រាជធានីភ្នំពេញ ៖ យុវជនម្នាក់បានរងរបួសជើងឆ្វេងដោយសារជនមិនស្គាល់អត្តសញ្ញាណម្នាក់បាញ់នៅមុខលំនៅឋាន ។ ហេតុការណ៍នេះកើតឡើងនៅភូមិដើមស្លែង សង្កាត់ច្បារអំពៅ២ ខណ្ឌមានជ័យ កាលពីវេលាម៉ោង៨យប់ ថ្ងៃទី១៨ ធ្នូ។ យុវជនរងរបួសឈ្មោះ ហោ គឹមហ៊ាង អាយុ១៨ឆ្នាំ។ ក្រោយពេលរងរបួសឈ្មោះហោ គឹមហ៊ាង ត្រូវក្រុមគ្រួសារបញ្ជូនទៅព្យាបាលនៅ មន្ទីរពេទ្យ។ ករណីផ្ទុះអាវុធនោះសមត្ថកិច្ចមូលដ្ឋានព្យាយាមលាក់លៀមព័ត៌មាន។ តាមប្រភពព័ត៌មានពុំទាន់ចាត់ទុកជាផ្លូវការនៅឡើយឱ្យដឹងថា កន្លងមកឈ្មោះហោ គឹមហ៊ាង ធ្លាប់មានទំនាក់ទំនងស្នេហាជាមួយនារីម្នាក់ ហើយបានខ្ចីខ្សែ.ករបស់នាងយកទៅលក់ចាយទៀតផង។
ទោះបីជាភាគីខាងស្រីព្យាយាមលួងលោមសុំយកខ្សែ.កវិញក្តីក៏ឈ្មោះហោ គឹមហ៊ាង មិនព្រមឱ្យដែរ។ ប្រភពព័ត៌មានដដែលឱ្យដឹងថានៅ មុនពេលផ្ទុះអាវុធនោះបងប្អូនរបស់នារីជាអតីតសង្សារឈ្មោះហោ គឹមហ៊ាង បានទៅផ្ទះរបស់គេ ដើម្បីសួរនាំយកខ្សែ.កវិញ។ ពេលនោះកើតមានការប្រទូស្តរ៉ាយគ្នារហូតឈានដល់ផ្ទុះអាវុធមួយគ្រាប់ត្រូវចំឈ្មោះហោ គឹមហ៊ាង តែម្តង។ ករណីនេះសមត្ថកិច្ចមូលដ្ឋានកំពុងស្រាវជ្រាវតែពុំដឹងថា អាចស្វែងរកចាប់ខ្លួនខ្មាន់កាំភ្លើងយកទៅផ្តន្ទាទោសតាមច្បាប់បានឬអត់ទេ៕