រាជធានីភ្នំពេញ ៖ ម៉ូតូស៊េរីទំនើបមួយគ្រឿងដែលម្ចាស់ខ្ចីលុយគេទិញជិះ ទើបបានរយៈពេល៤ថ្ងៃ ហើយនៅពេលយប់ចាក់សោទុកនៅក្នុងផ្ទះយ៉ាងត្រឹមត្រូវមិនហ៊ានធ្វេសប្រហែសនោះទេ ប៉ុន្តែនៅពេលម្ចាស់ដេកលង់លក់ ក៏មានក្រុមចោរគាស់បង្អួចចូលទៅលួចយកបាត់រហូតដល់វេលារំលងអធ្រាត្រ ទើបដឹងថា បាត់ហើយនាំគ្នាភ្ញាក់ផ្អើលចេញដើររកគ្រប់ទិសទី ប៉ុន្តែពុំបានប្រទះឃើញឡើយ ។ ហេតុការណ៍ភ្ញាក់ផ្អើលបាត់ម៉ូតូនេះ បានកើតឡើងកាលពីវេលាម៉ោង២និង៤៥នាទីរំលងអធ្រាត្រ ឈានចូលថ្ងៃទី៥ មករា ឆ្នាំ២០១១ នៅក្នុងភូមិពងទឹក សង្កាត់ពងទឹក ខណ្ឌដង្កោ ។ម៉ូតូដែលត្រូវក្រុមចោរលួចយកទៅនោះ ម៉ាកហុងដា C125 ស៊េរីឆ្នាំ២០១១ ពណ៌ខ្មៅ ពាក់ស្លាកលេខ 1AQ-1352 ជាកម្មសិទ្ធិរបស់បុរសឈ្មោះអ៊ូ កុល អាយុ៤៦ឆ្នាំ ជាកសិករ និងជាម្ចាស់ផ្ទះខាងលើ ។ តាមប្រភពព័ត៌មានបានឱ្យដឹងថា នៅមុនពេលកើតហេតុម្ចាស់បានទុកម៉ូតូនោះនៅក្បែរម៉ូតូមួយគ្រឿងទៀត ម៉ាកហុងដា C125 ស៊េរីឆ្នាំ២០០៨ ឡើងតែមប្រិ៍ឆ្នាំ២០១១ នៅក្នុងបន្ទប់ក្រោមផ្ទះ ហើយក្រុមគ្រួសារក៏ដេកនៅក្នុងនោះដែរ ដោយបិទទ្វារចាក់សោត្រឹមត្រូវ ។ បន្ទាប់ពីទុកដាក់របស់ទ្រព្យរួចរាល់ហើយ ម្ចាស់ក៏បានដេកលង់លក់រហូតដល់វេលារំលងអធ្រាត្រ ទើបភ្ញាក់ហើយបើកភ្លើងមើលម៉ូតូ ស្រាប់តែបាត់មិនឃើញក៏មានការភ្ញាក់ផ្អើលឆោឡោទាំងយប់ ។ដោយឡែក ក្រុមចោរក្រោយពីយកម៉ូតូចេញហើយ ពួកគេបានយកខ្សែចងទ្វារបន្ទប់ពីខាងក្រៅជាប់ធ្វើឱ្យម្ចាស់បើកទ្វារមិនរួចភ្លាមៗទ េ រហូតមួយសន្ទុះធំ ទើបទាញទ្វារបើកបាននិងនាំគ្នាដើររកម៉ូតូគ្រប់ទីកន្លែង ប៉ុន្តែសូម្បីតែស្រមោលបន្តិចក៏មិនឃើញផង ។ ប្រភពដដែលបានបន្តទៀតថា គេមិនដឹងថា ក្រុមចោរមានគ្នាប៉ុន្មាននាក់ទេ បានធ្វើសកម្មភាពកាត់របងលួសចូលបន្ទាប់មកគាស់បង្អួចក្បែរចង្ក្រានបាយចូលទៅក្នុងបន្ទប់ក ្រោមផ្ទះ ហើយលួចយកម៉ូតូ ចេញបាត់ដោយសុវត្ថិភាព ។ ប្រជាពលរដ្ឋបានឱ្យដឹងថា កន្លងមក ផ្ទះនៅជិតនោះត្រូវក្រុមចោរបំពុលឆ្កែ និងលួចយកធុងបាស់ ព្រមទាំងរថយន្តម៉ាកទីកូអស់១គ្រឿងម្តងមកហើយ លុះពេលនេះក្រុមចោរបានធ្វើសកម្មភាពលួចម៉ូតូនៅផ្ទះជិតគ្នានេះទៀត ដោយមិនខ្លាចញញើតអ្វីទាំងអស់ ព្រោះពួកគេធ្លាប់ធ្វើសកម្មភាពបានសំរេចរហូត ៕