ខេត្តបន្ទាយមានជ័យ ៖ យ៉ាងហោចណាស់ក៏មានសិស្សសាលាចំនួន៣នាក់បានរងរបួសធ្ងន់ក្នុងឧប្បត្តិហេតុគ្រោះថ្នាក់ ចរាចរណ៍ដែលបានកើតឡើងនៅវេលាម៉ោង១និង២៣នាទីរសៀល ថ្ងៃទី២២ ធ្នូ ឆ្នាំ២០១០ នៅលើផ្លូវជាតិលេខ៦ ស្ថិតនៅក្នុងភូមិ១ សង្កាត់ព្រះពន្លា ក្រុងសិរីសោភ័ណ ។ មន្ត្រីនគរបាលចរាចរខេត្តបានឱ្យដឹងថា យុវសិស្សរងគ្រោះទាំង៣នាក់នោះ ១-ឈ្មោះមំ ស្រីនិច អាយុ១៨ឆ្នាំ នៅភូមិព្រៃឫស្សី សង្កាត់ព្រះពន្លា ក្រុងសិរីសោភ័ណ ជាអ្នកបើកបរម៉ូតូម៉ាកគ្លីកពណ៌សលាយស្លាទុំ ២-ឈ្មោះយុយ រីដា អាយុ១៧ឆ្នាំ និង៣-ឈ្មោះអ៊ុំ វីតា អាយុ១៥ឆ្នាំ ទាំង២នាក់ជាអ្នករួមដំណើររស់នៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ ។ ចំណែករថយន្តបង្កម៉ាកហៃឡេនឌ័រ ពណ៌ខ្មៅ ពាក់ស្លាកលេខភ្នំពេញ 2N-9561 បើកបរដោយឈ្មោះត្រឹង សម្បត្តិ ភេទប្រុស អាយុ៣០ឆ្នាំ មានទីលំនៅក្នុងខណ្ឌដូនពេញ រាជធានីភ្នំពេញ ។
លោកវរសេនីយ៍ទោ ឈឿម សុផុន នាយការិយាល័យចរាចរណ៍ជើងគោកខេត្តបានឱ្យដឹងថា មុនពេលកើតហេតុតាមសាក្សីបំភ្លឺប្រាប់សមត្ថកិច្ចថា រថយន្តបើកក្នុងទិសដៅពីជើងទៅត្បូងក្នុងល្បឿនលឿន ពេលមកដល់ចំណុចកើតហេតុរថយន្តនេះបានបើកវ៉ារថយន្តមួយគ្រឿងទៀត ដែលបើកស្របទិសគ្នា រីឯម៉ូតូបើកគេចរថយន្តមួយគ្រឿងដែលឈប់ចតនៅខាងស្តាំដៃក្នុងទិសដៅពីត្បូងទៅជើង បណ្តាលឱ្យរថយន្តបុកចំផ្នែកខាងឆ្វេងម៉ូតូពេញមួយទំហឹងធ្វើឱ្យយុវសិស្សទាំង៣នាក់ខ្ទ ាតប៉ើងទៅលើថ្នល់របួសដួលដេករដូករណែល ។
លោកនាយការិយាល័យចរាចរណ៍ខេត្តបានបន្តទៀតថា កត្តាដែលនាំឱ្យមានគ្រោះថ្នាក់ខាងលើ បណ្តាលមកពីអ្នកបើកបររថយន្តបើកក្នុងល្បឿនលឿនពេលមកដល់ទីប្រជុំជន ហើយបើកជែងមិនមើលឧបសគ្គខាងមុខ ឯអ្នកបើកបរម៉ូតូក៏បើកក្នុងល្បឿនលឿន ហើយមិនពាក់មួកសុវត្ថិភាពទៀតផង ។ បច្ចុប្បន្នរថយន្ត និងម៉ូតូត្រូវបានសមត្ថកិច្ចយកមករក្សាទុកនៅការិយាល័យចរាចរណ៍ខេត្តរង់ចាំធ្វើការដោះ ស្រាយ ។ បើតាមប្រភពព័ត៌មានចុងក្រោយពីសមត្ថកិច្ចឱ្យដឹងថា យុវសិស្សរងគ្រោះម្នាក់ឈ្មោះអ៊ុំ វីតា ត្រូវបានបញ្ជូនទៅព្យាបាលនៅមន្ទីរពេទ្យ Emergency ខេត្តបាត់ដំបង ៕