រដ្ឋមន្ត្រីក្រសួងការបរទេសថៃ លោកកាស៊ីតភិរម្យ បានជួបសវនាការជាមួយលោកហោ ណាហុង ឧបនាយករដ្ឋមន្ត្រី រដ្ឋមន្ត្រីក្រសួងការបរទេស នៅទីស្តីការក្រសួងការបរទេសកាលពីវេលាម៉ោង៨ព្រឹកថ្ងៃចន្ទ ទី២០ ធ្នូ ២០១០ ធ្វើឡើងនៅក្រោយមួយថ្ងៃបន្ទាប់ពីកម្ពុជា-ថៃ បានប្រារព្ធពិធីអបអរសាទរខួបអនុស្សាវរីយ៍លើកទី៦០នៃទំនាក់ទំនងការទូតរវាងប្រទេសទាំង ២នៅស្ថានទូតថៃប្រចាំកម្ពុជា កាលពីល្ងាចថ្ងៃអាទិត្យម្សិលមិញនេះ ។ លោកឧបនាយករដ្ឋមន្ត្រីហោ ណាំហុង បានស្នើទៅរដ្ឋាភិបាលថៃថា សូមឱ្យមានកិច្ចពិភាក្សាគ្នាឡើងវិញ ស្តីពីការធ្វើអាជីវកម្មរ៉ែ ប្រេង និងឧស្ម័ន ក្នុងដែនសមុទ្រនៃប្រទេសទាំង២ បើកិច្ចដំណើរការនេះកាន់តែឆាប់កាន់តែល្អ ។ ប៉ុន្តែលោកកាស៊ីត ភិរម្យ បានឆ្លើយតបថា ភាគីថៃសូមអញ្ជើញលោកឧបនាយករដ្ឋមន្ត្រីសុខ អាន ដែលទទួលខុសត្រូវចំពោះកិច្ចការនេះទៅពិភាក្សានៅក្រុងបាងកកវិញ ។ គួររំលឹកឡើងវិញថា កាលពីប្រមាណ១ឆ្នាំ កន្លងទៅនេះ ក្រុមហ៊ុនបារាំងតូតាល់ មានបំណងចាប់ផ្តើមរុករកប្រេងនៅលើដែនសមុទ្រ បន្ទាប់ពីរដ្ឋាភិបាលកម្ពុជាបានប្រគល់សិទ្ធិផ្តាច់មុខ ប៉ុន្តែត្រូវអាក់ខានវិញ ដោយភាគីថៃបង្កភាពចំរូងសំរាស ។
លោកឧបនាយករដ្ឋមន្ត្រីហោ ណាំហុង បានស្នើផងដែរ ទៅសភាថៃឱ្យអនុម័តកិច្ចព្រមព្រៀងព្រំដែនឱ្យបានឆាប់ និងស្នើសុំកុំឱ្យភាគីថៃប្រើអំពើហិង្សាលើប្រជាពលរដ្ឋខ្មែរ...គោរពសិទ្ធិមនុស្ស និងច្បាប់អន្តរជាតិ ។ លោកកាស៊ីត ភិរម្យ បានមានប្រសាសន៍ថា សភាថៃកំពុងពិនិត្យមើលកិច្ចព្រមព្រៀងនោះហើយ ប៉ុន្តែបើមិនជាប់ទាក់ទងនឹងមាត្រា១៩០ នៃរដ្ឋធម្មនុញ្ញថៃទេ រដ្ឋាភិបាលនឹងដោះស្រាយដោយខ្លួនឯង ដោយមានការតែងតាំងមន្ត្រីពិសេសមួយក្រុមសំរាប់ដោះស្រាយបញ្ហាព្រំដែន។ ឯបញ្ហាថា ភាគីថៃប្រើហិង្សាបាញ់សំលាប់ពលរដ្ឋខ្មែរ លោកកាស៊ីត ភិរម្យ បានសន្យាថានឹងពិភាក្សាគិតគូរពីរឿងនេះ ។ លោករដ្ឋមន្ត្រីការបរទេសថៃ កាស៊ីត ភិរម្យបានមកដល់ប្រទេសកម្ពុជាកាលពីវេលាម៉ោង១០ព្រឹកថ្ងៃទី១៩ ធ្នូ ដើម្បីចូលរួមក្នុងពិធីអបអរសាទរខួបឆ្នាំទី៦០ នៃទំនាក់ទំនងការទូតកម្ពុជា-ថៃ ។ តាមគំរោងលោកកាស៊ីត ភិរម្យ នឹងចូលគាល់ព្រះមហាក្សត្រខ្មែរ នរោត្តម សីហមុនី និងចូលជួបសំដែងការគួរសមជាមួយសម្តេចអគ្គមហាសេនាបតីតេជោហ៊ុន សែន ផងដែរ ។
គួរបញ្ជាក់ថា កិច្ចសហប្រតិបត្តិការទាំងផ្នែកសេដ្ឋកិច្ច និងការទូតរវាងប្រទេសកម្ពុជា-ថៃ បានចាប់ផ្តើមវិលទៅរកប្រក្រតីភាពឡើងវិញ ក្នុងរយៈពេលជិត២ខែមកនេះ គឺជាផ្លែផ្កានៃជំនួបរវាងប្រមុខរាជរដ្ឋាភិាលនៃប្រទេសទាំង២ សម្តេចតេជោ ហ៊ុន សែន និងលោកអាប់ភីស៊ីត វេចាជីវ៉ា ដែលបានជួបគ្នាជាច្រើនលើក នៅក្រោយវេទិកាប្រជុំលក្ខណៈតំបន់ និងពិភពលោក ដូចជានៅបុរីញូវយ៉ក សហរដ្ឋអាមេរិក ទីក្រុងប្រ៊ុចស៊ែល ប្រទេសបែលហ្ស៊ិក ហាណូយ ប្រទេសវៀតណាម និងក្នុងរាជធានីភ្នំពេញ កាលពីពេលថ្មីៗនេះ ។ ជាមួយនឹងទំនាក់ទំនងការទូតមានភាពប្រសើរឡើងវិញនោះ ប្រទេសទាំង២ក៏បានរៀបចំការប្រគំតន្ត្រី និងសំដែងសិល្បៈរួមគ្នា ដែលបានធ្វើឡើងក្នុងទីក្រុងបាងកក កាលពីពាក់កណ្តាលខែវិច្ឆិកា និងក្នុងរាជធានីភ្នំពេញ កាលពីរសៀលថ្ងៃទី១៨ ធ្នូ កន្លងមកនេះ ផងដែរ ៕