ខេត្តបាត់ដំបង ៖ កុមារីអាយុ៥ឆ្នាំម្នាក់ ដែលជាសិស្សមត្តេយ្យសាលា២ធ្នូ បានធ្លាក់ពីលើអគារជាន់ទី២នៃសាលានេះ ដែលមានទីតាំងស្ថិតនៅក្នុងភូមិ២០ ឧសភា សង្កាត់ស្វាយប៉ោ ក្រុងបាត់ដំបង កាលពីវេលាម៉ោង១០ព្រឹកថ្ងៃទី១៨ មករា បណ្តាលឱ្យរងរបួសធ្ងន់ ហើយត្រូវគេជួយដឹកយកទៅសង្គ្រោះភ្លាមៗនៅមន្ទីរពេទ្យអង្គការ EMERGENCY ។ កុមារីរងគ្រោះត្រូវគេប្រាប់ថា ឈ្មោះយុន សុភ័ក្ត្រ រស់នៅសង្កាត់ស្លាកែត ក្រុងបាត់ដំបង ។បើតាមអ្នកគ្រូប្រចាំថ្នាក់ដែលមិនប្រាប់ឈ្មោះបាននិយាយថា ពេលកើតមានគ្រោះថ្នាក់នោះកូនសិស្សរបស់គាត់ទាំងអស់ដល់ម៉ោងចេញទៅផ្ទះហើយ ប៉ុន្តែគាត់មិនដឹងថា កូនសិស្សឈ្មោះយុន សុភ័ក្ត្រ ឡើងទៅលើអគារជាន់ទី២ទេ លុះបន្តិចក្រោយមកស្រាប់តែមានការភ្ញាក់ផ្អើលថា នាងធ្លាក់ពីលើអគារសាលាជាន់ទី២ ។ អ្នកគ្រូរូបនេះបានបញ្ជាក់ថា នាងយុន សុភ័ក្ត្រ មិនធ្លាប់ឡើងទៅលើអគារជាន់ទី២នោះទេ ប៉ុន្តែគាត់មិនដឹងថា ព្រឹកនោះនាងឡើងទៅធ្វើអ្វីឡើយ ហើយនាងឡើងនៅពេលម៉ោងចេញទៅផ្ទះទៀត ។សាក្សីដែលបានឃើញផ្ទាល់ភ្នែកនិយាយថា គេឃើញក្មេងស្រីរូបនេះរត់លេងតាមយ៉ជាន់ទី២នៃអគារផ្នែកខាងក្រោយជាមួយក្មេងៗជាច្រើនទៀត ដែលជាសិស្សសាលាដូចគ្នា ។ ខណៈនោះស្រាប់តែឃើញក្មេងស្រីនេះឡើងលើបង្កាន់ដៃលេងរួចក៏របេះដៃធ្លាក់មកដីលាន់ដូចផ្លែដូ ងជ្រុះ ហើយមនុស្សម្នាជាច្រើនបានភ្ញាក់ផ្អើលទៅចោមរោមមើល ។ ក្មេងស្រីរូបនេះរងរបួសជាទម្ងន់ត្រង់ក្បាលផ្នែកខាងឆ្វេង និងសន្លប់បាត់ស្មារតីហើយ ភ្លាមៗនោះត្រូវបានគេដឹកទៅសង្គ្រោះជាបន្ទាន់នៅមន្ទីរពេទ្យអង្គការ EMERGENCY ។បើតាមអាណាព្យាបាលនានានៃសិស្សសាលាមត្តេយ្យ២ធ្នូ និយាយថា ជាទម្លាប់ពេលដល់ម៉ោងទៅផ្ទះក្រុមអាណាព្យាបាលតែងទៅទទួលយកកូនរៀងៗខ្លួនពីអ្នកគ្រូប្រចាំ ថ្នាក់ពួកគេ ។ រីឯអ្នកគ្រូទាំងនោះក៏មានភារកិច្ចថែទាំសិស្សមត្តេយ្យទាំងនោះដែរ រហូតទាល់តែអាណាព្យាបាលពួកគេទៅទទួលដល់សាលាដោយផ្ទាល់ ប៉ុន្តែពេលនេះមិនគួរអ្នកគ្រូដែលទទួលមើលការខុសត្រូវធ្វេសប្រហែសបណ្តាលឱ្យមានគ្រោះថ្នា ក់បែបនេះឡើយ ។ កោះសន្តិភាពបានព្យាយាមសុំការបំភ្លឺពីនាយកគ្រប់គ្រងសាលាមត្តេយ្យ២ធ្នូនេះដែរ ប៉ុន្តែមិនអាចទាក់ទងបាន ៕
