ខេត្តក្រចេះ ៖ អ្នកធ្វើដំណើរជាពិសេសភ្ញៀវទេសចរជាតិ និងអន្តរជាតិនិយាយថា រមណីយដ្ឋានទេសចរណ៍ប្រវត្តិសាស្ត្រវត្តវិហារសសរ១០០ ដែលមានចំងាយជាង៣០គីឡូម៉ែត្រ ពីក្រុងក្រចេះ ហាក់បីដូចជានៅឆ្ងាយដោយត្រូវចំណាយពេលទៅមកយូរ ដោយសារស្ថានភាពផ្លូវខូចខាត និងមានលក្ខណៈតូចចង្អៀត ។ វត្តវិហារសសរ១០០ ស្ថិតនៅក្នុងស្រុកសំបូរ មានចំងាយ៣៦គីឡូម៉ែត្រពីក្រុងក្រចេះ ហើយក៏ត្រូវបានគេចាត់ទុកថា ជាតំបន់ទេសចរណ៍ប្រវត្តិសាស្ត្រដ៏ល្អមួយរបស់ខេត្តផងដែរ ទាំងលើសោភ័ណភាពនៃទេសភាពជួរដងទន្លេមេគង្គ ជាពិសេសលើជំនឿផ្នែកព្រះពុទ្ធសាសនា ។
នៅលើចំងាយផ្លូវក្រាលកៅស៊ូ៣៦គីឡូម៉ែត្រការធ្វើដំណើរទៅមករបស់ភ្ញៀវជាតិ និងអន្តរជាតិមិនថា តាមមធ្យោបាយអ្វីទេ គឺត្រូវចំណាយពេលយ៉ាងយូរ ដោយសារកំណាត់ផ្លូវនេះកំពុងតែខូចខាតយ៉ាងធ្ងន់ធ្ងរ ហើយមានរយៈពេលជាយូរឆ្នាំមកហើយ ជាពិសេសមានលក្ខណៈតូចចង្អៀត បើកបរចៀសគ្នាស្ទើរមិនរួច ហើយក៏មិនទាន់ឃើញអាជ្ញាធរថ្នាក់ណាមួយមានវិធានការជួសជុលនៅពេលណានោះទេ។ កំណាត់ផ្លូវក្រាលកៅស៊ូដែលកំពុងតែខូចខាតយ៉ាងធ្ងន់ធ្ងរនេះ គឺកើតជាជង្ហុកតូចធំលៀន ថ្មធំៗចេញមកក្រៅ និងមានចំងាយតែជាង៥គីឡូម៉ែត្រប៉ុណ្ណោះចាប់ពីភូមិស្រែឃឿន ឃុំសំបូរ រហូតដល់ទីប្រជុំជនស្រុកសំបូរ ។
តាមមន្ត្រីអាជ្ញាធរស្រុកមួយរូបបានឱ្យដឹងថា ផ្លូវក្រាលកៅស៊ូពីទីរួមខេត្ត មកកាន់ស្រុកសំបូរនេះ គឺបានស្ថាបនាតាំងពីឆ្នាំ១៩៩៥មកម៉្លេះ ដែលផ្លូវនេះជាគំរោងកសាងរបស់ខេត្ត ហើយដោយសារតែមិនមានការថែទាំឱ្យបានដិតដល់ធ្វើឱ្យផ្លូវនេះត្រូវខូចខាតពីមួយឆ្នាំទៅ មួយឆ្នាំ ទោះបីជាធ្លាប់មានការជួសជុលខ្លះៗដោយមន្ទីរគមនាគមន៍ខេត្តក្តី ។ ប្រភពដដែលបានឱ្យដឹងទៀតថា ការជួសជុលទាំងនោះ គឺស្ថិតនៅក្នុងគំរោងដោយធ្វើជាដំណាក់កាល តែក្នុងចំងាយផ្លូវជាង៥គីឡូម៉ែត្រ ដែលស្ទើរតែបើកបរទៅមុខមិនកើតនេះ ហាក់បីដូចជាមិនមាននៅក្នុងគំរោងជួសជុលទេ ដោយសារជាច្រើនឆ្នាំមកហើយមិនឃើញមានការជួសជុលឡើយ គឺជួសជុលតែផ្លូវដែលមានសភាពខូចតិចតួចទៅវិញ ។
មិនថា តែអ្នកធ្វើដំណើរ ឬភ្ញៀវទេសចរទេ សូម្បីតែប្រជាពលរដ្ឋរស់នៅស្រុកសំបូរក៏និយាយដែរថា មកទល់នឹងពេលនេះ ពីស្រុកសំបូរទៅកាន់ទីរួមខេត្ត ហាក់បីដូចជានៅឆ្ងាយយ៉ាងខ្លាំងដោយសារស្ថានភាពផ្លូវខូចខាតម៉្លោះហើយពួកគាត់មួយចំនួន ធំជាពិសេសអ្នកជំងឺ និងស្ត្រីមានផ្ទៃពោះត្រូវសំរេចចិត្តមិនមកមន្ទីរពេទ្យទេ ដោយសុខចិត្តព្យាបាលនៅតាមពេទ្យឯកជនក្នុងស្រុកវិញ ។ លោកហេង ស៊ីថា អភិបាលស្រុកសំបូរ បានមានប្រសាសន៍ថា លោកទទួលស្គាល់ពីការពិបាកធ្វើដំណើរលើកំណាត់ផ្លូវដែលខូចខាតមានចំងាយជាង៥គីឡូម៉ែត្រ នេះ ហើយសាលាស្រុកក៏ធ្លាប់បានធ្វើលិខិតស្នើសុំទៅដល់ថ្នាក់ខេត្តជាច្រើនលើកច្រើនសាដែរ តាំងពីលោកអភិបាលស្រុកចាស់ រហូតដល់រូបលោកបច្ចុប្បន្ន តែការស្នើសុំនេះគឺរហូតមកទល់នឹងបច្ចុប្បន្ននៅមិនទាន់មានការឆ្លើយតបយ៉ាងណាន ៅឡើយ ។ លោកអភិបាលស្រុកបានឱ្យដឹងទៀតថា កំណាត់ផ្លូវកៅស៊ូនេះ ស្ថិតនៅក្រោមគំរោង និងថវិការបស់ខេត្ត ហើយកន្លងមកគឺ ខេត្តបានសំរេចអាទិភាពឱ្យមន្ទីរជំនាញជួសជុលហេដ្ឋារចនាសម្ព័ន្ធដែលសំខាន់ៗក្នុងខេត្តជា មុន រីឯគំរោងជួសជុលផ្លូវមកកាន់តំបន់ទេសចរណ៍ប្រវត្តិសាស្ត្រវត្តវិហារសសរ១០០ ហាក់បីដូចជាមិនមានទេ រហូតមកទល់នឹងពេលនេះ ៕
