ខេត្តកំពង់ឆ្នាំង ៖ មនុស្សម្នាក់បានស្លាប់នៅនឹងកន្លែងកើតហេតុ និងម្នាក់ទៀតរងរបួសយ៉ាងធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍មួយកាលពីវេលាម៉ោង៥ និង២៥នាទីល្ងាចថ្ងៃទី៧មករា នៅតាមបណ្តោយផ្លូវជាតិលេខ៥ ស្ថិតក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ដែលកើតឡើងដោយម៉ូតូដួលចូលក្រោមរថយន្តដឹកស្រូវ ។ មន្ត្រីប៉ូលិសចរាចរខេត្តបានឱ្យដឹងថា ជនរងគ្រោះដែលស្លាប់ឈ្មោះសុក វណ្ណា ហៅព្រុញ អាយុ២៥ឆ្នាំ ចំណែកអ្នករបួសធ្ងន់ឈ្មោះហង្ស រ័តមុនី អាយុ២៤ឆ្នាំ ។ យុវជនទាំង២នាក់ មានទីលំនៅក្នុងភូមិជ្រៃបាក់ ជិតកន្លែងកើតហេតុ ហើយពួកគេជិះម៉ូតូម៉ាកស្មាស់ ពណ៌ស ពាក់ស្លាកលេខកំពង់ឆ្នាំង 1A 3199 បើកបរក្នុងទិសដៅពីជើងទៅត្បូង ។លោកអៀរ ប៊ុនធឿន នាយការិយាល័យប៉ូលិសចរាចរផ្លូវគោកបានឱ្យដឹងថា រថយន្តដឹកស្រូវមកពីខេត្តពោធិ៍សាត់ ដើម្បីយកទៅដាក់នៅស្រុកកំពង់ត្រឡាច លុះមកដល់ចន្លោះគីឡូម៉ែត្រលេខ៨៥ និងលេខ៨៦ ក៏ស្រាប់តែម៉ូតូដែលជិះ២នាក់ខាងលើបើកក្នុងល្បឿនលឿន ដើម្បីវ៉ា ប៉ុន្តែពេលកំពុងវ៉ាក៏ជួបឧបសគ្គដោយមានរថយន្ត២-៣គ្រឿងមកបញ្ច្រាសទិសគ្នា ។ ពេលនោះអ្នកជិះម៉ូតូជាន់ហ្វ្រាំង ក៏ដួលបោកចូលក្រោមរថយន្តបណ្តាលឱ្យស្លាប់ម្នាក់នៅនឹងកន្លែង និងម្នាក់ទៀតរបួសធ្ងន់ ចំណែកម៉ូតូត្រូវរថយន្តជាន់ខ្ទេចទាំងស្រុងតែម្តង ។សពជនរងគ្រោះត្រូវបានដឹកយកទៅធ្វើបុណ្យតាមប្រពៃណីចំណែកអ្នករបួសដឹកទៅសង្គ្រោះនៅមន្ទីរពេ ទ្យ ។ ដោយឡែករថយន្ត និងម៉ូតូ ត្រូវបានរក្សាទុកនៅការិយាល័យប៉ូលិសចរាចរផ្លូវគោក ដើម្បីរង់ចាំការដោះស្រាយតាមនីតិវិធី ។ លោកនាយការិយាល័យរំលឹកថា អ្នកដែលស្លាប់ក្នុងហេតុការណ៍នេះកន្លងមក ធ្លាប់ជិះម៉ូតូបុកតាយាយបាក់ជើងទាំងពីរនាក់ ដែលកាសែតកោះសន្តិភាពធ្លាប់បានចុះផ្សាយរួចមកហើយ ហើយក៏មានសប្បុរសជនអាណិតជួយដល់តាយាយផងដែរ ៕
