ខេត្តស្វាយរៀង ៖ រថយន្តដឹកឈើអារចំនួន២គ្រឿងត្រូវសមត្ថកិច្ចចំរុះ និងមន្ត្រីមន្ទីរសាធារណការ និងដឹកជញ្ជូនខេត្តឃាត់ត្រួតពិនិត្យកាលពីថ្ងៃទី១១ មករា វេលាម៉ោង១២អធ្រាត្រនៅត្រង់ចំណុចថ្នល់កែងភូមិបាក់រនាស់ សង្កាត់សង្ឃ័រ ក្រុងស្វាយរៀង ។ រថយន្ត២គ្រឿងនោះម៉ាកមីតស៊ុយប៊ីស៊ី ពណ៌ស យីឌុបភ្លៅ៥ ពាក់ស្លាកលេខក្រ.ព្រះសីហនុ៣A០០៧៧ ផ្ទុកឈើអារចំនួន២០ម៉ែត្រគូប និងរថយន្តម៉ាកហ៊ីយ៉ាន់ដាយ ពណ៌ស ភ្លៅ៥យីឌុប ពាក់ស្លាកលេខភ្នំពេញ៣A២៩៩៨របស់ក្រុមហ៊ុនសល សុភាព ពាណិជ្ជដឹកឈើអារចំនួន២០ម៉ែត្រគូប ។មន្ត្រីជំនាញឱ្យដឹងថា សំរាប់រថយន្ត១គ្រឿងទំងន់សរុប២៥តោន តែពេលក្រុមការងារត្រួតពិនិត្យ និងថ្លឹងឃើញថា ទំងន់ផ្ទុកសរុប៤៥តោន គឺលើសរហូត២០តោន ម្យ៉ាងទៀតផ្លូវជាតិលេខ១៣ពីបាក់រនាស់ទៅស្រុករមាសហែកទៅកាន់ផ្លូវជាតិថ្មី ក្របៅ ខេត្តកំពង់ចាម គឺជាផ្លូវហាមឃាត់មិនឱ្យរថយន្តធុនធំយីឌុបដឹកទំនិញធ្វើចរាចរទេ ដោយសារស្ពានទឹកវិល ស្រុករមាសហែកជាស្ពានបាឡេត៍ទ្រទំងន់បានតែ១៥តោនប៉ុណ្ណោះ ចំណែកលូស្ពានតូចមិនអាចទ្រទំងន់ពី៤៥ទៅ៥០តោនបានទេ ។ស្ពានទឹកវិលក្នុងស្រុករមាសហែកជាស្ពានតូចឆ្លងកាត់ទន្លេងាយបាក់ស្រុតខ្លាំងណាស់ និងផ្លូវជាតិលេខ១៣ទើបតែកសាងរួចបាន៣ខែប៉ុណ្ណោះក៏ត្រូវបាក់ស្រុតបែកជ្រាយក្រហេងក្រហ ូងអស់ដោយសារក្រុមឈ្មួញដឹកស្រូវ ដឹកឈើនៅពេលយប់ ព្រមទាំងធ្វើឱ្យខូចស្ពានផងដែរ ។ ដូច្នេះហើយទើបលោកអភិបាលខេត្តចាត់ឱ្យក្រុមសមត្ថកិច្ចយាមទាំងយប់ថ្ងៃដើម្បីត្រួតពិនិត ្យមើលរថយន្តដែលប្រព្រឹត្តបទល្មើស ហើយជួបរថយន្ត២គ្រឿងរបស់ក្រុមហ៊ុនសល សុភាព ពាណិជ្ជ ដែលដឹកឈើតាមផ្លូវជាតិលេខ១៣ឆ្លងកាត់ស្ពានទឹកវិលរមាសហែក ។រថយន្តដឹកឈើទាំងពីរគ្រឿងនេះដឹកចេញពីខេត្តស្ទឹងត្រែងឆ្លងកាត់ខេត្តក្រចេះ ខេត្តកំពង់ចាមចូលខេត្តស្វាយរៀងដោយមានចុះហត្ថលេខាពីលោកគាំ សីហា នាយករងផ្នែករដ្ឋបាលព្រៃឈើស្ទឹងត្រែង ។ អាជ្ញាធរព្រួយបារម្ភអំពីការស្រុតស្ពាន លូ និងខូចថ្នល់បើមិនទប់ស្កាត់ការដឹកលើសចំណុះទេ ៕
