប់ឱ្យថ្លឹងរាល់ថ្ងៃនេះ តែងដឹកស្រូវលើសតោនបំផ្លាញផ្លូវជាតិលេខ២ ដោយគេសរសេរអក្សរដាក់នៅមាត់ទ្វាររថយន្តថា កងដឹកជញ្ជូន និងសរសេរអក្សរកាត់ដាក់លើកញ្ចក់មាន៤អង្គភាព L.M, HC, DH និង GGG រថយន្តខាងលើនេះ អ្នកបើកបរសុទ្ធតែស្លៀកពាក់ជាទាហានទាំងអស់ នៅពេលក្រុមចំរុះយើងឃាត់ពួកគេមិនឈប់ទេ ហើយអ្នកបើកបរនិយាយថា «រថយន្តពួកអញនៅទូទាំងប្រទេសមិនដែលឈប់ឱ្យអ្នកណាថ្លឹងទេ» ។ មន្ត្រីដដែលបានបន្តថា បញ្ហានេះយើងបានធ្វើរបាយការណ៍ជូនទៅលោកអភិបាលខេត្ត មន្ទីរ និងក្រសួងសាធារណការអស់ហើយ ម្យ៉ាងទៀត បើតាមដឹងគ្រប់រថយន្តយីឌុបខាងលើនេះ ដឹកស្រូវលើសទំងន់១០តោន ហើយទិដ្ឋភាពបែបនេះយើងបានត្រឹមតែរាយការណ៍ប៉ុណ្ណោះ ៕