ខេត្តកណ្តាល ៖ ស្នេហាផ្អែមល្ហែមរបស់យុវវ័យមួយគូអស់រយៈពេលជិតមួយឆ្នាំ រហូតដឹកដៃគ្នាឡើងឋានសួគ៌ជាច្រើនដង ប្រាសចាកគន្លងប្រពៃណីមិនឱ្យអាណាព្យាបាលដឹងនោះ នៅទីបំផុតត្រូវបែកធ្លាយដោយអាណាព្យាបាលទៅទាន់ ខណៈកំពុងនាំគ្នាឡើងឋានសួគ៌នៅផ្ទះខាងស្រី ។ រឿងនេះតួឯកប្រុសក្លាយជាអ្នកទោសដោយអាណាព្យាបាលខាងស្រី ប្តឹងប៉ូលិសឱ្យចាប់ខ្លួនកាលពីវេលាម៉ោង១រសៀលថ្ងៃទី២៤ មករា ឆ្នាំ២០១១ នៅផ្ទះរបស់នាងស្ថិតនៅ សង្កាត់ដើមមៀន ក្រុងតាខ្មៅ ខេត្តកណ្តាល ។
មន្ត្រីប៉ូលិសឱ្យដឹងថា អ្នកទោសសេ្នហានោះឈ្មោះទុំ សារ៉ាឌីន អាយុ២១ឆ្នាំ រស់នៅភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ជាកសិករ ។ ចំណែកតួឯកស្រីអាយុ១៦ឆ្នាំ ជាសិស្ស ។ នៅអធិការដ្ឋាននគរបាលក្រុងតាខ្មៅនាងអង្វរអាណាព្យាបាលរបស់ ខ្លួនឱ្យដកពាក្យបណ្តឹងវិញ ព្រោះពួកនាងស្រឡាញ់គ្នាយ៉ាងប្តូរផ្តាច់យូរមកហើយ មិនមានការចាប់បង្ខំទេ ។ ទោះបីជាបែបណាក្តី នាងមានវ័យ១៦ឆ្នាំ មិនអាចការពារទង្វើរបស់ខ្លួនបែបនេះបានឡើយ ព្រោះស្ថិតក្នុងវ័យអនីតិជន ។
ឈ្មោះទុំ សារ៉ាឌីន រៀបរាប់ប្រាប់ប៉ូលិសថា ពួកគេទាំងពីរនាក់បានស្គាល់គ្នាតាំងពីខែមិថុនា ឆ្នាំ២០១០ និងធ្លាប់ដើរលេងកសាងអនុស្សាវរីយ៍ជាច្រើនជាមួយគ្នា ។ ថ្វីដ្បិតតែផ្ទះពួកគេនៅឆ្ងាយពីគ្នា តែពួកគេតែងតែទូរស័ព្ទណាត់ជួបគ្នាជាញឹកញាប់ ។ រយៈពេលកន្លងមក ពួកគេបានណាត់ជួបគ្នានៅផ្ទះខាងស្រី និងបានរួមរ័កជាមួយគ្នាចំនួន៤ដងរួចមកហើយ ខណៈពេលអាណាព្យាបាលរបស់នាងចេញទៅប្រកបមុខរបរនៅ ផ្សារតាខ្មៅ ។
អ្នកទោសសេ្នហាបន្តទៀតថា នៅថ្ងៃទី២៤ មករា គេបានទូរស័ព្ទទៅសង្សារ ហើយបានដឹងថា អាណាព្យាបាលរបស់នាងមិននៅផ្ទះ គេក៏ទៅផ្ទះនាងនាម៉ោងប្រហែលជាង១២ថ្ងៃត្រង់ ។ ខណៈពួកគេកំពុងនាំគ្នាឡើងឋានសួគ៌ ស្រាប់តែឪពុកខាងស្រីមកទាន់ និងគោះទ្វារផ្ទះស្រែកហៅ ។ ពេលនោះរូបគេភ័យស្លន់ស្លោស្លៀកខោពាក់អាវស្ទើរតែមិនទាន់ ។ ពេលបើកទ្វារឃើញរូបគេនៅក្នុងផ្ទះជាមួយកូនស្រីតែពីរនាក់ គាត់សួរនាំដឹងរឿងក៏ទះកំផ្លៀងរូបគេចំនួន២ ទៅ៣ដៃ បណ្តាលឱ្យហូរឈាមតាមច្រមុះ ។ បន្ទាប់មកគាត់ប្តឹងប៉ូលិសឱ្យចាប់ខ្លួនគេ ។
ចំណែកតួស្រីរៀបរាប់ប្រាប់ប៉ូលិសថា នាងនិងឈ្មោះទុំ សារ៉ាឌីន ស្គាល់គ្នាតាមរយៈទូរស័ព្ទ និងឈានដល់ការយល់ចិត្តថ្លើមគ្នា ។ ពួកនាងធ្លាប់បានរួមរ័កជាមួយគ្នានៅក្នុងផ្ទះរបស់នាង ខណៈឪពុកម្តាយមិននៅ ។ ពួកនាងបានសន្យាគ្នាថា នឹងចូលស្តីដណ្តឹង រួចរៀបការតាមប្រពៃណីនៅពេលខាងមុខ ។
តាមប្រភពព័ត៌មានថា នៅព្រឹកថ្ងៃទី២៥ មករា បន្ទាប់ពីប៉ូលិសចាប់ខ្លួនឈ្មោះទុំ សារ៉ាឌីននាំទៅអធិការដ្ឋាននគរបាលក្រុងតាខ្មៅ គេឃើញភាគី អាណាព្យាបាលទាំងសងខាងពិភាក្សាត្រូវរ៉ូវគ្នា ហើយសុំដកពាក្យបណ្តឹងវិញ ដើម្បីឱ្យពួកគេទាំងពីរនាក់បានរៀបការនឹងគ្នា ប៉ុន្តែសមត្ថកិច្ចប៉ូលិសមិនយល់ព្រមឡើយ ព្រោះរឿងនេះបានរាយការណ៍ទៅព្រះរាជអាជ្ញារួចរាល់ហើយ ៕
http://kohsantepheapdaily.com.kh/art...25-034545.html