ខេត្តកំពង់ស្ពឺ ៖ បុរសម្នាក់បានធ្វើអត្តឃាតដោយយកកាំបិតចិតបន្លែចាក់ចំចុងដង្ហើមរបស់ខ្លួនបានត្រឹមពាក់ក ណ្តាលផ្លែក៏យកទ្រូង និងកាំបិតមុតនោះទៅបុកផ្អឹបនឹងដើមកន្ទួតបន្ថែមឱ្យលិចកាន់តែជ្រៅ ស្លាប់ជួយមិនទាន់ ដោយសារសកម្មភាពបុរសនោះរហ័សពេក ទើបអ្នកនៅក្បែរខាងស្ទុះទៅជួយសង្គ្រោះពុំទាន់ ។ មន្ត្រីប៉ូលិសមូលដ្ឋានស្រុកភ្នំស្រួចបានរាយការណ៍បន្ទាន់ថា បានកើតឡើងនៅវេលាម៉ោង៨និង៣០នាទីព្រឹកថ្ងៃទី១៥ មករា នៅតូបលក់បបរមួយក្នុងភូមិក្រាំងពោធិ៍ ឃុំអូរ ស្រុកភ្នំស្រួច ។បុរសឈ្មោះខាត់ តឿ អាយុ៣៦ឆ្នាំ មានប្រពន្ធកូនពីរនាក់ក្នុងបន្ទុក ដែលក្នុងគ្រួសាររស់នៅពុំចុះសំរុងគ្នា ព្រោះតែបុរសរូបនេះប្រមឹកខ្លាំង ហើយពុំយកចិត្តទុកដាក់ជួយរកស៊ីចិញ្ចឹមប្រពន្ធកូនសោះ ។ មន្ត្រីប៉ូលិសព្រហ្មទណ្ឌស្រុកភ្នំស្រួចបានរៀបរាប់បន្តថា ឈ្មោះខាត់ តឿ នេះមានស្រុកកំណើតភូមិតាំងស្រឡៅ ឃុំតាំងស្យា ស្រុកភ្នំស្រួច មានប្រពន្ធនៅភូមិក្រាំងពោធិ៍ ឃុំអូរ ស្រុកភ្នំស្រួចដែរ ។ ការរស់នៅរវាងបុរសរូបនេះ និងប្រពន្ធមានកូន២នាក់ក្នុងបន្ទុក បុរសរូបនេះចេះតែពីយកប្រាក់ប្រពន្ធដែលរកបានទៅផឹកស្រាស្រវឹងដាបរាល់ថ្ងៃ ហើយពុំចេះជួយធ្វើការរកចំណូលជួយគ្រួសារ ទើបប្រពន្ធចេះតែសោះអង្គើយ ពុំរវល់នឹងប្តីទេ ខិតខំតែរកស៊ីចិញ្ចឹមកូន ។នៅព្រឹកថ្ងៃកើតហេតុ ឈ្មោះខាត់ តឿ បានដើរចេញពីផ្ទះទៅរកបបរហូបក្នុងតូបក្បែរផ្លូវលំមួយក្នុងភូមិពោធិ៍នេះដែរ ពុំដឹងជាមូលហេតុអ្វី ក៏ស្រាប់តែយកកាំបិតចិតបន្លែពីអ្នកលក់បបរនេះមកកាន់នៅដៃ ហើយក៏យកមកតំរង់ចាក់ចំចុងដង្ហើមរបស់ខ្លួន ដោយប្រាប់គេឯងថា តូចចិត្តណាស់ ។ កាយវិការនេះរហ័សរកជឿពុំបានខណៈដែលបុរសរូបនេះចាក់ខ្លួនឯងចំចុងដង្ហើម លិចពាក់កណ្តាលផ្លែកាំបិត ហើយក៏ស្ទុះទៅបុកផ្ទប់នឹងដើមកន្ទួតក្បែរនោះ បណ្តាលឱ្យកាំបិតចុងស្រួចមុតលិចដល់គល់ ហើយក៏ទន់ខ្លួនដួលដេកស្លាប់ដោយអ្នកនៅជិតពុំអាចជួយសង្គ្រោះបាន ។ សពត្រូវបានឪពុកម្តាយ យកទៅធ្វើបុណ្យនៅឯភូមិកំណើត ៕