ក្រុងប៉ោយប៉ែត ៖ អន្ទិតម្នាក់ត្រូវសមត្ថកិច្ចប៉ូលិសក្រុងប៉ោយប៉ែតចាប់ឃាត់ខ្លួនកាលពី វេលាម៉ោង៧ព្រឹកថ្ងៃទី៧ មករា នៅភូមិអូរនាង សង្កាត់ប៉ោយប៉ែត ក្រោយពីរូបគេដើរអុកឡុកធាក់ទ្វារផ្ទះអ្នកស្រុក និងឡើងអង្រួនលើគោយន្តប្រៀបដូចជាកំរោលចូល ។ មន្ត្រីសមត្ថកិច្ចឱ្យដឹងថា អន្ទិតរូបនេះទើបចេញពីប្រទេសថៃ និងបានដោះស្បង់ចីវរដោយខ្លួនឯង ដើម្បីបានរស់នៅជាមួយអ្នកមេម៉ាយកូន៥ ។ តាមឥរិយាបថរបស់បុគ្គលរូបនេះ ទំនងជាបែកកម្មដ្ឋានដោយសាររៀនធម៌អារ្យច្រើននៅស្រុកសៀម ។ អន្ទិតនោះឈ្មោះខៀវ សុខហឿន ហៅង៉ែត អាយុ២៤ឆ្នាំ ជាអតីតសង្ឃទើបចេញពីប្រទេសសៀម និងមានស្រុកកំណើតនៅឃុំព្រែកថ្មី ស្រុកកោះធំ ខេត្តកណ្តាល ។តាមប្រភពពីសមត្ថកិច្ចបានឱ្យដឹងថា ការឃាត់ខ្លួនអន្ទិតនេះគឺដោយសារមានសេចក្តី រាយការណ៍ពីអាជ្ញាធរភូមិអូរនាងថា រូបគេបានដើរអុកឡុកផ្ទះអ្នកភូមិក្នុងឥរិយាបថខូចសតិស្មារតី ទើបកំលាំងចុះទៅធ្វើការឃាត់ខ្លួន ដើម្បីទប់ស្កាត់កុំឱ្យបុគ្គលនេះបង្កបញ្ហាកាន់តែធំ ។ ប្រភពដដែលបន្តថា ពេលឃាត់ខ្លួនអន្ទិតរូបនេះក៏មានស្ត្រីម្នាក់ឈ្មោះឈាង សាវង្ស អាយុ៣២ឆ្នាំ ដែលជាស្ត្រីមេម៉ាយកូន៥ បានប្រាប់ថា ជននេះជាប្តីមួយប៉ប្រិចភ្នែករបស់ខ្លួន ទើបតែបានគ្នានៅថ្ងៃទី២ មករា ខណៈរូបគេនៅជាសង្ឃនិមន្តមកពីប្រទេសសៀម ជួបគ្នានៅច្រកព្រំដែនក៏ឈានដល់ការស្រលាញ់ដូចរន្ទះ ហើយនាំគ្នាមកផ្ទះ និងរស់នៅជាមួយគ្នា ។ប៉ូលិសបានបន្តថា ការដោះស្បង់ចីវរចាកភាពជាសង្ឃគឺអន្ទិតនេះបានធ្វើឡើងដោយខ្លួនឯង ខណៈដែលឡើងមកនៅលើផ្ទះជាមួយអ្នកមេម៉ាយ ដើម្បីរស់នៅជាលក្ខណៈប្តី-ប្រពន្ធហេងស៊យ ។ ប៉ូលិសបញ្ជាក់ថា នៅថ្ងៃចាប់ខ្លួនអន្ទិតនោះភ្លាមៗសួរនាំទៅអាចដឹងខុសត្រូវខ្លះ លុះថ្ងៃបន្ទាប់សួរលែងដឹងអ្វីទាំងអស់ទំនងជាសរសៃប្រសាទហើយ ។ លោកអនុសេនីយ៍ឯកអ៊ុំ សុផល អធិការនគរបាលក្រុងបានប្រាប់ថា អន្ទិតរូបនេះនឹងត្រូវកសាងសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីដោះស្រាយបន្តតាមនីតិវិធី ៕
