ការចូលរួមប្រកួតរបស់ក្រុមអត្តពលិកកម្ពុជា នៅកីឡាអូឡាំពិកលើកទី៣០ នៅទីក្រុង ឡុងដ៍ ចក្រភពអង់គ្លេស បានធ្វើឱ្យកម្ពុជាកាន់តែទទួលបានបទពិសោធច្រើនសម្រាប់វិស័យកីឡា។
ប្រភពព័ត៌មាន NOCC បានឱ្យដឹងថា ជាមួយនឹងការមកដល់នេះដែរ NOCC នឹងមានរៀបចំសន្និសីទសារព័ត៌មានមួយជុំវិញលទ្ធផល និងការត្រឡប់មកវិញរបស់អត្ត ពលិកកម្ពុជា ដែលបានចូលរួមនៅក្នុងព្រឹត្តិការណ៍ប្រកួតកីឡាកម្រិតពិភពលោកនៅទីក្រុងឡុងដ៍ ក្នុងពេលឆាប់ៗនេះ។
ក្រុមអត្តពលិកកម្ពុជាដែលបានទៅចូលរួមប្រកួតនៅអូឡាំពិកក្រុងឡុងដ៍
លោក វ៉ាត់ ចំរើន អគ្គលេខាធិការ NOCC មានប្រសាសន៍ថា «សន្និសីទនេះធ្វើក្នុងគោលបំណងផ្សព្វផ្សាយជូនមហាជន និង អ្នកឧបត្ថម្ភផ្សេងៗបានដឹងថា ក្រុមកីឡាករកម្ពុជា ដែលទៅចូលរួមប្រកួតកីឡាអូឡាំពិក លើកទី៣០ នៅទីក្រុងឡុងដ៍ ប្រទេសអង់គ្លេស នោះបានមកដល់ ប្រទេសអស់ហើយ និងប្រកបដោយសុវត្ថិភាព កាលពីរាត្រីថ្ងៃទី១៧ សីហា ឆ្នាំ ២០១២ តាមជើងយន្តហោះ Air France»។
លោកអគ្គលេខាធិការ NOCC បន្តថា «ជាមួយគ្នានោះដែរអត្តពលិករបស់កម្ពុជាយើងខ្លះបានឈ្នះ ថែម ទាំងបានបំបែកឯតទគ្គកកម្មចាស់របស់ខ្លួនបាន និង គួឲ្យកោតសរសរសើរ»។
សូមរំលឹកថា កម្ពុជាបានបញ្ជូនអត្តពលិករបស់ខ្លួនចំនួន៦រូបលើ៤ប្រភេទកីឡា ដោយ ២រូបមកពីកីឡាហែលទឹក ២រូបមកពីកីឡាអត្តពលកម្ម ១រូបមកពីកីឡាយូដា និង១រូបទៀតមកពីកីឡាតេក្វាន់ដូ៕
ដោយ ៖ សូរីយ៉ាប្រភព ៖ NOCC