រាជធានីភ្នំពេញ ៖ កាបូបស្ពាយ ក្នុងនោះមាននាឡិកា២គ្រឿង ទូរស័ព្ទដៃ២គ្រឿង ប្រាក់ប្រមាណ៥.០០០ដុល្លារ ខ្សែ.កដាំពេជ្រ និងចិញ្ចៀនពេជ្រ១វង់ ត្រូវក្រុមចោរគាស់ទ្វាររថយន្តលួចយកនៅពេលម្ចាស់ចតរថយន្តម៉ាកកាមរីនៅតាមដងផ្លូវ ហើយទៅទិញត្រីក្រឹម។ នេះជាការអះអាងរបស់ម្ចាស់រថយន្ត។ ហេតុការណ៍ចោរគាស់រថយន្តយកគ្រឿងអលង្ការ និងប្រាក់នេះសមត្ថកិច្ចឱ្យដឹងថា កើតឡើងកាលពីវេលាម៉ោង៩ និង១៥នាទីព្រឹក ថ្ងៃទី៩ មករា នៅមុខផ្ទះលេខ៧០ ផ្លូវលេខ៥៩២ សង្កាត់បឹងកក់ទី២ ខណ្ឌទួលគោក។ ម្ចាស់រថយន្តដែលចោរគាស់យកគ្រឿងអលង្ការឈ្មោះសេង សុខចេង ភេទស្រី អាយុ២៥ឆ្នាំ រស់នៅផ្ទះលេខ៥២១ សង្កាត់ភ្នំពេញថ្មី ខណ្ឌសែនសុខ។តាមប្រភពព័ត៌មានឱ្យដឹងថា នៅមុនពេលកើតហេតុនារីរូបនោះ រួមទាំងស្វាមីជិះរថយន្តម៉ាកកាមរីពណ៌ទឹកប្រាក់ គ្មានស្លាកលេខទៅឈប់មុខផ្ទះលេខ៧០ ផ្លូវលេខ៥៩២ សង្កាត់បឹងកក់ទី២ ក្នុងគោលបំណងរកទិញត្រីក្រឹម។ ខណៈប្តី ប្រពន្ធទាំង២នាក់ចុះពីរថយន្តទៅ រកទិញត្រីក្រឹម បានទុកកាបូបស្ពាយក្នុងរថយន្ត លុះពេលត្រឡប់ទៅរថយន្តវិញស្រាប់តែត្រូវចោរគាស់យកកាបូបបាត់។ នៅក្នុងកាបូបស្ពាយនោះមានប្រាក់ចំនួន៥ពាន់ដុល្លារ ទូរស័ព្ទ២គ្រឿង នាឡិកាចំនួន២គ្រឿង ខ្សែ.កដាំពេជ្រ១ខ្សែ និងចិញ្ចៀនពេជ្រ១វង់។ ទោះបីជាយ៉ាងណាក្តី គេពុំដឹងថា គ្រឿងអលង្ការមានតំលៃប៉ុន្មានឡើយ៕