រាជធានីភ្នំពេញ ៖ ផលិតផលក្លែងក្លាយដែលភាគច្រើនជាស្រានាំចូលពីបរទេសមានតម្លៃថ្លៃៗ រួមទាំងសំភារសំរាប់ផលិតស្រានេះផង ត្រូវបានប៉ូលិសសេដ្ឋកិច្ចរាជធានីភ្នំពេញ ដឹកតាមរថយន្តកូរ៉េចំនួន២គ្រឿងយកទៅកំទេចចោល កាលពីវេលាម៉ោង៣និង៣០នាទីរសៀលថ្ងៃទី២១ ខែធ្នូ នៅទីលានសំណល់វេជ្ជសាស្ត្រស្ថិតក្នុងសង្កាត់ជើងឯក ខណ្ឌដង្កោ ។ លោកឧត្តមសេនីយ៍ត្រីប៉ែន រ័ត្ន ស្នងការរងប៉ូលិសរាជធានីភ្នំពេញ ដែលបានដឹកនាំកំលាំងសមត្ថកិច្ចដុតកំទេចស្រាក្លែងក្លាយនេះបានថ្លែងថា ក្រោយពីបញ្ចប់កិច្ចប្រតិបត្តិការស៊ើបអង្កេតកន្លែងផលិតស្រាក្លែងក្លាយជាច្រើនកន្លែងនៅក ្នុងរាជធានីអស់រយៈពេល១ខែ និងចាប់បញ្ជូនអ្នកផលិតស្រាទៅតុលាការ បច្ចុប្បន្ន ជនទាំងនេះត្រូវជាប់ឃុំឃាំងនៅពន្ធនាគារព្រៃស។ នេះក៏ជាសារមួយសំរាប់ជនដទៃទៀត ដែលមានបំណងប្រព្រឹត្តបទល្មើសមិនគប្បីធ្វើទេ គួរតែប្រកបរបរសុចរិតវិញជាការប្រសើរ ។ ដោយឡែកនៅថ្ងៃនេះ សាលាដំបូងរាជធានីបានសំរេចឱ្យស្នងការដ្ឋានរាជធានីដុតកំទេចស្រានិងសំភារផលិតស្រានេះ ។
លោកឧត្តមសេនីយ៍ត្រី ប៉ែន រ័ត្ន បានមានប្រសាសន៍បន្តថា ស្រាក្លែងក្លាយនេះដែលបានយកស្លាកយីហោ BLACK LABEL, RED LABEL, CROWN99 និង Johnnie Walker សរុបចំនួន៣.០០៩ដប ត្រូវបានដុតបំផ្លាញចោល។ ជាមួយនេះក៏បានដុតបំផ្លាញចោលនូវឧបករណ៍គ្រីបគំរបដបចំនួន៣ ស្ទីកគ័រប្រើប្រាស់រួចរបស់ក្រុមហ៊ុនអែតវូត ចំនួន១បន្ទះ តែមប្រិ៍ពន្ធគយ សំរាប់បិទគំរបដបចំនួន៧៦សន្លឹក ប្រអប់គំរបដប សំបកដប និងឆ្នុកមួយចំនួនសំរាប់ប្រើប្រាស់ក្នុងការផលិតស្រាក្លែងក្លាយទាំងនេះ ។ ចំពោះអ្នកផលិតស្រាក្លែងក្លាយម្នាក់ឈ្មោះម៉ែន សុខ ភេទស្រី អាយុ៤០ឆ្នាំ ត្រូវតុលាការសំរេចដាក់ពន្ធនាគារចំនួន៦ខែ តែអនុវត្តទោសចំនួន៣ខែ ឯទោសសល់ពីនេះព្យួរនិងពិន័យជាប្រាក់ចំនួន៥លានរៀល ពីបទក្លែងផលិតផលទំនិញ ។ លោកឧត្តមសេនីយ៍បានបញ្ជាក់ថា ស្រាក្លែងក្លាយខាងលើនេះ ភាគច្រើនបានមកពីពួកចុងភៅក្នុងពិធីអាពាហ៍ពិពាហ៍ដែលយកទៅប្រើក្នុងពិធីពិសាភោជនាហារជាដើម ៕