ខេត្តកំពង់ធំ ៖ កាលពីរសៀលថ្ងៃទី២១ ធ្នូ នៅក្នុងភូមិសាស្ត្រស្រុកកំពង់ស្វាយមានករណីគ្រោះថ្នាក់ចរាចរណ៍ចំនួន២លើក បណ្តាលឱ្យស្លាប់មនុស្សម្នាក់ ដោយរថយន្តបុក និងរបួសធ្ងន់២នាក់ដោយជិះម៉ូតូទៅបុករទេះគោដឹកកណ្តាប់ស្រូវរហូតក្រឡាប់រទេះ ។ តាមរបាយការណ៍របស់សមត្ថកិច្ចស្រុកកំពង់ស្វាយ បានប្រាប់តាមទូរស័ព្ទឱ្យដឹងថា នៅថ្ងៃទី២១ ធ្នូ វេលាម៉ោង៥ និង២០នាទីល្ងាចនៅតាមផ្លូវលំក្រាលក្រួសក្រហមចំណុចភូមិឈើទាល ឃុំត្បែង មានកើតករណីគ្រោះថ្នាក់ចរាចរ១លើក បង្កឡើងដោយរថយន្តម៉ាកទីតាន់ ពណ៌ខៀវ ចំណុះ២តោនកន្លះ១គ្រឿង ពាក់ស្លាកលេខញ ០១៦០ ភព៣ បានជ្រុលល្បឿនទៅបុកក្មេងប្រុសម្នាក់ បណ្តាលឱ្យស្លាប់។ មុនពេលកើតហេតុ គេឃើញរថយន្តខាងលើ ដឹកស្រូវពេញបើកបរដោយឈ្មោះរិន រឹម ភេទប្រុស អាយុ២៤ឆ្នាំ រស់នៅភូមិព្រៃព្រាល (ក) ឃុំត្រពាំងប្ញស្សី ស្រុកកំពង់ស្វាយបើកបរធ្វើដំណើរក្នុងទិសដៅពីកើតទៅលិច ។ លុះមកដល់ចំណុចកើតហេតុ ស្រាប់តែមានក្មេងប្រលែងគ្នាលេង ហើយរត់ឆ្លងថ្នល់ធ្វើឱ្យអ្នកបើកបររថយន្តគេចមិនទាន់ ក៏ជ្រុលចង្កូតទៅបុកក្មេងប្រុសឈ្មោះឃន ស៊ីណែត អាយុ៥ឆ្នាំ រស់នៅភូមិ-ឃុំកើតហេតុខាងលើ បណ្តាលឱ្យបែកក្បាលស្លាប់ភ្លាមៗ នៅនឹងកន្លែងកើតហេតុ ហើយរថយន្តក៏ជ្រុលល្បឿនធ្លាក់ថ្នល់ក្រឡាប់តែម្តង ចំណែកអ្នកបើកបរបានរត់គេចខ្លួនបាត់ ។
លុះដល់វេលាម៉ោង៥និង៣០នាទីល្ងាចថ្ងៃដដែលនោះ នៅតាមផ្លូវជាតិលេខ៦ ចំណុចភូមិរូង ឃុំត្រពាំងប្ញស្សី ស្រុកកំពង់ស្វាយ មានកើតករណីគ្រោះថ្នាក់ចរាចរណ៍មួយករណីទៀត រវាងម៉ូតូ និងរទេះគោ បណ្តាលឱ្យរងរបួសធ្ងន់២នាក់ ។ មុនពេលកើតហេតុ គេឃើញឈ្មោះឃាន សុឃីម ភេទប្រុស អាយុ២៤ឆ្នាំ រស់នៅភូមិស្នោ ឃុំត្រពាំងប្ញស្សី ស្រុកកំពង់ស្វាយ បន្ទាប់ពីស៊ីផឹកស្រវឹង ហើយបានបើកបរម៉ូតូធុនសេ១០០កូរ៉េ ពណ៌ស្លាទុំ យ៉ាងលឿន ពីកើតទៅលិច ។ លុះមកដល់ចំណុចកើតហេតុ ក៏ជ្រុលល្បឿនទៅបុកពីក្រោយរទេះគោកំពុងបរដឹកកណ្តាប់ស្រូវយ៉ាងពេញទំហឹងបណ្តាលឱ្យសត្វគោផ្ អើលក្រឡាប់រទេះ ហើយជាន់លើអ្នកបរទេះឈ្មោះភន សុផាត ភេទ ប្រុស អាយុ១៨ឆ្នាំ រស់នៅភូមិ-ឃុំកើតហេតុបណ្តាលឱ្យរងរបួសធ្ងន់ធ្ងរ ។ ចំណែកអ្នកបើកបរម៉ូតូបង្កហេតុ ក៏រងរបួសធ្ងន់ដែរ ហើយត្រូវក្រុមគ្រួសារដឹកទៅសង្គ្រោះនៅមន្ទីរពេទ្យឯកជន ។ បច្ចុប្បន្នវត្ថុតាងម៉ូតូ និងរទេះ ត្រូវសមត្ថកិច្ចនាំមករក្សាទុកនៅអធិការដ្ឋាននគរបាលស្រុកកំពង់ស្វាយ ដើម្បីកសាងសំណុំរឿងចាត់ការតាមនីតិវិធី ៕