ខេត្តកំពង់ស្ពឺ ៖ ឧបទ្ទវហេតុដ៏រន្ធត់មួយបណ្តាលឱ្យមន្ត្រីគយមួយគ្រួសារយ៉ាងហោចណាស់ស្លាប់ចំនួន៤នាក់ និង២នាក់រងរបួសយ៉ាងធ្ងន់ធ្ងរ ដោយសាររថយន្ត២គ្រឿងធ្លាក់ពីផ្លូវជាតិលេខ៤ ចុះពីអាស្រមលោកយាយម៉ៅពេជ្រនិល ចំងាយប្រមាណជា៥០០ម៉ែត្រ ។ អ្នកស្លាប់ត្រូវបានគេស្គាល់ថា ជាក្រុមគ្រួសារគយ ១-លោកឃុត វិរៈខឹម អាយុ៤២ឆ្នាំ ជាមន្ត្រីបំរើការនៅអង្គភាពនាយកដ្ឋានរបបគយនៃទីចាត់ការគយនិងរដ្ឋាករ ២-អ្នកស្រីចាន់ សុធារី ត្រូវជាភរិយា និង២នាក់ទៀតជាកូនស្រីក៏ត្រូវស្លាប់នៅកន្លែងកើតហេតុផងដែរ ។ ចំណែកកូនប្រុសម្នាក់អាយុ១១ឆ្នាំ និងស្រីអ្នកបំរើម្នាក់ស្ថិតក្នុងសភាពរងរបួសយ៉ាងធ្ងន់ធ្ងរ កំពុងទទួលការសង្គ្រោះបន្ទាន់នៅមន្ទីរពេទ្យកាល់ម៉ែត ។ ឧបទ្ទវហេតុខាងលើត្រូវបានសាក្សីឃើញហេតុការណ៍បាននិយាយថា នៅវេលាម៉ោង១១និង៤០នាទីព្រឹកថ្ងៃទី៧ មករា មានរថយន្តឡង់គ្រីស័្សរ១គ្រឿង ដែលជារថយន្តរបស់ក្រុមគ្រួសារមន្ត្រីគយរូបនេះបានធ្វើដំណើរពីភ្នំពេញតាមបណ្តោយផ្លូវជាតិលេ ខ៤ ឆ្ពោះទៅកាន់ខេត្តព្រះសីហនុ ។ សាក្សីបន្តថា ក្នុងរថយន្តឡង់គ្រីស្ស័រនោះមានមនុស្សជិះ៦នាក់ ។ លុះបើកដល់ព្រំប្រទល់ខេត្តកំពង់ស្ពឺនិងខេត្តព្រះសីហនុគឺចំណុចបង្គោលគីឡូម៉ែត្រលេខ១ ០៤ រថយន្តម៉ាកឡង់គ្រីស្ស័រនេះបានបើកវ៉ារថយន្តកាមរីឆ្លាម ១គ្រឿង ពណ៌សំបកឪឡឹកវ៉ាផុតចំងាយប្រមាណតែ២៥ទៅ៣០ម៉ែត្រប៉ុណ្ណោះ ក៏ស្រាប់តែមានរថយន្តកុងតឺន័រធុនធ្ងន់១គ្រឿងទៀតបើកមកបញ្ច្រាសទិសគ្នាចំផ្លូវកោងខ្លាំង បានធ្វើឱ្យរថយន្តឡង់គ្រីស្ស័ររបស់មន្ត្រីគយយកចង្កូតគេចពីរថយន្តកុងតឺន័រ បណ្តាលឱ្យរេចង្កូតធ្លាក់ពីលើផ្លូវចូលទៅក្នុងជំរាលជ្រោះពេជ្រនិល ក្រឡាប់ជាច្រើនត្រឡប់ចំងាយពីចិញ្ចើមផ្លូវប្រមាណ២០ម៉ែត ធ្វើឱ្យអ្នកជិះក្នុងរថយន្តស្លាប់ និងរបួស និងក្លាយជាសោកនាដកម្មសំរាប់គ្រួសារមួយ គួរឱ្យអាណោចអាធ័មបំផុត ។ចំណែករថយន្តម៉ាកកាមរី ឆ្លាម ពេលឃើញហេតុការណ៍នៅចំពីមុខចំងាយពីគ្នាប្រមាណ២៥ម៉ែត្រ បែបនេះក៏បានស្លន់ស្លោជាន់ហ្វ្រាំងយ៉ាងគំហុកបណ្តាលឱ្យរេចង្កូតក្រឡាប់ធ្លាក់ពីលើផ្លូវជា តិដែរ តែបានដើមឈើ និងវល្លិជួយទប់ ។ ទោះបីជាបែបណា អ្នកបើកបររបួសធ្ងន់ត្រូវបានបញ្ជូនទៅមន្ទីរពេទ្យខេត្តកោះកុង និងស្ត្រីម្នាក់បានរួចផុតពីគ្រោះ ថ្នាក់ដែលរថយន្តនេះជិះគ្នា២នាក់ ។ ក្រោយពីហេតុការណ៍កើតឡើងរយៈពេលច្រើនម៉ោង ទើបគេឃើញសមត្ថកិច្ចនគរបាលចរាចរស្រុកភ្នំស្រួច ខេត្តកំពង់ស្ពឺ ទៅដល់កន្លែងកើតហេតុ បានដុតដៃដុតជើងគាស់យកសព និងអ្នករបួសចេញពីក្នុងរថយន្តឡង់គ្រីស្ស័រ ដែលក្រឡាប់របើកដំបូលខ្ទេចខ្ទី។ លទ្ធផល ភ្លាមៗនៅក្នុងរថយន្តនេះ មានមនុស្ស៤នាក់ត្រូវស្លាប់ គឺមន្ត្រីគយ និងភរិយា ព្រមទាំងកូនស្រី២នាក់ និងនៅមានជីវិត២នាក់គឺកូនប្រុសអាយុ១១ឆ្នាំ និងអ្នកបំរើស្ថិតក្នុងស្ថានភាពរបួសធ្ងន់ធ្ងរណាស់ ។បន្ទាប់ពីយកសពចេញពីរថយន្តហើយ សមត្ថកិច្ចបានរុំយ៉ាងត្រឹមត្រូវនូវសពទាំង៤រួចបញ្ជូនមកកាន់រាជធានីភ្នំពេញ និងអ្នករបួសត្រូវបានបញ្ជូនទៅកាន់មន្ទីរពេទ្យកាល់ម៉ែត ។ ចំណែកសពត្រូវបាននាំទៅតំកល់នៅអាសយដ្ឋានរបស់សពនៅសង្កាត់បឹងរាំង ខណ្ឌដូនពេញ ដើម្បីធ្វើបុណ្យតាមប្រពៃណី ។ នៅម៉ោងប្រមាណជាង៥រសៀលថ្ងៃដដែលនគរបាលខេត្តកំពង់ស្ពឺបានស្ទូចរថយន្តទាំង២គ្រឿងនាំយកទៅរ ក្សាទុក ។ ប្រភពព័ត៌មានពីសមត្ថកិច្ចដែលបានទៅពិនិត្យកន្លែងកើតហេតុបានអះអាងថា រថយន្តឡង់គ្រីស្ស័រពិតជាបើកវាក់នឹងរថយន្តកុងតឺន័រមែន បន្ទាប់ពីបើកវ៉ានៅចំណុចផ្លូវកោង ទើបបណ្តាលឱ្យគ្រោះថ្នាក់បែបនេះ ។ មិនតែប៉ុណ្ណោះ បណ្តាលឱ្យគ្រោះថ្នាក់ដល់រថយន្តកាមរីឆ្លាម១គ្រឿងទៀតដែលកំពុងបើកបរតាមផ្លូវនិងដែលគេវ៉ា ផុតបន្តិច ៕
