រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី១១ មករា បានបើកសវនាការផ្តន្ទាទោសជនបរទេសចំនួន៣នាក់ដែលមានជនជាតិនេប៉ាល់ និងបង់ក្លាដេស ពាក់ព័ន្ធនឹងសំណុំរឿងមានគំរោងធ្វើភេរវកម្មលើស្ថានទូត៣នៅក្នុងប្រទេសកម្ពុជា ។ ទោះបីជាបែបណា សវនាការសាកសួរមិនទាន់បានបញ្ចប់នៅឡើយទេ ហើយប្រធានក្រុមប្រឹក្សាបានប្រកាសលើកពេលសវនាការបន្តទៅថ្ងៃទី២១ មករា ខាងមុខទៀត ។សវនាការនេះមានលោកស៊ិន វិសាល ប្រធានក្រុមប្រឹក្សា លោកលឹម មករន្ទ និងលោកស្រីគឹម ដានី ចៅក្រមអម ព្រមទាំងលោកហ៊ឹង ប៊ុនជា ព្រះរាជអាជ្ញារងតំណាងអយ្យការ ។ អង្គសវនាការបានធ្វើឡើងចំពោះមុខជនដែលត្រូវចោទ ១-ឈ្មោះឌីប ពីផូយ៉ាល់ ភេទប្រុស អាយុ៤៤ឆ្នាំ ជនជាតិនេប៉ាល់, ២-ឈ្មោះរ៉ាហ៊ីកាល់អ៊ីស្លាម ភេទប្រុស អាយុ៤២ឆ្នាំ ជនជាតិបង់ក្លាដេស, ៣-ឈ្មោះម៉ាមី យ៉ាម៉ូម៉ាប់ម៉ាន់ហ៊ុយម៉ាយ៉ុន ភេទប្រុស អាយុ៦២ឆ្នាំ ហើយក៏មានការសាកសួរដេញដោលរវាងមេធាវីដើមចោទ និងចុងចោទតាមរយៈការបកប្រែភាសាអង់គ្លេសផងដែរ ។អង្គហេតុនៃការចាប់ខ្លួននាំឱ្យមានការចោទប្រកាន់នេះ ផ្តើមចេញកាលពីខែមេសា ឆ្នាំ២០១០ កន្លងទៅមានជនមិនស្គាល់មុខបានយកលិខិតមួយទៅទំលាក់ចោលក្នុងភោជនីយដ្ឋានរបស់ឈ្មោះរ៉ាហ៊ ីកាល់ អ៊ីស្លាម ដែលក្នុងលិខិតនេះមានបង្កប់ទៅដោយអត្ថន័យថា មានជនអាល់កៃដា៤នាក់បានឆ្លងចូលក្នុងតំបន់អាស៊ីយើងនេះ ហើយមានគំរោងប៉ុនប៉ងធ្វើភេរវកម្មលើស្ថានទូត៣ គឺស្ថានទូតអង់គ្លេស អូស្ត្រាលី និងអាមេរិក ។ ដោយយោងលើលិខិតបែបភេរវកម្មនោះ សមត្ថកិច្ចនគរបាលក្រសួងមហាផ្ទៃបានធ្វើការស៊ើបអង្កេត និងស្រាវជ្រាវយ៉ាងយកចិត្តទុកដាក់អស់រយៈពេលជិត១ខែ លុះនៅថ្ងៃទី២០ ឧសភា ទើបឃាត់ខ្លួនជនសង្ស័យទាំង៣នាក់នៅមុខផ្សារប៊ីកអេ ក្នុងសង្កាតបឹងរាំង ខណ្ឌដូនពេញ ដោយសង្ស័យទៅលើក្រុមនេះថា ជាអ្នករៀបចំធ្វើលិខិតនោះឡើង ។ក្រោយពីត្រូវសមត្ថកិច្ចនគរបាលក្រសួងមហាផ្ទៃឃាត់ខ្លួន ជនទាំង៣នាក់ត្រូវបានបញ្ជូនទៅកាន់សាលាដំបូងរាជធានីភ្នំពេញ ហើយចៅក្រមស៊ើបសួរក៏សំរេចឃុំខ្លួនចាប់តាំងពីពេលនោះមក ។ ការឃុំខ្លួនដើម្បីធ្វើការស៊ើបអង្កេតមានរយៈពេលជាច្រើនខែ និងទើបនៅព្រឹកថ្ងៃទី១១ មករា សាលាដំបូងរាជធានីបានលើកយករឿងនេះមកបើកសវនាការ ៕