ខេត្តកំពង់ឆ្នាំង ៖ បុរសចំណាស់ម្នាក់ត្រូវប៉ូលិសមូលដ្ឋានចាប់ខ្លួននាំមកចាត់ការតាមច្បាប់ បន្ទាប់ពីបុរសរូបនោះបានសម្រាតខោប្រពន្ធគេ កាលពីវេលាម៉ោង៣និង៣០នាទីរសៀលថ្ងៃទី២២ ធ្នូ នៅភូមិបាញ់ធ្គោល ឃុំស្រែបាក់ ស្រុករលាប្អៀរ ។ យោងតាមមន្ត្រីប៉ូលិសប៉ុស្តិ៍បាននិយាយថា បុរសសង្ស័យរូបនោះឈ្មោះប៉ាវ សាលឿន អាយុ៥២ឆ្នាំ ។ នៅថ្ងៃកើតហេតុបុរសដែលត្រូវឃាត់ខ្លួននេះបានផឹកស៊ីតាំងពីម៉ោង១០ព្រឹក ជាមួយប្តីនារីរងគ្រោះរហូតដល់ម៉ោង៣ជាង ។ ពេលនោះនាងជាប្រពន្ធ ដែលមានអាយុ២៧ឆ្នាំ ដើរទៅ ហៅប្តី ឱ្យត្រឡប់មកផ្ទះវិញ តែត្រូវឈ្មោះប៉ាវ សាលឿន ស្តីបន្ទោសថា ប្តីផឹកស៊ីតិចតួចក៏មកតាមដែរ ហើយក៏ដេញឱ្យស្ត្រីនេះត្រឡប់ទៅផ្ទះវិញ ។
ប៉ុន្តែស្ត្រីរូបនេះពុំព្រមទៅទេ នៅតែទទូចហៅប្តីរបស់ខ្លួនដែលកំពុងអង្គុយផឹកជាមួយបុរសរពឹសដៃនេះ ។ ដោយសារតែនិយាយដេញ តែពុំព្រមចេញ បុរសឈ្មោះសាលឿន ក៏បានចាប់ទាញសម្រាតខោរបស់នាងដល់ត្រឹមជង្គង់ នៅសល់តែខោក្នុង ហើយស្ត្រីរងគ្រោះក៏លើកស្លៀកវិញ ។ ក្រោយមកបុរសរូបនោះ បានទាញសម្រាតម្តងទៀតជាលើកទី២ ។ ដោយទ្រាំមិនបាននឹងទង្វើមើលងាយបែបនេះ ទើបស្ត្រីរងគ្រោះរត់មកប្តឹងប៉ូលិសប៉ុស្តិ៍ ហើយក៏មានការចាប់ខ្លួនភ្លាមៗតែម្តងនៅកន្លែងផឹកស៊ី ។
ប្រភពដដែលបញ្ជាក់ថា ពេលសម្រាតខោនោះ ស្ត្រីរងគ្រោះបានខោក្នុងជួយបិទបាំងខ្លះកុំអីលេចកេរ្តិ៍ខ្មាសនៅកណ្តាលវាលពុំខាន ។ លោកស្រីប្រាក់ សៅនី ប្រធានការិយាល័យប្រឆាំងការជួញដូរមនុស្ស និងការពារអនីតិជនខេត្ត បាននិយាយថា ជនល្មើសបានបញ្ជូនទៅតុលាការតាមផ្លូវច្បាប់ ក្រោមការចោទប្រកាន់ពីបទ «ប្រទូស្តកេរ្តិ៍ខ្មាស» តាមក្រមព្រហ្មទណ្ឌមាត្រា២៤៦ មានទោសពី១ទៅ៣ឆ្នាំ ៕