ខេត្តកំពង់ចាម ៖ រថយន្តធុនធំ២គ្រឿងបានបុកគ្នាពេញទំហឹងកាលពីវេលាម៉ោងប្រហែល៣រំលងអធ្រាត្រថ្ងៃ ទី២៦ ធ្នូ ២០១០ នៅលើកំណាត់ផ្លូវជាតិលេខ៧ ក្នុងភូមិអង្គួញដី ឃុំក្រឡា ស្រុកកំពង់សៀម ធ្វើឱ្យរថយន្តទាំង២រងការខូចខាតយ៉ាងដំណំ និងអ្នកបើកបរម្នាក់រងរបួស ។ តាមមន្ត្រីនគរបាលចរាចរស្រុកកំពង់សៀម ប្រាប់ឱ្យដឹងថា ឧប្បត្តិហេតុនេះ បង្កដោយរថយន្តធំពាក់ស្លាកលេខតាកែវ 3A 0547 បើកបរដោយឈ្មោះប៊ុន លាន ភេទប្រុស រស់នៅភូមិស្រឡប់ ស្រុកត្បូងឃ្មុំ បានរត់គេចខ្លួនបាត់ស្រមោលបន្ទាប់ពីកើតហេតុ ។ នៅក្រោយកើតហេតុបានបន្តិច នគរបាលចរាចរស្រុកបានទៅដល់ ហើយបានជួយសំរួលចរាចរណ៍មិនឱ្យមានកកកស្ទះទេ ។ រហូតដល់ម៉ោង១០ព្រឹក ថ្ងៃទី២៦ ធ្នូ រថយន្តទាំង២គ្រឿងមិនទាន់អូសយកទៅកាន់អធិការដ្ឋាននគរបាលស្រុកនៅឡើយទេ ព្រោះតែការបុកគ្នានោះខ្លាំងពេក បណ្តាលឱ្យរថយន្តរងការខូចខាតយ៉ាងដំណំ ។
អ្នកបើកបររថយន្តឈ្មោះពេជ្រ សារិន ភេទ ប្រុស អាយុ២៩ឆ្នាំ ប្រាប់ថា រូបគេបើករថយន្តចំណុះ៨តោន ពាក់ស្លាកលេខ 3A 0693 ដឹកផ្លែម្ទេសចំនួន១៧តោន ចេញពីច្រកដូនរ័ត្ន ស្រុកមេមត់ ឆ្ពោះទៅកាន់ព្រំដែនខេត្តប៉ៃលិន ។ ពេលបើកទៅដល់ភូមិអង្គួញដី ត្រង់ផ្លូវកោង ស្រាប់តែមានរថយន្តធុនធំ១គ្រឿងបើកបញ្ច្រាសទិសគ្នាពីលិចមកកើតវ៉ារថយន្ត១គ្រឿង ជ្រុលមកបុករថយន្តរបស់គេយ៉ាងពេញទំហឹងតែម្តង ។ ពេលនោះរថយន្តរបស់គេខូចខាតកាប៊ីនខាងមុខក្រពឹតរួញ ។ គេបើកគេចមកស្តាំដៃ បើពុំនោះទេ នឹងរងគ្រោះថ្នាក់ដល់អាយុជីវិតមិនខាន ។ រូបគេគ្រាន់តែរងរបួសកែងដៃម្ខាងប៉ុណ្ណោះ ។ មន្ត្រីនគរបាលចរាចរបញ្ជាក់ថា រថយន្តបង្កបានរងការខូចខាតខ្លាំងជាងគេ ៕