រាជធានីភ្នំពេញ ៖ សិស្ស និស្សិត និងបុគ្គលិកជាង៦០០នាក់ មកពីវិទ្យាស្ថានអភិវឌ្ឍន៍វិស័យអប់រំសាកល (UEDI) កាលពីព្រឹកថ្ងៃទី១៩ ធ្នូ បានរៀបចំពិធីបុណ្យទក្ខិណានុប្បទាន ដើម្បីឧទ្ទិសកុសលផលបុណ្យដល់ជនរងគ្រោះលើស្ពានពេជ្រ ។ ពិធីបុណ្យនេះត្រូវបានរៀបចំឡើងនៅក្នុងបរិវេណនៃវិទ្យាស្ថាន ស្ថិតនៅខាងជើងវត្តទួលទំពូង ប្រមាណ៥០ម៉ែត្រ ។ លោកសម ស៊ីណាន នាយកវិទ្យាស្ថាន UEDI បានថ្លែងថា ការរៀបចំធ្វើបុណ្យទក្ខិណានុប្បទានថ្ងៃនេះ គឺផ្តើមឡើងពីការរួបរួមគ្នារវាងគណៈគ្រប់គ្រង លោកគ្រូ អ្នកគ្រូ សិស្ស និស្សិត និងមាតាបិតា អាណាព្យាបាល ដើម្បីឧទ្ទិសកុលសផលបុណ្យជូនដល់មរណជនក្នុងឧបទ្ទវហេតុរាត្រីថ្ងៃទី២២ វិច្ឆិកា នៅលើស្ពានពេជ្រ ។ លោកបញ្ជាក់ថា ការរៀបចំពិធីបុណ្យនេះ គឺ មិនពាក់ព័ន្ធដល់បណ្តានយោបាយអ្វីនោះទេ ។ គោលបំណងពិតនៃការរៀបចំពិធីបុណ្យនេះ គឺដើម្បីប្រមូលកុសលផលបុណ្យជូនទៅដល់វិញ្ញាណក្ខន្ធជនរងគ្រោះតែម្យា៉ងប៉ុណ្ណោះ ។
លោកបន្តថា ដោយមើលឃើញពីការយកចិត្តទុកដាក់របស់ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន និងលោកជំទាវ ព្រមទាំងស្ថាប័ន និងប្រជាជនកម្ពុជាទូទាំងប្រទេសចំពោះមហាសោកនាដកម្មលើស្ពានពេជ្រនោះ វិទ្យាស្ថានរបស់លោកក៏ផ្តួចផ្តើមគំនិតរៀបចំពិធីបុណ្យនាពេលនេះតែម្តង ។ លោកគិតថា មរណជននៅស្ពានពេជ្រទាំងអស់នឹងទទួលបានកុលសផលបុណ្យពីពិធីបុណ្យដែលរៀបចំដោយវិទ្យា ស្ថាន UEDI នេះដោយជាក់។ តាងនាមថ្នាក់ដឹកនាំលោកគ្រូ អ្នកគ្រូ មាតាបិតា អាណាព្យាបាល និងសិស្ស និស្សិត វិទ្យាស្ថាន UEDI សូមចូលរួមរំលែកទុក្ខដល់ក្រុមគ្រួសារជនរងគ្រោះ និងសូមបន់ស្រន់ដល់វិញ្ញាណក្ខន្ធនៃមរណជនទាំងអស់ទៅកាន់សុគតិភពដោយស្ងប់ស្ងាត់កុំបីឃ្ លៀងឃ្លាតឡើយ ៕