ខេត្តព្រះសីហនុ ៖ ជនសង្ស័យម្នាក់ក្នុងចំណោមបក្សពួក២នាក់ដែលលួចកាច់សោ.កម៉ូតូម៉ាកវ៉េវអាល់ហ្វា ពណ៌ក្រហមមួយគ្រឿងកាលពីថ្ងៃទី២៧ ធ្នូ ត្រូវនគរបាលការិយាល័យព្រហ្មទណ្ឌនៃស្នងការដ្ឋានខេត្តបញ្ជូនទៅសាលាដំបូងខេត្តកាលពីរសៀល ថ្ងៃទី២៩ ធ្នូ។ លោកអនុសេនីយ៍ឯក អ៊ុក ថាន់ដារិទ្ធិ មន្ត្រីនគរបាលការិយាល័យព្រហ្មទណ្ឌនៃស្នងការដ្ឋានខេត្តឱ្យដឹងថា ជនសង្ស័យឈ្មោះលុយ ដារ៉ា ហៅគីម ណាគី ភេទប្រុស អាយុ៤៥ឆ្នាំ មុខរបរមិនពិតប្រាកដ មានទីលំនៅក្នុងភូមិតានី ឃុំតានី ស្រុកអង្គរជ័យ ខេត្តកំពត។ ដោយឡែកម្នាក់ទៀតដែលជាអ្នកសមគំនិត គឺជាស្ត្រីស្នេហ៍របស់គេ។
ប្រភពដដែលបន្តថា ម្ចាស់បានទុកម៉ូតូខាងមុខផ្សារសាម៉ូដឺរ៉ា ស្ថិតក្នុងភូមិ២ សង្កាត់លេខ៤ ក្រុងព្រះសីហនុ ហើយចូលទិញអីវ៉ាន់ លុះពេលចេញមកវិញស្រាប់តែបាត់ម៉ូតូរបស់ខ្លួន។ ផ្អែកតាមការស្រាវជ្រាវតាមប្រព័ន្ធកាមេរ៉ានៅផ្សារទំនើបសាម៉ូដឺរ៉ាគឺឃើញរូបភាពជាក់ស ្តែងពេលជនសង្ស័យចូលធ្វើសកម្មភាពលួចកាច់សោ.កម៉ូតូ។ លោកអនុសេនីយ៍ឯក អ៊ុក ថាន់ដារិទ្ធិ បន្តថា ជនសង្ស័យបានសារភាពថា រូបគេបានជិះម៉ូតូសេ១២៥ ពណ៌ខ្មៅ ស៊េរីឆ្នាំ២០០៧ ពាក់ស្លាកលេខក្រ.ព្រះសីហនុ១A៦២៧១ ឌុបស្រីស្នេហ៍ទៅឈប់ខាងមុខផ្សារ។ គេបានប្រគល់កូនសោម៉ូតូឱ្យទៅស្រីស្នេហ៍ ហើយនាងធ្វើជាចូលទិញអីវ៉ាន់ក្នុងផ្សារ។
ចំណែករូបគេចាប់ផ្តើមកាច់សោ.កម៉ូតូម៉ាកវ៉េវ រួចជិះចេញឆ្ពោះទៅខាងក្រោយមហោស្រពចាស់រង់ចាំស្រីស្នេហ៍។ នៅពេលស្រីស្នេហ៍របស់គេមកដល់ គេប្រគល់ម៉ូតូដែលទើបលួចបាននោះឱ្យជិះគេចខ្លួនភ្លាម។ យោងតាមជំនាញរបស់មន្ត្រីនគរបាលការិយាល័យព្រហ្មទណ្ឌកំរិតធ្ងន់នៃស្នងការដ្ឋានខេត្ត រយៈពេល២ម៉ោងក្រោយមកជនសង្ស័យត្រូវបានឃាត់ខ្លួននៅផ្ទះសំណាក់មួយ ចំណែកស្រីស្នេហ៍ដែលជិះម៉ូតូគេចខ្លួននោះសមត្ថកិច្ចកំពុងតាមចាប់ខ្លួនយកទៅផ្តន្ទាទ ោស។ សូមបញ្ជាក់ថា ម្ចាស់ម៉ូតូដែលចោរលួចនោះជាជនជាតិបារាំង៕