ខេត្តក្រចេះ ៖ លោកខាំ ភឿន អភិបាលខេត្ត និងជាទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមជាមួយមន្ត្រីជំនាញរបស់មន្ទីរសាធារណការខេត្ត អាជ្ញាធរមូលដ្ឋានបានអញ្ជើញជួបសំណេះសំណាលជាមួយប្រជាពលរដ្ឋ និងពិនិត្យមើល ការស្ថាបនាកំណាត់ផ្លូវ២៧៩ ស្ថិតក្នុងឃុំឫស្សីកែវ ស្រុកព្រែកប្រសព្វ កាលពីរសៀលថ្ងៃទី២៧ ធ្នូ កន្លងទៅ។ តាមការបញ្ជាក់ពីមន្ត្រីជំនាញរបស់មន្ទីរសាធារណការ និងដឹកជញ្ជូនខេត្តឱ្យដឹងថា ផ្លូវលេខ២៧៩ (ផ្លូវលេខ២២៣ចាស់) គឺជាបណ្តាញផ្លូវលំ ដែលតភ្ជាប់ពីខេត្តក្រចេះទៅខេត្តកំពង់ចាម តាមបណ្តោយខាងលិចដងទន្លេមេគង្គ ឆ្លងកាត់ស្រុកព្រែកប្រសព្វ រហូតដល់ឃុំវឌ្ឍនៈ ស្រុកសំបូរ ប្រវែងប្រមាណជា១៣៦,៩គីឡូម៉ែត្រ ក្នុងទឹកដីខេត្តចាប់ពីស្ពានបឹងរៃ ឃុំឫស្សីកែវ ដល់ឃុំវឌ្ឍនៈ មានប្រវែងប្រមាណជា៧៥គីឡូម៉ែត្រ។ កាលពីមុនផ្លូវនេះត្រូវបានសាងសង់ជាប្រភេទផ្លូវលំក្រាលក្រួសក្រហម ដែលមានទទឹង៤ម៉ែត្រ ដោយមន្ទីរអភិវឌ្ឍន៍ជនបទខេត្ត សំរាប់ការប្រើប្រាស់របស់ប្រជាពលរដ្ឋទូទៅដែលស្ថិតនៅខាងលិចទន្លេមេគង្គ។
ដោយសង្កេតឃើញថា បច្ចុប្បន្នកំណាត់ផ្លូវលេខ២៧៩ នេះបានរងការខូចខាតស្ទើរតែទាំងស្រុង និងទឹកជំនន់លិចលើទ្រូងផ្លូវនារដូវវស្សាកាត់ផ្តាច់ការធ្វើចរាចរណ៍ទៅមក។ មន្ត្រីដដែលបញ្ជាក់ថា ឥឡូវផ្លូវនេះត្រូវបានស្ថាបនាសាងសង់ដោយមន្ទីរសាធារណការ និងដឹកជញ្ជូនខេត្តមានប្រវែងផ្លូវ៤គីឡូម៉ែត្រ ក្នុងនោះចាក់ដីលើកកំពស់តួថ្នល់ប្រវែង៤គីឡូម៉ែត្រ ចាក់កៅស៊ូប្រភេទ DBST ប្រវែង១គីឡូម៉ែត្រ ទទឹង៦ម៉ែត្រ ក្រាលក្រូសក្រហមប្រវែង៣គីឡូម៉ែត្រ ទទឹង៨គីឡូម៉ែត្រ និងដាក់ស្លាកសញ្ញាចំនួន២២ស្លាក ហើយចាប់ផ្តើមស្ថាបនានៅថ្ងៃទី១៦ ធ្នូ និងបញ្ចប់ នៅថ្ងៃទី២០ មីនា ឆ្នាំ២០១១ ដែលត្រូវប្រើប្រាស់ថវិកាជំពូក៦១ របស់សាលាខេត្ត ផែនការឆ្នាំ២០១០ ចំនួន២.២៨០.០០០.០០០រៀល (ពីរពាន់ពីររយប៉ែតសិបលានរៀល)។
មានប្រសាសន៍នាឱកាសនោះ លោកខាំ ភឿន អភិបាលខេត្តបានសំណូមពរដល់ប្រជាពលរដ្ឋ មេត្តាយោគយល់អធ្យាស្រ័យចំពោះការឈូសឆាយពង្រីកចិញ្ចើមផ្លូវ ដែលបានប៉ះពាល់ដល់ទ្រព្យសម្បត្តិ និងផលដំណាំផ្សេងៗរបស់បងប្អូន និងបន្តរួមសហការជាមួយអាជ្ញាធរ និងក្រុមការងារបច្ចេកទេស ដើម្បីឱ្យដំណើរការស្ថាបនាសាងសង់កំណាត់ផ្លូវនេះទទួលបានគុណភាព និងឆាប់រហ័សដែលជាផលប្រយោជន៍របស់យើងទាំងអស់គ្នាក៏ដូចជាសង្គមជាតិទាំងមូលផងដែរ ក្នុងការចូលរួមចំណែកជាមួយរាជរដ្ឋាភិបាលពិសេស ស្របតាមអនុសាសន៍របស់សម្តេចតេជោ ហ៊ុន សែន ដែលតែងតែមានប្រសាសន៍ថា អភិវឌ្ឍន៍ត្រើយខាងកើតកុំភ្លេចអើតខាងលិច ប៉ុន្តែឥឡូវនេះសម្តេចមិនត្រឹមតែអើតមើលខាងលិចទេ គឺសម្តេចបានថែមទាំងចាប់ផ្តើមស្ថាបនាផ្លូវថ្នល់នេះទៀតផង។ លោកបានផ្តាំផ្ញើ និងជំរុញដល់មន្ទីរសាធារណការត្រូវតែពិនិត្យឱ្យបានដិតដល់ទាំងសកម្មភាពអនុវត្ត និងលក្ខណៈបច្ចេកទេសឱ្យបានត្រឹមត្រូវ ដើម្បីធានាទាំងគុណភាព និងបរិមាណសំដៅធ្វើយា៉ងណាក្នុងការប្រើប្រាស់មាននិរន្តរភាពយូរអង្វែង ៕
