ខេត្តកំពង់ចាម៖ ពីរនាក់ម្តាយកូនត្រូវបាន កំលាំងប៉ុស្តិ៍រដ្ឋបាលឃុំចំការអណ្តូង សហការ ជាមួយនឹងអធិការដ្ឋាននគរបាលស្រុកចំការលើ ធើ្វការឃាត់ខ្លួនទៅតាមដីការបស់សាលាដំបូងខេត្ត កាលពីវេលា ម៉ោង២រសៀល ថ្ងៃទី២១ធ្នូ ២០១០ ដល់លំនៅឋានតែម្តង ដោយជាប់ចោទពីបទប៉ុនប៉ងធ្វើមនុស្សឃាត ទៅលើអ្នកភូមិជាមួយគ្នា នាពេលកន្លងមក ជាហេតុធ្វើឱ្យកូនៗរបស់ស្រ្តីដែលត្រូវបានចាប់ខ្លួននោះស្រែកទ្រហោយំ និងតាមមកមើលម្តាយ ដល់អធិការដ្ឋានស្រុក ។ លោកអនុសេនីយ៍ឯក អ៊ិត ដារ៉ា អធិការនគរបាលស្រុកចំការលើបានប្រាប់កោះសន្តិភាពឱ្យដឹងថា ជនដែលត្រូវចាប់ខ្លួនទាំង២នាក់នោះកូនឈ្មោះនូ នីម ភេទប្រុស អាយុ១៩ឆ្នាំ និងម្តាយឈ្មោះ អុល សៀក អាយុ៤៧ឆ្នាំ រស់នៅភូមិ២២ ឃុំចំការអណ្តូង ស្រុកចំការលើ ។
លោកអធិការបានរំលឹកថា កាលពីថ្ងៃទី១៧ ឧសភា ២០០៥ នៅភូមិសូជ័យ ឃុំចំការអណ្តូងស្រុកចំការលើ មានករណីប៉ុនប៉ងធ្វើមនុស្សឃាតមួយបានកើតឡើងបង្កដោយឈ្មោះនីម បានប្រើពូថៅកាប់ទៅលើគូបដិបក្សឈ្មោះនៅ ណាល់ ភេទប្រុស អាយុ៣៥ឆ្នាំ បណ្តាលឱ្យរងរបួសធ្ងន់ឈាមហូរស្រោចពេញខ្លួនប្រាណរហូតដល់សន្លប់បាត់ស្មារតីត្រូវបានក្រុមសាច់ញាតិដឹកយ កទៅសង្រ្គោះនៅមន្ទីរពេទ្យ។ ឯជនដៃដល់រូបនេះបានរត់គេចខ្លួនបាត់មិនដឹងជាទៅរស់នៅ ទីកន្លែងណាទេ និងត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្តដើម្បីសុំដីកាតាមចាប់ខ្លួន ។ បន្ទាប់មកសាលាដំបូងខេត្តបានចេញដីកាបង្គាប់ឱ្យនាំខ្លួនពិរុទ្ធជនឈ្មោះនូ នីម និងម្តាយបង្កើតឈ្មោះសៀក ដោយលោកថោង អុល ចៅក្រមស៊ើបសួរចុះថ្ងៃទី១៦ កក្កដា ២០០៩ ។ តែជនទាំង២នាក់ម្តាយនិងកូននេះមិនបាននៅផ្ទះទេ គឺបានរត់គេចចេញពីមូលដ្ឋានមិនដឹងជាទៅរស់នៅទីណា ទោះបីជាបែបនេះក្តី សមត្ថកិច្ចបានតាមឃ្លាំមើលពួកគេជាប់ជានិច្ច ។ ថ្មីៗនេះបន្ទាប់ពីបានទទួលព័ត៌មានថា ជនជាប់ពិរុទ្ធទាំង២នាក់នេះបានចូលមករស់នៅភូមិ២២ ឃុំចំការអណ្តូងវិញ ទើបរូបលោក (អ៊ិត ដារ៉ា) ដឹកនាំលោកអធិការរងនគរបាលស្រុកចំនួន២រូបចុះទៅនាំខ្លួនពួកគេ នារសៀលថ្ងៃទី២១ ធ្នូ មកកាន់ស្នងការដ្ឋាននគរបាលខេត្តជាបន្ទាន់ ។
ទាក់ទិននឹងការចោទប្រកាន់រហូតឈានដល់តុលាការចេញដីកានាំខ្លួននេះ ពិរុទ្ធជនឈ្មោះនូ នីម បានឆ្លើយសារភាពថា មុនពេលកើតហេតុ៥ទៅ៦ថ្ងៃកូនសេះ១ក្បាលរបស់ខ្លួនបានដើរចូលទៅក្នុងបរិវេណផ្ទះរបស់ឈ្មោះណាល់ ដែលមានផ្ទះនៅទល់មុខគ្នា ពេលនោះឈ្មោះណាល់បានគប់សេះខ្លួនបណ្តាលឱ្យបាក់ជើងមុខផ្នែកខាងស្តាំ។ លុះក្រោយមកទៀតនាវេលាម៉ោងប្រហែល៧យប់មិនចាំថ្ងៃក្នុងខណៈពេលខ្លួនដើរចេញពីផ្ទះបងប្រុសស្ថិតនៅ ខាងជើងឆ្ពោះមកផ្ទះរបស់ខ្លួននៅខាងត្បូងជិតដល់ផ្ទះទៅហើយស្រាប់តែត្រូវឈ្មោះណាល់ប្រើកាំបិតផ្គ ាក់កាប់មកលើខ្លួនត្រូវចំ.កផ្នែកខាងឆ្វេងរយះហូរឈាមស្រោចខ្លួន ។ ពេលនោះខ្លួនបានស្ទុះទៅយកពូថៅពីក្នុងផ្ទះមកកាប់តបតទៅលើគូបដិបក្សវិញដោយមានការប្រវាយប្រតប់គ្នាទៅវ ិញទៅមកទៀតផងហើយខ្លួនក៏ត្រូវជនឈ្មោះណាល់នោះកាប់ត្រូវ១កាំបិតទៀតចំទ្រូង បណ្តាលឱ្យរងរបួសសន្លប់ទាំង២នាក់។ ពេលនោះខ្លួនត្រូវបានក្រុមសាច់ញាតិដឹកយកមកសង្រ្គោះនៅមន្ទីរពេទ្យបង្អែក ស្រុកជើងព្រៃ ។ ស្រ្តីជាម្តាយឈ្មោះ អុល សៀក បានឆ្លើយបដិសេធថា នាយប់ថ្ងៃកើតហេតុនោះគាត់មិនបានយករបស់អ្វីមួយវាយទៅលើជនរងគ្រោះឈ្មោះណាល់នោះទេ ប៉ុន្តែក្រោយមកបែរជាលេចឮថាមានគេបំរុងតាមសំលាប់គាត់ទៅវិញទើបប្រញាប់នាំកូនប្រុសមកសង្រ្គោះនៅមន្ទី រពេទ្យដោយមិនបានប្តឹងទៅសមត្ថកិច្ចទេ ៕