គេហទំព័រ MCOT កាលពីថ្ងៃទី២៦ ធ្នូ កន្លងមក បានផ្សាយថា ក្រុមសម្ព័ន្ធភាពប្រជាជនដើម្បីលទ្ធិប្រជាធិបតេយ្យ (PAD) ហៅក្រុមអាវលឿង កាលពីថ្ងៃទី២៦ ធ្នូ នេះបានធ្វើវេទិកាសាធារណៈមួយស្តីអំពីប្រាសាទព្រះវិហារ ។ វេទិកាសាធារណៈនោះរៀបចំឡើងនៅខេត្តស៊ីសាកេត ភាគឦសានប្រទេសថៃ ។#គេហទំព័របស់ថៃដដែលនេះឱ្យដឹងទៀតថា វេទិកានោះចូលរួមដោយក្រុមអាវលឿងជាង៥០០នាក់ ដឹកនាំដោយលោកចម្លង ស្រីមឿង និងលោក Pipop Thongchai ក្នុងគោលបំណងទាមទារឱ្យរដ្ឋាភិបាលលោកអាប់ភីស៊ីត វ៉េចាជីវ៉ា លុបចោលវិញនូវអនុស្សរណៈនៃការយោគយល់គ្នា (MOU) រវាងប្រទេសថៃ និងប្រទេសកម្ពុជា ដែលចុះហត្ថលេខាកាលពីឆ្នាំ២០០០ កន្លងមក ។#ក្នុងឱកាសនោះដែរ លោកចម្លងស្រីមឿង បានអំពាវនាវដល់ក្រុមអាវលឿងឱ្យប្រមូលផ្តុំគ្នាក្នុងទ្រង់ទ្រាយធំមួយនៅក្នុងទីក្រុងប ាងកក នាចុងខែមករាខាងមុខនេះ ដើម្បីទាមទារឱ្យរដ្ឋាភិបាលលោកអាប់ភីស៊ីត លុបចោល MOU នេះឱ្យខាងតែបាន ។#ក្រុមអាវលឿងបានព្យាយាមម្តងហើយម្តងទៀតទាមទារឱ្យរដ្ឋាភិបាលលុបចោល MOU ជាមួយប្រទេសកម្ពុជា ដោយអះអាងថា MOU នោះធ្វើឱ្យថៃបាត់បង់ទឹកដីរបស់ខ្លួន៕