ខេត្តកំពង់ធំ ៖ ក្មេងស្រីម្នាក់អាយុ៩ឆ្នាំ ពេលកំពុងលង់លក់ក្នុងដំណេកនៅក្រោមផ្ទះ ត្រូវជនមិនស្គាល់មុខម្នាក់ ចូលទៅចាប់បីយកទៅរំលោភសេពសន្ថវៈនៅក្រោយផ្ទះ រហូតបានសំរេចហើយក៏រត់គេចខ្លួនបាត់ ។ ហេតុការណ៍នេះកើតឡើងនៅវេលាម៉ោង១១ និង៣០នាទីយប់ថ្ងៃទី៦ មករា ២០១១ នៅភូមិសង់ឃ្លាំង ឃុំតាំងក្រសាំង ស្រុកសន្ទុក ។ សមត្ថកិច្ចស្រុកសន្ទុកបានឱ្យដឹងថា ក្មេងស្រីរងគ្រោះដែលជាអនីតិជនអាយុ៩ឆ្នាំ មានឪពុកអាយុប្រហែល៤០ឆ្នាំ និងម្តាយអាយុជាង៣០ឆ្នាំ ។នៅយប់កើតហេតុ ក្នុងភូមិមានគេចាក់ធុងបាស់រាំកំសាន្ត ចំណែកក្មេងស្រីរងគ្រោះអត់បានទៅមើលគេរាំលេងទេ គឺនាងដេកជាមួយប្អូនលើគ្រែក្រោមផ្ទះ ដោយមានឪពុកចងអង្រឹងដេកក្បែរគ្រែនោះដែរ ។ លុះដល់ពេលយប់ជ្រៅពួកគេរាំធុងបាស់ចប់ ស្រាប់តែមានជនមិនស្គាល់មុខម្នាក់ ឆ្លៀតពេលដែលឪពុក និងកូនលង់លក់ក្នុងដំណេកក៏ចូលមកបីក្មេងស្រីរងគ្រោះដើរសំដៅគុម្ពប្ញស្សីពីងពង់ ដែលនៅក្រោយផ្ទះជនរងគ្រោះប្រហែល៥០ម៉ែត្រ ។ ពេលនោះជនល្មើសក៏ដាក់នាងផ្តេកក្បែរគុម្ពប្ញស្សី ស្រាប់តែនាងដឹងខ្លួនភ្ញាក់ពីដំណេកភ័យរន្ធត់យ៉ាងខ្លាំងព្យាយាមស្រែកឱ្យឪពុកជួយដែរ តែត្រូវជនល្មើសចាប់ខ្ទប់មាត់ និងច្របាច់ករហូតនាងសន្លប់បាត់ស្មារតី ទើបធ្វើសកម្មភាពរំលោភសេពសន្ថវៈរហូតបានសំរេចហើយក៏រត់គេចខ្លួនបាត់ស្រមោលតែម្តង ។ ពេលងើបពីសន្លប់ក្មេងស្រីរងគ្រោះ ក៏ស្រែកទ្រហោយំហៅឱ្យឪពុកជួយ ភ្លាមនោះឪពុកក៏ភ្ញាក់ពីដំណេកឃើញកូនតែម្នាក់ដេកលើគ្រែ ក៏ស្ទុះរត់ទៅកន្លែងដែលឮក្មេងយំ ស្រាប់តែឃើញកូនស្រីប្រឡាក់សុទ្ធតែឈាមដោយត្រូវរបួសផ្លូវភេទយ៉ាងធ្ងន់ធ្ងរ ក៏ស្រែកហៅម្តាយឱ្យជួយនាំយកទៅផ្ទះពេទ្យក្នុងភូមិ ដើម្បីព្យាបាលរបួស ។ចំណែកសមត្ថកិច្ចបន្ទាប់ពីបានទទួលដំណឹងនេះភ្លាម បាននាំគ្នាចុះទៅកន្លែងកើតហេតុ ដើម្បីពិនិត្យ និងសាកសួរក្មេងស្រីរងគ្រោះ និងឪពុកម្តាយ ហើយត្រូវបានពួកគេនិយាយរៀបរាប់ដូចខាងលើ ព្រមទាំងបញ្ជាក់ថា ពួកគេមិនស្គាល់មុខ និងអត្តសញ្ញាណរបស់ជនល្មើសទេ ព្រោះពេលនោះយប់ងងឹតពេកដែលធ្វើឱ្យសមត្ថកិច្ចជួបការលំបាកក្នុងការស្រាវជ្រាវ ។ តែសមត្ថកិច្ចបានធ្វើការសន្និដ្ឋានថា ជនល្មើសគឺជាមនុស្សដែលធ្លាប់ចេញចូលមកលេងផ្ទះក្មេងស្រីរងគ្រោះ ហេតុនេះហើយទើបគេដឹងថា ក្មេងស្រីរងគ្រោះដេកក្រោមផ្ទះ ហើយក៏ឆ្លៀតធ្វើសកម្មភាពឃោរឃៅព្រៃផ្សៃ ឧក្រិដ្ឋ និងអគតិបែបនេះទៅ ។ បច្ចុប្បន្នសមត្ថកិច្ចកំពុងចុះធ្វើការស៊ើបអង្កេត និងស្រាវជ្រាវស្វែងរកចាប់ជនល្មើស ដើម្បីនាំមកផ្តន្ទាទោសតាមច្បាប់ ។គួររំលឹកថា ក្នុងសបា្តហ៍កន្លងទៅ នៅខេត្តកំពង់ធំមានកើតអំពើចាប់រំលោភសេពសន្ថវៈចំនួន២ករណីគឺ នៅស្រុកសណ្តាន់ និងស្រុកបារាយណ៍ ។ ក្នុងនោះកាលពីថ្ងៃទី២៩ ធ្នូ ២០១០ វេលាម៉ោង១២ថ្ងៃត្រង់ នៅចំណុចចំការស្វាយចន្ទី ក្នុងភូមិសាស្ត្រឃុំមានជ័យ ស្រុកសណ្តាន់ មាននារីអាយុ៣៦ឆ្នាំ ម្នាក់ត្រូវជនសង្ស័យឈ្មោះព្រំទិត អាយុ៤៨ឆ្នាំ រស់នៅភូមិ-ឃុំជាមួយគ្នាចាប់រំលោភរហូតបានសំរេចក្រោយពេលកើតហេតុជនសង្ស័យត្រូវសមត្ថកិច្ចឃាត់ខ ្លួន ។ ចំណែកនៅស្រុកបារាយណ៍នៅវេលាម៉ោង២ និង២០នាទីរសៀលនៅចំណុចព្រៃចំការស្វាយចន្ទី ក្នុងភូមិសាស្ត្រភូមិសៀមរាង ឃុំច្រនៀងមានករណីចាប់រំលោភសេពសន្ថវៈលើនារីអាយុ១៧ឆ្នាំម្នាក់ បង្កឡើងដោយជនសង្ស័យឈ្មោះជិន យ៉េ អាយុ២៥ឆ្នាំ រស់នៅភូមិ-ឃុំជាមួយគ្នា ។ ក្រោយពេលកើតហេតុជនសង្ស័យបានរត់គេចខ្លួនបាត់ ៕