រាជធានីភ្នំពេញ​​ ៖ ​យោង​តាម​ប្រភពស្និទ្ធ​​​នឹង​អង្គ​ការ​ប្រឆាំង​អំពើ​ពុករលួយ​​​​បាន​​​ខ្សឹបប្រាប់​​​ឱ្យ​​ដឹង​ថា លោកម៉ឹក ដារ៉ា ​បន្ទាប់ពីបញ្ជូន​ត្រឡប់​មក​កាន់​​រាជធានីភ្នំពេញ​​​វិញ​នោះ កាលពីរសៀល​​ថ្ងៃ​​ទី ​១៧ មករា ​២០១១ ​ត្រូវបញ្ជូនទៅ​ឃុំខ្លួន​បណ្តោះអាសន្ន​​នៅពន្ធនាគារ​​ព្រៃ.ស​​​បាត់​ហើយ​ ដើម្បី​​​​​រង់ចាំ​ធ្វើ​ការ​​ស៊ើបអង្កេត​​​ គឺធ្វើឡើង​​យ៉ាង​ប្រញាប់​​ប្រញាល់ និង​ស្ងៀម​ស្ងាត់​​បំផុត ។​​សូមបញ្ជាក់​ថា ​បន្ទាប់ពី​​សាក​សួរ​យ៉ាង​សកម្ម​នៅ​ពេលយប់​ទៅលើ​​លោកម៉ឹក ដារ៉ា ​​និង​លោក​ជា ឡេង ​ពាក់ព័ន្ធ​​បទល្មើស​​​គ្រឿង​ញៀន​​​ក្នុង​តុលា​ការ​​​ខេត្តបន្ទាយមានជ័យ ​កាលពី​​យប់ថ្ងៃទី​​​១៦ មករា នោះ មក​ដល់​ព្រឹកថ្ងៃទី​​​១៧ មករា ​២០១១ ​ត្រូវ​បាន​មន្ត្រី​​តុលាការ​​ខេត្ត​បង្ហើប​​​ឱ្យ​​ដឹង​​ថា លោកម៉ឹក ដារ៉ា ​ត្រូវ​បានបញ្ជូន​​​មក​កាន់​​​អង្គ​ភាព​ប្រឆាំង​​អំពើ​ពុករលួយ​​រាជ​ធានី​ភ្នំពេញ​វិញ ​យ៉ាង​ប្រញាប់​ប្រញាល់ ដើម្បី​​សំរេច​ថា តើ​​ត្រូវ​​បញ្ជូន​ទៅតុលាការ​​ ឬយ៉ាង​ណា​? ចំណែក​​លោក​​​ជា ឡេង ត្រូវ​បញ្ជូន​ទៅឃុំ​ខ្លួន​បណ្តោះ​អាសន្ន​នៅពន្ធនាគារ​​ខេត្ត ដើម្បី​​ធ្វើការ​​ស៊ើប​​​អង្កេត​ និង​សាក​សួរ​​បន្ត​នៅ​តុលាការ​​​ខេត្ត​បន្ទាយ​មានជ័យនេះ ។​អគ្គ​លេខាធិការ​អាជ្ញា​ធរ​​​ប្រឆាំង​​​គ្រឿងញៀន​​ លោកម៉ឹក ដារ៉ា ​និង​លោក​​​ជា ​​ឡេង ប្រធាន​​ការិ​យា​ល័យ​​នៃ​​មន្ទីរ​ប្រឆាំង​​គ្រឿង​​ញៀន​ក្រសួង​មហា​​ផ្ទៃ​ ដែល​ជួប​ប្រទះ​រឿង​អាស្រូវ​ពុករលួយ​ពាក់ព័ន្ធ​​គ្រឿង​ញៀន ​និង​បទ​ល្មើស​​​មួយ​ចំនួន​​​ទៀត​​នោះ​​ ត្រូវ​​បាន​​​ចៅក្រម​សាលា​ដំបូង​​ខេត្ត​បន្ទាយ​មានជ័យ ធ្វើការ​សាក​សួរ​​ទាំង​យប់​ និង​បន្ត​​មក​ដល់​​ព្រឹក​ថ្ងៃទី​​​​​​១៧ មករា ២០១១ ​មួយ​ភ្លែត​ទៀត​ ដើម្បី​​​ចាត់​ការ​​តាម​ច្បាប់​​ បន្ទាប់ពី​អង្គ​ភាព​​ប្រឆាំង​អំពើពុក​រលួយ​បាន​បញ្ជូន​ពួក​​លោក​ទៅ​ដល់ទីនោះ​​កាលពី​វេលា​ម៉ោង​​ប្រមាណ​​ជ ាង​៧​យប់​ថ្ងៃទី​១៦ មករា ម្សិល​មិញ​ ។​​​មុន​នេះ​បន្តិច កោះសន្តិភាព​​ពិបាក​ស្វែង​រក​​ប្រភព​ព័ត៌​មាន​​ពេកណាស់ ដោយ​ខាង​សមត្ថ​កិច្ច​​ពាក់ព័ន្ធ​​​គេ​លាក់​លៀម​​រឿង​នេះ​ដូចជា​ លោក​សួន ​រចនា នាយក​អយ្យការ​​​សាលា​ដំបូង​​​ខេត្ត​បន្ទាយ​មាន​ជ័យ ​បាននិយាយ​ថា ​រឿង​បញ្ជូន​លោកម៉ឹក​ ដារ៉ា ​មក​កាន់តុលាការ​​​​ខេត្ត​​បន្ទាយ​មានជ័យនេះ លោក​​មិនបាន​ដឹង​ទេ ព្រោះ​លោក​កំពុងស្ថិត​​នៅខាង​ក្រៅ​​...លោក​ឱម យ៉ីនទៀង ​ប្រធាន​​អង្គ​​ភាព​ប្រឆាំង​​អំពើ​ពុក​រលួយ ទូរស័ព្ទ​​មិនចូល​...​លោក​កែវ រ៉េ​មី អ្នក​នាំ ពាក្យ​​​​អង្គ​ភាព​ប្រឆាំង​អំពើ​ពុករលួយ​ ទូរស័ព្ទ​​​ចូល​ហើយ​មិន​​ព្រម​​ទទួល​...។ ប៉ុន្តែ​​​​មន្ត្រី​តុលា​ការ​​​​ខ្សឹប​ប្រាប់​ថា ​លោកម៉ឹក ដារ៉ា ​​​​ត្រូវ​បាន​​ព្រះរាជ​​អាជ្ញា​រង​សាលា​ដំបូង​រាជធានី​ភ្នំពេញ នាំ​ខ្លួនទៅ​​ដាក់គុក​ព្រៃ.ស​​កាលពីវេលាម៉ោង​​ជាង​១រសៀល ថ្ងៃ​ទី​​​១៧ មករា ២០១១ នេះ បាត់ទៅ​ហើយ ។គួររំលឹក​​ថា នៅ​ឯ​ខេត្ត​បន្ទាយ​មានជ័យ​​​ឯណោះ​​វិញ លោក​​ចៅក្រម​អាំង មាលតី ​ប្រធាន​សាលា​ដំបូង​​ខេត្ត​បន្ទាយមាន​ជ័យ​ ជា​អ្នក​សាក​សួរ​​លោកម៉ឹក ដារ៉ា, ​ចំណែក​លោក​​​ជា ឡេង ត្រូវចៅក្រម​​​ធាម ច័ន្ទ​ពិសិដ្ឋ ​ជា​អ្នកសាកសួរ​...​មក​ដល់​​ព្រឹកថ្ងៃទី​​​១៧ មករា អ្នក​ទាំង​​​២​ត្រូវ​ចៅ​ក្រម​​សាកសួរ​​រួច​រាល់ហើយ ។ លោក​ម៉ឹក ដារ៉ា ​ត្រូវ​បាន​​ចាត់​​បញ្ជូន​​មក​កាន់​​​រាជ​ធានី​ភ្នំពេញ​វិញ និង​​បន្ត​ទៅ​ដាក់​គុក​ព្រៃ.ស​ ចំណែក​លោកជា ឡេង ត្រូវឃុំ​ខ្លួន​​បណ្តោះ​អាសន្ន​​​នៅក្នុង​ពន្ធនា​គារ​​​ខេត្ត​បន្ទាយ​មានជ័យ​​​​ ដើម្បី​​ធ្វើ​ការ​​ស៊ើប​អង្កេត​ និង​សាក​សួរ​បន្ត​ ៕​