ខេត្តពោធិ៍សាត់់ ៖ ក្រុមរាត្រីចរចំនួន៤នាក់កាលពីយប់ថ្ងៃទី១៨ ធ្នូ ត្រូវបានប៉ូលិសស្រុកកណ្ដៀងធ្វើការឃាត់ខ្លួនសួរនាំដោយសង្សយ័ថាជាក្រុមទាក់ឆ្កែពេលយប់ ព្រោះមានសត្វឆ្កែមួយក្បាលនិងប្រដាប់ឆក់មួយគ្រឿងជាភស្តុតាង។ លោកអនុសេនីយ៍ឯកលីវ សេងហ៊ីម អធិការរងនគរបាលស្រុកកណ្ដៀងឱ្យដឹងថា បុរសជាប់សង្ស័យទាំង៤នាក់ ១-ឈ្មោះឈីន អាយុ២៩ឆ្នាំ នៅភូមិត្រាច ២-ឈ្មោះប៉ែន ធូ អាយុ២៩ឆ្នាំ នៅភូមិព្រៃស្រគុំ ៣-ឈ្មោះលឹម តាំងយូ អាយុ២៩ឆ្នាំ នៅភូមិបឹងឈូក និង៤-ឈ្មោះកៅ ម៉ាប់ នៅភូមិធ្លក ឃុំស្យា ស្រុកកណ្ដៀងទាំងអស់គ្នា។ សមត្ថកិច្ចបានឃាត់ខ្លួនពួកគេជាមួយវត្ថុតាងសត្វឆ្កែមួយក្បាល ប្រដាប់ឆក់ត្រីមួយគ្រឿង និងម៉ូតូជិះធ្វើសកម្មភាពចំនួន២គ្រឿងដែលមួយគ្រឿងម៉ាកគុប៩០ពណ៌សំបកឪឡឹក ពាក់ស្លាកលេខពោធិ៍សាត់ 1C-1003 និងមួយគ្រឿងទៀតម៉ាកស្មាស់រីវ៉ូពណ៌ក្រហមលាយស ពាក់ស្លាកលេខពោធិ៍សាត់ 1A-8314 ។
ទាក់ទិននឹងការឃាត់ខ្លួនជនសង្សយ័ទាំង៤នាក់នេះលោកអធិការរងឱ្យដឹងថា កាលពីវេលាម៉ោង៨យប់ថ្ងៃទី១៨ ធ្នូ ២០១០ ខណៈពេលនគរបាលប៉ុស្តិ៍ស្វាយលួង និងកំលាំងប្រជាការពារដើរល្បាតដល់ចំណុចភូមិរោងម៉ាស៊ីន ស្រាប់តែឃើញបុរសពីរនាក់ជិះម៉ូតូអោបសត្វឆ្កែមួយក្បាលក្នុងសភាពស្រវឹងស្រាហើយមានប្រដាប់ឆក់មួយគ្រឿងនៅលើ ម៉ូតូនោះទៀតផង។ ដោយមានការសង្សយ័សមត្ថកិច្ចយើងក៏ហៅឱ្យឈប់ដើម្បីសួរនាំទើបឈានទៅឃាត់ខ្លួនបក្សពួក២នាក់ទៀត។
នៅចំពោះមុខសមត្ថកិច្ចជនសង្ស័យឈ្មោះ ឈីន បានសារភាពថា នៅយប់ថ្ងៃទី១៨ ធ្នូ នោះខ្លួននិងបក្សពួក៣នាក់ខាងលើបាននាំគ្នាផឹកស៊ីនៅទំនប់ក្បាលហុងចារឹក ឃុំស្យារហូតដល់ម៉ោង៧និង៣០នាទីទើបនាំគ្នាបន្តដំណើរទៅច្រៀងខារ៉ាអូខេនៅហាងមួយម្ដុំភូមិតាស្ដី ឃុំវាល ដោយខ្លួនជិះម៉ូតូ២នាក់ប៉ែន ធូ ឯលឹម តាំងយូ ជិះជាមួយកៅ ម៉ាប់។ ពេលធ្វើដំណើរដល់ភូមិយស ឃុំកណ្ដៀង ខ្លួនបានឈប់ម៉ូតូនោមនៅទីនោះហើយឈ្មោះលឹម តាំងយូ និងកៅ ម៉ាប់ បានជិះទៅមុន។ខណៈពេលកំពុងឈរនោមនោះស្រាប់តែសត្វឆ្កែមួយក្បាលបានមកហិតជើងរបស់គេ។ ដោយឃើញសត្វឆ្កែនោះស្លូតខ្លួនក៏ចាប់អោបដាក់លើម៉ូតូជិះយកមកតែម្ដង។ ជនសង្ស័យរូបនោះបន្តទៀតថា ពេលមកដល់ត្រង់ចំណុចភូមិរោងម៉ាស៊ីន សត្វឆ្កែនោះរើខ្លាំងពេកខ្លួន និងប៉ែន ធូ ក៏ឈប់ម៉ូតូរួចវាយក្បាលឆ្កែ៣-៤ដំបងឱ្យវាស្រងល់ ស្រាប់តែពេលនោះសមត្ថកិច្ចបានហៅសួរនាំតែម្ដង។ ជនសង្ស័យរូបនោះបន្តទៀតថា សត្វឆ្កែនេះខ្លួនមិនបានប្រើប្រដាប់ឆក់ដើម្បីចាប់ទេហើយក៏គ្មានបំណងចាប់ដែរ ប៉ុន្តែដោយសារវាស្លូតពេកក៏ចាប់យកតែម្ដង។
លោកវរសេនីយ៍ត្រី ឈន រិទ្ធ អធិការនគរបាលស្រុកកណ្ដៀងឱ្យដឹងថា ជនសង្ស័យទាំង៤នាក់ខាងលើយើងនឹងបញ្ជូនទៅសាលាដំបូងខេត្តតែពីរនាក់ទេគឺឈ្មោះឈីន និងឈ្មោះប៉ែន ធូ ដែលជាអ្នកប្រព្រឹត្តផ្ទាល់ ឯពីរនាក់ទៀតគឺឈ្មោះលឹម តាំងយូ និងកៅ ម៉ាប់ មិនបានដឹងរឿងទេនឹងដោះលែងវិញ។ លោកបន្តទៀតថា សព្វថ្ងៃនេះអនុវត្តតាមបទបញ្ជារបស់លោកឧត្តមសេនីយ៍ត្រីសារុន ចាន់ធី ស្នងការនគរបាលខេត្តពោធិ៍សាត់លោកបានដាក់វិធានការយ៉ាងតឹងរ៉ឹងបំផុតដល់កំលាំងនគរបាលគ្រប់ប៉ុស្តិ៍ឱ្យសហការ ជាមួយកំលាំងប្រជាការពារតាមភូមិក្នុងការដើរល្បាតពេលយប់ ដើម្បីបង្ក្រាបចោរលួចចោរប្លន់ មុខសញ្ញាទាក់ឆ្កែ មុខសញ្ញាគ្រឿងញៀន និងមុខសញ្ញាក្មេងទំនើងជាដើម ៕