រាជធានីភ្នំពេញ ៖ ស្ត្រីជាគ្រូបង្រៀនភាសាចិន ត្រូវស្លាប់បាត់បង់ជីវិត និងស្ត្រីម្នាក់ទៀតរងរបួសធ្ងន់ នៅក្នុងគ្រោះថ្នាក់ចរាចរណ៍កាលពីវេលាម៉ោង១១និង៣០នាទីព្រឹកថ្ងៃទី២១ ធ្នូ នៅជើងភ្នំប្រសិទ្ធិ៍ ស្ថិតនៅព្រៃពង្រ សង្កាត់ពញាពន់ ខណ្ឌសែនសុខ រាជធានីភ្នំពេញ ។ គ្រោះថ្នាក់ចរាចរណ៍នេះបង្កឡើងដោយរថយន្តដឹកដីម៉ាកហ៊ីណូ ពណ៌ស មានស្លាកលេខ ភ្នំពេញ 3A-5281 បើកបរដោយឈ្មោះសៅ ចំរើន ភេទប្រុស អាយុ២៦ឆ្នាំ មានទីលំនៅភូមិច្រកក្រសាំង ឃុំទួលព្រិច ស្រុកអង្គស្នួល ខេត្តកណ្តាល បុកជាមួយម៉ូតូម៉ាកគុប ជិះដោយស្ត្រីទាំង២នាក់ ។
នារីរងគ្រោះស្លាប់បាត់បង់ជីវិតត្រូវសមត្ថកិច្ចឱ្យដឹងថា ឈ្មោះសាន អ៊ា អាយុ២២ឆ្នាំ ជាគ្រូបង្រៀនភាសាចិន មានទីលំនៅភូមិដីថ្មី សង្កាត់ភ្នំពេញថ្មី ខណ្ឌសែនសុខ បានស្លាប់បាត់ជីវិត នៅតាមផ្លូវពេលដែលរថយន្តសាមុយដឹកយកទៅសង្គ្រោះនៅមន្ទីរពេទ្យកាល់ម៉ែត។ ចំណែកនារីរងរបួសឈ្មោះសុខ ស្រីទូច អាយុ២៥ឆ្នាំ ជាគ្រូបង្រៀនភាសា មានទីលំនៅភូមិចំការឪឡឹក សង្កាត់កាកាប ខណ្ឌដង្កោ រាជធានីភ្នំពេញ កំពុងសំរាកព្យាបាលនៅមន្ទីរពេទ្យកាល់ម៉ែត្រ ៕