រាជធានីភ្នំពេញ ៖ អតីតអគ្គលេខាធិការអាជ្ញាធរជាតិប្រឆាំងគ្រឿងញៀន លោកម៉ឹក ដារ៉ា ដែលមានរឿងអាស្រូវពុករលួយពាក់ព័ន្ធគ្រឿងញៀន និងបទល្មើសមួយចំនួនទៀតនោះត្រូវបានប្រភពព័ត៌មានក្រៅផ្លូវការបង្ហើបឱ្យដឹងក ាលពីរសៀលថ្ងៃទី១៦ មករា ២០១១ ថា ត្រូវបញ្ជូនទៅកាន់តុលាការខេត្តបន្ទាយមានជ័យ ដើម្បីសាកសួរ និងចាត់ការតាមច្បាប់ ព្រោះជាដើមបណ្តឹង។ពាក់ព័ន្ធនឹងជនត្រូវចោទលោកម៉ឹក ដារ៉ា នេះមិនត្រូវបានសមត្ថកិច្ចជំនាញដូចជាក្រសួងមហាផ្ទៃ ឬអង្គភាពប្រឆាំងអំពើពុករលួយប្រាប់ឱ្យដឹងថា នឹងត្រូវបញ្ជូនទៅកាន់តុលាការណាមួយនោះទេ? ទាំាំងតុលាការរាជធានីភ្នំពេញ ឬតុលាការខេត្តបន្ទាយមានជ័យជាដើម ។ អ្នកនាំពាក្យក្រសួងមហាផ្ទៃ លោកឧត្តមសេនីយ៍ឯកខៀវ សុភ័គ បានមានប្រសាសន៍ថា ចំពោះលោកម៉ឹក ដារ៉ា ត្រូវបានបញ្ជូនទៅកាន់អង្គភាពប្រឆាំងអំពើពុករលួយរួចហើយ រីឯរឿងថា គេបញ្ជូនទៅតុលាការណាបន្តទៀតនោះ លោកមិនដឹងទេ ។លោកសួន រចនា នាយកអយ្យការសាលាដំបូងខេត្តបន្ទាយមានជ័យ បាននិយាយថា រឿងបញ្ជូនលោកម៉ឹក ដារ៉ា មកកាន់តុលាការខេត្តបន្ទាយមានជ័យនេះ លោកមិនបានដឹងទេ ព្រោះលោកកំពុងស្ថិតនៅខាងក្រៅ...។ ប៉ុន្តែមន្ត្រីតុលាការតូចតាចសុំមិនបញ្ចេញឈ្មោះខ្សឹបប្រាប់នៅវេលាម៉ោង៥ល្ងាចថា លោកម៉ឹក ដារ៉ា អាចត្រូវគេបញ្ជូនមកកាន់តុលាការខេត្តបន្ទាយមានជ័យមែន ព្រោះឥឡូវនេះ ឮថា មន្ត្រីតុលាការក្នុងខេត្តនេះកំពុងរង់ចាំការមកដល់របស់លោកម៉ឹក ដារ៉ា ៕
