ខេត្តឧត្តរមានជ័យ ៖ ដោយសារតែមិនអាចចែករំលែកស្រីដែលខ្លួនស្រលាញ់ទៅឱ្យនរណាម្នាក់រួមរ័កមេត្រីបាន បុរសទាហានស្ទុះទាញកាំភ្លើងអាកា បាញ់សំលាប់មិត្តសម្លាញ់របស់ខ្លួនឱ្យដេកដួលក្នុងថ្លុកឈាម រួចហើយបាញ់សម្លាប់នារីជាសង្សារតាមក្រោយ ដោយឥតញញើតដៃ និងបន្ទាប់មកបាញ់សម្លាប់ខ្លួនឯង ដើម្បីបញ្ចប់បញ្ហា ឬហៅថា អត្តឃាតស្នេហ៍ ។ សកម្មភាពយកសេចក្តីស្លាប់មកដោះស្រាយវិបត្តិស្នេហ៍នេះបានកើតឡើងកាលពីវេលាម៉ោង១០យប់ថ្ងៃទី ២៩ ធ្នូ ២០១០ នៅហាងខារ៉ាអូខេ យីហោ ម៉ែអាតុង ស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង លើជួរភ្នំដងរែក ចែកខណ្ឌទឹកដីកម្ពុជា-សៀម ។ ស្ត្រីម្ចាស់ហាងខារ៉ាអូខេ ឈ្មោះម៉ែន សារឿន អាយុ៣៩ឆ្នាំ មានប្តីឈ្មោះហ៊ីង ហ៊ឹង អាយុ៤២ឆ្នាំ ស្នាក់នៅទីតាំងខារ៉ាអូខេ ខាងលើ បានឱ្យដឹងថា ការបាញ់សម្លាប់គ្នានោះគឺផ្តើមចេញពីកំហឹងក្រេវក្រោធនៃភ្លើងប្រច័ណ្ឌដោយសារថា បុរសជាឃាតជនបានស្រលាញ់នារីខារ៉ាអូខេ ហើយនារីខារ៉ាអូខេបែរជាស្រលាញ់មិត្តភក្តិរបស់ឃាតជនទៅវិញ ធ្វើឱ្យខកចិត្ត មិនអាចចែករំលែកបានក៏បាញ់សម្លាប់ទាំងអស់គ្នាតែម្តង ។
អ្នកស្លាប់ទាំង៣ មាន១-ឈ្មោះស៊ុម សុគៀ អាយុ៣៥ឆ្នាំ ជាទាហានកងល្បាតលេខ៥ ប្រចាំអង្គ ភាព៤០៣ ជាជនដៃដល់បាញ់ប្រហារគួរឱ្យតក់ស្លុត ២-ឈ្មោះមឿន ដាឡែន ភេទស្រី អាយុ២៣ឆ្នាំ ជាស្ត្រីបំរើហាងខារ៉ាអូខេ មានស្រុកកំណើតនៅភូមិខ្នារថ្មី ឃុំជ្រាវ ក្រុងសៀមរាប ត្រូវឃាតជនបាញ់ចំទ្រូងខាងស្តាំ ធ្លាយទៅក្រោយ១គ្រាប់ ចំត្រគាកធ្លាយទៅក្រោយ១គ្រាប់ ស្លាប់នៅនឹងកន្លែង ៣-ឈ្មោះសោម សុង អាយុ៣០ឆ្នាំ ជាទាហានប្រចាំការនៅអង្គភាពលេខ២០៣ ស្លាប់នៅនឹងកន្លែង ហើយត្រូវបានសាច់ញាតិនាំយកសពទៅធ្វើបុណ្យនៅស្រុកកំណើតភូមិពែងមាសខាងជើង ឃុំស្ពឺ ស្រុកចំការលើ ខេត្តកំពង់ចាម ។
តាមព័ត៌មានជុំវិញកន្លែងកើតហេតុ លោកអនុសេនីយ៍ឯក ងួន ទីរិទ្ធ មេបញ្ជាការប៉េអឹមស្រុកអន្លង់វែងបានឱ្យដឹងថា មុនពេលកើតហេតុឈ្មោះសោម សុង និងឈ្មោះស៊ុម គា ដែលជាមិត្តភក្តិនឹងគ្នាបាននាំគ្នា ចូលទៅច្រៀងខារ៉ាអូខេនៅផ្ទះមួយលើខ្នងភ្នំដងរែកក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ដោយមានស្រីស្អាតអង្គុយកំដរអារម្មណ៍ក្នុងការផឹកស៊ីផង និងច្រៀងផង។ ក្នុងពេលនោះនាងបំរើខារ៉ាអូខេឈ្មោះមឿន ដាឡែន ជាស្រីស្អាត បានឆក់បេះដូងអ្នកទាំង២ឱ្យធ្លាក់ទៅក្នុងអន្លង់ស្នេហ៍រហូតដល់វេលាម៉ោង៨យប់ ថ្ងៃទី២៩ ធ្នូ ទើបពួកគេទាំង៣នាក់បញ្ចប់កម្មវិធីខារ៉ាអូខេ។
តាមប្រភពព័ត៌មានបានឱ្យដឹងបន្តថា ឈ្មោះសោម សុង ទំនងជាបាននិយាយត្រូវរ៉ូវគ្នាមុនជាមួយស្រីស្រស់ដាឡែននោះ ទើបពួកគេទាំង២នាក់បាននាំគ្នាទៅនែបនិត្យក្នុងល្បែងស្នេហ៍យ៉ាងត្រេកត្រអាលនៅចំណុចអតីតស្រះ ទឹកតាម៉ុកក្បាលទន្សោងក្បែរបន្ទាយ។ លុះដល់វេលាម៉ោង១០យប់ថ្ងៃដដែល ស្រាប់តែឈ្មោះស៊ុម គា ដែលមានកំហឹង ព្រោះមិនអាចឆក់បេះដូងនារីរូបស្រស់នេះបាន ក៏ទាញកាំភ្លើងអាកាទៅបាញ់ឈ្មោះសោម សុង និងស្រីស្អាត ឈ្មោះមឿន ដាឡែន ពេលកំពុងតែឡើងឋានសួគ៌នៅក្នុងផ្ទះមួយក្បែរអតីតស្រះទឹកតាម៉ុកបណ្តាលឱ្យស្លាប់បាត់បង់ជីវិ តជាបន្តបន្ទាប់ហើយឈ្មោះស៊ុម គា ក៏បានបាញ់ខ្លួនឯងធ្វើអត្តឃាតដែរ ។
លោកអនុសេនីយ៍ឯកងួន ទិរិទ្ធ បានបន្តទៀតថា ភ្លាមៗនោះ សមត្ថកិច្ចប៉េអឹមបានចុះទៅដល់កន្លែងកើតហេតុធ្វើការត្រួតពិនិត្យឃើញថា ស្ត្រីរងគ្រោះបានដេកស្លាប់លើស្មៅក្រៅផ្ទះក្នុងសភាពរាងកាយអាក្រាត ដែលបង្ហាញថា ពេលអាសន្ននោះនាងបានព្យាយាមរត់គេចខ្លួនដោយមិនខ្វល់ពីសំលៀកបំពាក់ឡើយ តែរត់មិនរួច ។ចំណែកឈ្មោះសោម សុង ស្លាប់ក្នុងសភាពស្លៀកតែខោខ្លី ។ បន្ទាប់ពីបានធ្វើការត្រួតពិនិត្យរួច សមត្ថកិច្ចបានឱ្យអ្នកស្គាល់សពនាំយកទៅតំកល់ទុកនៅ វត្តអូរគ្រញូងរង់ចាំបងប្អូន ឪពុកម្តាយមកយកទៅធ្វើបុណ្យនៅតាមលំនៅឋានរៀងៗខ្លួន ៕