រាជធានីភ្នំពេញ ៖ ក្នុងជំនួបជាមួយលោកឧបនាយករដ្ឋមន្ត្រីហោ ណាំហុង លោកស្រីរដ្ឋមន្ត្រីការបរទេសបង់ក្លាដេស ឌីពូ ម៉ូនី បានស្នើឱ្យកម្ពុជានាំអង្ករទៅលក់នៅប្រទេសរបស់លោកស្រី ព្រោះប្រទេសលោកស្រីនៅមានកង្វះខាតស្បៀងច្រើន ហើយថា នឹងជំរុញឱ្យវិនិយោគិនមកបណ្តាក់ទុនរកស៊ីនៅក្នុងប្រទេសកម្ពុជា ជាពិសេសវិនិយោគលើវិស័យកសិកម្មដាំស្រូវនេះតែម្តង ។ ការលើកឡើងបែបនេះ បានធ្វើកាលពីវេលាម៉ោង១០ព្រឹក ថ្ងៃទី២៧ ធ្នូ ២០១០ បន្ទាប់ពីលោកស្រី និងគណៈប្រតិភូអមដំណើរបានអញ្ជើញមកដល់ប្រទេសកម្ពុជា ក្នុងដំណើរទស្សនកិច្ចផ្លូវការ។ លោកឧបនាយករដ្ឋមន្ត្រីហោ ណាំហុង បានសំដែងការរីករាយចំពោះការនាំអង្ករទៅកាន់ប្រទេសបង់ក្លាដេស ព្រោះវាជាគោលដៅរបស់រដ្ឋាភិបាលដែលកំពុងជំរុញឱ្យមានការផលិតអង្ករកាន់តែច្រើន និងនាំអង្ករចេញទៅក្រៅប្រទេស ។
លោកហោ ណាំហុង បានបន្តថា ដោយឡែក ការវិនិយោគលើវិស័យកសិកម្មគឺត្រូវពិភាក្សាបន្តទៀតជាមួយស្ថាប័នជំនាញ ហើយរដ្ឋាភិបាលស្វាគមន៍ការវិនិយោគនេះខ្លាំងណាស់ ។ គួរបញ្ជាក់ថា យោងតាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិចុះថ្ងៃទី២២ ធ្នូ ២០១០ បានឱ្យដឹងថា ដំណើរទស្សនកិច្ចរបស់រដ្ឋមន្ត្រីការបរទេសបង់ក្លាដេសរយៈពេល២ថ្ងៃ ចាប់ពីថ្ងៃទី២៧ ដល់ថ្ងៃទី២៨ ធ្នូ នេះ គឺធ្វើឡើងតបតាមការអញ្ជើញរបស់លោកឧបនាយករដ្ឋមន្ត្រីហោ ណាំហុង រដ្ឋមន្ត្រីការបរទេសកម្ពុជា ។ នៅក្នុងប្រទេសកម្ពុជា លោកស្រីរដ្ឋមន្ត្រីការបរទេសនៃសាធារណរដ្ឋប្រជាមានិតបង់ក្លាដេសឌីពូ ម៉ូនី នឹងចូលក្រាបបង្គំគាល់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៅព្រះបរមរាជវាំង និងអញ្ជើញចូលសំដែងការគួរសមជាមួយសម្តេច-អគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជួបពិភាក្សាការងារផងដែរ ជាមួយលោកច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ។
មុននឹងបញ្ចប់ដំណើរទស្សនកិច្ចផ្លូវការនៅកម្ពុជា លោកស្រីរដ្ឋមន្ត្រីការបរទេសបង់ក្លាដេស ក៏នឹងអញ្ជើញទៅទស្សនាប្រាសាទអង្គរវត្ត និងប្រាង្គប្រាសាទនានានៅខេត្តសៀមរាបផងដែរ ។ គួរបញ្ជាក់ដែរថា ជញ្ជីងពាណិជ្ជកម្មរវាងកម្ពុជា-បង់ក្លាដេសកាលពីឆ្នាំ២០០៩ កន្លងមកនេះគឺប្រទេសកម្ពុជាបាននាំទំនិញទៅប្រទេសបង់ក្លាដេសមានទឹកប្រាក់ចំនួន៤០ម៉ឺនដ ុល្លារ ចំណែកបង់ក្លាដេសបាននាំទំនិញចូលកម្ពុជាមានទឹកប្រាក់ចំនួន១លាន៣សែនដុល្លារ ៕