ក្រុងប៉ោយប៉ែត ៖ ស្ត្រីម្នាក់ឈ្មោះគីម លី អាយុ៣៥ឆ្នាំ នៅផ្ទះជួលក្នុងភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត មានមុខរបរជាអ្នកដើរធ្វើក្រចកនៅផ្សាររុងក្លឿទឹកដីសៀម កាលពីវេលាម៉ោង៤និង៣០នាទីរសៀលថ្ងៃទី២៦ ធ្នូ បានមកកាន់ការិយាល័យទំនាក់ទំនងព្រំដែនកម្ពុជា-ថៃ ជាមួយប្តីសុំឱ្យមន្ត្រីនៅទីនោះជួយដោយអះអាងថា ខ្លួនគាត់ចំណាយប្រាក់អស់៦៦០បាតដើម្បីបន្តកាតអន្តោប្រវេសន៍ដែលគេហៅថា Immigration Card ប៉ុន្តែនៅតែមិនអាចចាត់ទុកជាផ្លូវការដដែល ។ តាមការរៀបរាប់ពីស្ត្រីឈ្មោះគីម លី បានឱ្យដឹងថា រូបគាត់និងប្តីឈ្មោះសុខ ម៉ាប់ អាយុ៣៧ឆ្នាំ បានមករស់នៅតំបន់ប៉ោយប៉ែតនេះ ១០ឆ្នាំហើយ និងមានទាំងសៀវភៅគ្រួសារបញ្ជាក់ពីអាជ្ញាធរព្រមទាំងអត្តសញ្ញាណប័ណ្ណក៏បានធ្វើហើយដែ រ ប៉ុន្តែពុំទាន់បានយក ។ តាំងពីឆ្នាំ២០០០មកទល់នឹងពេលនេះ គឺគាត់បានចូលទៅផ្សាររុងក្លឿ ទឹកដីសៀមដើរធ្វើក្រចកជាប្រចាំហើយមានទាំងកាតអន្តោប្រវេសន៍ ដែលចេញឱ្យដោយសមត្ថកិច្ចសៀមទៀតផង ដែលបញ្ជាក់ថា គាត់ជាសញ្ជាតិកម្ពុជា ។
ស្ត្រីរូបនេះបន្តថា លុះនៅថ្ងៃទី១៨ ធ្នូ កាតអន្តោប្រវេសន៍របស់គាត់បានផុតកំណត់ហើយត្រូវបានសមត្ថកិច្ចសៀមហែកមួយជ្រុងចេញជាសំគាល់ ដូចកាតគេឯងឯទៀតដែលផុតកំណត់ដែរ ។ ក្រោយការផុតកំណត់នេះ រូបគាត់បានទិញលិខិតបញ្ជាក់ពីប៉ុស្តិ៍អន្តោប្រវេសន៍ចំនួន៣ដងហើយ និងយកក្នុងម្តងៗតម្លៃ២២០បាត លុយសៀម ដោយមានទាំងការចុះហត្ថលេខាពីមន្ត្រីប៉ូលិសអន្តោប្រវេសន៍ទៀតផង ប៉ុន្តែរាល់លិខិតបញ្ជាក់ពីប៉ូលិសអន្តោប្រវេសន៍ខ្មែរនោះពេលយកទៅដល់ខាងសមត្ថកិច្ចសៀមគ េពុំធ្វើឱ្យទេ ដោយគេសង្ស័យថា គាត់ជាជនជាតិវៀតណាម ។ នៅថ្ងៃដដែលម៉ោងប្រហែល៥ល្ងាច ក្រោយពីការសួរនាំ មន្ត្រីការិយាល័យទំនាក់ទំនងព្រំដែនកម្ពុជា-ថៃក៏បានយកកាតដែលផុតកំណត់ភ្ជាប់ជាមួយលិខិតបញ្ជាក់ពីប៉ូលិសអន្តោប្រវេសន៍ទៅសួរនាំខាងស មត្ថកិច្ចអន្តោប្រវេសន៍សៀម ។ លោកម៉ុន សារួន មន្ត្រីការិយាល័យទំនាក់ទំនងព្រំដែនកម្ពុជា-ថៃ ខណៈវិលត្រឡប់ពីជួបជាមួយសមត្ថកិច្ចសៀមបានប្រាប់កោះសន្តិភាពថា គាត់បានជួបជាមួយលោកស័ក្តិ៤ អន្តោប្រវេសន៍សៀមនៅច្រកទ្វារខាងទឹកដីសៀម ហើយពេលគាត់ព្យាយាមសួរនាំលើការបន្តកាតត្រូវបានលោកស័ក្តិ៤នោះប្រាប់គាត់ថា រឿងកាតរបស់ស្ត្រីម្នាក់នេះម្តេចក៏សំបូរអ្នកមកសួរម៉្លេះ ។ មន្ត្រីដដែលបន្តថា ម្យ៉ាងដោយផុតកំណត់ម៉ោងធ្វើការផង លោកស័ក្តិ៤នោះក៏ដើរទៅបាត់មិនបញ្ជាក់ពីហេតុផលអ្វីឡើយ ។
ចំណែកលោកអនុសេនីយ៍ទោតឹប យ៉ាឌី មន្ត្រីសេនាធិការប៉ូលិសអន្តោប្រវេសន៍ច្រកទ្វារប៉ោយប៉ែតបានប្រាប់តាមទូរស័ព្ទនៅល្ងាច ថ្ងៃទី២៦ ធ្នូ ថា បញ្ហានេះលោកពុំទាន់ដឹងពីមូលហេតុច្បាស់លាស់នៅឡើយទេថា តើបណ្តាលមកពីអ្វីទើបស្ត្រីខាងលើខាងសមត្ថកិច្ចសៀមមិនធ្វើបន្តកាតឱ្យនោះ ។ ទោះបីជាបែបណា លោកអនុសេនីយ៍ទោរូបនេះប្រាប់ថា ខាងលោកបានបញ្ជាក់លិខិតឱ្យស្ត្រីនោះកាន់ទៅហើយ ឯគេធ្វើឱ្យឬមិនធ្វើ លោកអត់ដឹងទេ ព្រោះវាជាសិទ្ធិរបស់ខាងគេ ។ លោកតឹប យ៉ាឌី បន្តទៀតថា ទំនងជាស្ត្រីរូបនេះនិយាយពុំសូវច្បាស់គេស្តាប់ទៅដឹងថា ជាវៀតណាមទើបគេមិនហ៊ានធ្វើឱ្យបន្តដែលតាមពិតគាត់ជាជនជាតិកម្ពុជា ។ ចំណែកស្ត្រីឈ្មោះគីម លី និយាយទៀតថា បើរាល់ការចេញចូលកន្លងមកមានបញ្ហាដោយប្រការណាមួយនោះគាត់ក៏មិនថាអីដែរ ប៉ុន្តែរាល់ការចេញចូលទៅទឹកដីសៀមនេះគាត់ពុំដែលមានបញ្ហាអ្វីម្តងណាឡើយ ។ គេឆ្ងល់ថា កាតផុតកំណត់ដែលគេធ្វើកន្លងមកភាគីសៀមបានបញ្ជាក់ថា គាត់មានសញ្ជាតិកម្ពុជា ហើយរាល់កាតដែលផុតកំណត់សុទ្ធតែបន្តវិញបាន ម្យ៉ាងស្ត្រីរូបនេះមានលិខិតបញ្ជាក់ពីប៉ូលិសអន្តោប្រវេសន៍កម្ពុជាទៀត ហេតុដូចម្តេចក៏ភាគីសៀមនៅតែមិនបន្តឱ្យ ។ ស្ត្រីរូបនេះនិយាយថា គាត់មានបំណងចេញចូលដោយស្របច្បាប់មិនចង់ចេញចូលតាមច្រករបៀងដោយខុសច្បាប់នោះទេ ៕
